An Gwinbrenn Diles

1Ger an Arloedh a dheuth dhymm, ow leverel:

2Mab den, fatell yw prenn an gwinbrenn bythwell ages pub prenn arall,

skorrenn an gwinbrenn usi yn mysk gwydh an goeswik?

3A vydh prenn kemmerys dhiworto dhe wul ober?

A gemmerons dhiworto ebil dhe gregi neppyth warnodho?

4Gorrys yw y'n tan avel keunys,

ha'n tan a dheber y dhew benn

ha'n kres anodho yw goleskys;

yw dhe les rag ober vytholl?

5Otta, pan o dien ny veu devnydhys rag ober vytholl;

pygemmys le – wosa tan dh'y dhybri

ha'y vos goleskys –

y hyll bos devnydhys arta rag ober vytholl?

6Rakhenna yndellma y lever an Arloedh Duw: Kepar ha prenn an gwinbrenn yn mysk gwydh an goeswik, a res vy dhe'n tan rag keunys, yndella my a re trigoryon Yerusalem. 7My a sett ow fas er aga fynn. Kyn skapyons dhe-ves dhiworth an tan, an tan a's deber; ha hwi a woer my dhe vos an Arloedh, pan settyav ow fas er aga fynn. 8My a wra an tir ynyalder, drefenn i dhe vos dislel, yn-medh an Arloedh Duw.