Fals Profoesi Kuhudhys

1Ger an Arloedh a dheuth dhymm, ow leverel: 2Mab den, profoes erbynn profoesi Ysrael usi ow profoesa. Lavar dhe'n re a wra profoesans yn-mes a'ga holonn aga honan: ‘Klewewgh ger an Arloedh!’ 3Yndellma y lever an Arloedh Duw: Go-i an brofoesi foll usi ow kerdhes war-lergh aga spyrys aga honan, ha ny welsons travyth! 4Dha brofoesi re beu avel owrgeun yn magoryow, A Ysrael. 5Ny yskynnsowgh bys y'n aswaow, na ny dhrehevsowgh fos rag chi Ysrael, may saffo y'n gas yn dydh an Arloedh. 6I re welas fals welesigethow, ha'ga dewinieth yw gow. Yn-medhons, ‘An Arloedh a lever’, kyn na wrug an Arloedh aga dannvon, hag i a wayt aga ger dhe vos kollenwys. 7A ny welsowgh fals welesigeth ha leverel dewinieth wowek, ha hwi ow leverel, ‘An Arloedh a lever’, kyn na gewsis vy?

8Rakhenna yndellma y lever an Arloedh Duw: Drefenn hwi dhe gewsel euveredh ha gweles gwelesigethow gowek, ottavy er agas pynn, yn-medh an Arloedh Duw. 9Ow leuv a vydh erbynn an brofoesi usi ow kweles gwelesigethow koeg hag ow kewsel dewinieth wowek. Ny vydhons yn konsel ow fobel, na ny vydhons skrifys yn kovskrifennow chi Ysrael, na ny dhons yn pow Ysrael. Ena hwi a woer my dhe vos an Arloedh Duw. 10Drefenn i dhe ledya ow fobel yn sowdhan, ow leverel, ‘Kres’, pan nag eus kres; ha pan vo fos tanow drehevys, i a'n gwynngalgh: 11lavar ytho dhe'n re a's gwynngalgh, y fydh hi ow koedha. Glaw a liv yn-nans, ha keserennow a goedh, hag annawel a dardh. 12Pan goedh an fos, a ny vydh leverys dhywgh, ‘Ple'ma'n gwynngalgh a worrsowgh warnedhi?’

13Rakhenna yndellma y lever an Arloedh Duw: My a wra dhe annawel hy folsa y'm sorr, ha glaw a liv yn-nans y'm konnar, hag y fydh keserennow yn sorrvann dh'y distrui. 14My a derr an fos a wynngalghsowgh, ha my a's tewl dhe'n dor, may fo hy selyow diskudhys. Pan goedh, hwi a vydh distruys a-ji dhedhi. Ena hwi a woer my dhe vos an Arloedh. 15My a gowlwra ow sorr erbynn an fos hag erbynn an re a's gwynngalghas; ha my a lever dhywgh, Nyns usi an fos na fella, ha nyns usi an re a's gwynngalghas – 16profoesi Ysrael a brofoesas a-dro dhe Yerusalem hag a welas gwelesigeth a gres rygdhi, pan nag eus kres, yn-medh an Arloedh Duw.

17Ha ty, A vab den, treyl dha fas erbynn myrghes dha bobel usi ow profoesa dhiworth aga holonn aga honan; profoes er aga fynn, 18ha lavar, Yndellma y lever an Arloedh Duw: Go-i an benynes usi ow kwrias bondow war bub konna-bregh ha gul kudhlennow rag pennow a bub ughelder, ow helghya enevow. A helghyowgh enevow ow fobel ha gwitha agas enevow agas honan yn few? 19Hwi re'm dhefolas yn mysk ow fobel rag dornasow a heydh ha temmyn a vara, ow ladha enevow na dalsons merwel, hag ow sparya enevow na dalsons bewa, der agas gowleverel dhe'm pobel usi ow koslowes orth gow.

20Rakhenna yndellma y lever an Arloedh Duw: Yth esov erbynn agas bondow mayth esowgh ow helghya dredha enevow avel ydhyn, ha my a's skward dhiworth agas breghow; ha my a liver an enevow esowgh orth aga helghya avel ydhyn. 21My a derr dhe-ves agas kudhlennow ha sawya ow fobel dhiworth agas leuv, ha ny vydhons namoy yn agas leuv avel preydh. Ena hwi a woer my dhe vos an Arloedh. 22Rag hwi re baynyas kolonn an den gwiryon dre wowyow, pan na'n paynis vy, ha nertha diwla tebelwas ma na dreyllyo dhiworth y dhrog fordh dhe sawya y vewnans; 23rakhenna ny welowgh gwelesigethow koeg na gul dewinieth na fella. My a saw ow fobel dhiworth agas leuv. Ena hwi a woer my dhe vos an Arloedh.