Yerusalem re Beu Dislel

1Ger an Arloedh a dheuth dhymm, ow leverel: 2Mab den, gwra Yerusalem dhe aswonn hy thaklow kasadow, 3ha lavar, Yndellma y lever an Arloedh Duw dhe Yerusalem: Dha dhevedhyans ha'th tineythyans a veu a bow an Kananysi, dha das a veu Amoryas, ha'th vamm a veu Hittyades. 4Orth dha enesigeth, y'n jydh may feus genys, ny veu kordenn dha vegel treghys, na ny veus golghys yn dowr rag glanheans, na ny veus rutys gans hoelan, na ny veus maylys yn lystennow. 5Ny viras lagas orthis gans piteth dhe wul ragos onan an taklow ma, na dhe gemmeres truedh ahanas. Y feus tewlys war enep an mes, yn kas ahanas16:5 yn kas ahanas: Po yth kawgh dha honan. yn dydh dha enesigeth.

6My a dremenas dresos, ha'th weles ow potya a-dro y'th woes; ha my a leveris dhis y'th woes, ‘Bew! 7ha tev avel skyll an mes.’ Ha ty a ynkressyas ha tevi, ha dos dhe venynses.16:7 ha dos dhe venynses: Amendys. Ebrow ha dos ha bos tegynn a degynnow. Dha dhiwvronn a veu furvys, dha wols a devis, mes ty o noeth ha lomm.

8Ena my a dremenas dresos ha mires, hag otta, drehedhys veus dhe'n oes a gerensa. Ytho my a lesas ow lostenn warnas ha kudha dha noethedh, ha my a dos ti dhis, hag entra yn kevambos genes, yn-medh an Arloedh Duw, ha ty a dheuth ha bos dhymm. 9Ena my a'th vadhyas yn dowr, ha golghi dha woes dhiworthis, ha'th untya gans olew. 10My a'th tillesas gans pows vrosyes, ha gorra sandalyow a groghen morhogh warnas. My a'th vaylyas yn sendal, ha'th kudha gans owrlin. 11My a'th afinas gans tegennow ha gorra breghelligow war dha dhiwla ha torgh war dha gonna. 12My a worras bysow war dha droen, ha skinennow war dha dhiwskovarn, ha kurun deg war dha benn. 13Yndella ty a veu afinys gans owr hag arghans; dha dhillas o sendal hag owrlin, ha pows vrosyes; ty a dhybris bleus fin ha mel hag olew; hag yth es teg dres eghenn, ha ty a sewenis bys yn myghternsys. 14Dha hanow eth yn-mes yn mysk an kenedhlow drefenn dha dekter, rag y feu perfydh der an splannder a worris warnas, yn-medh an Arloedh Duw.

15Mes ty a fydhyas y'th tekter ha dos ha bos hora drefenn dha er-da, ha diveri dha fornikasyon war bub tremenyas, ha bos dhodho.16:15 ha bos dhodho: Amendys war-lergh an Vulgat. Ebrow hag y fydh dhodho. 16Ha ty a gemmeras re a'th tillas, ha gul ragos dha honan tylleryow ughel liesliw, ha gul fornikasyon warnedha. Ny dal hwarvos, na ny vydh. 17Ty a gemmeras dha degynnow teg a'm owr ha'm arghans a res dhis, ha gul ragos dha honan imajys gorow ha gul fornikasyon gansa. 18Ty a gemmeras dha bowsyow brosys dh'aga hudha, ha settya ow olew ha'm ynkys a-ragdha. 19Ha'm bara a res dhis, bleus fin hag olew ha mel, a res dhis dhe dhybri, ty a settyas a-ragdha rag sawer plegadow; hag yndella y feu, yn-medh an Arloedh Duw. 20Ty a gemmeras dha vebyon ha'th vyrghes a dhineythsys dhymmo, ha'ga sakrifia dhedha dhe dhybri. A nyns o dha fornikasyon lowr? 21Ty a ladhas ow vebyon, ha'ga sakrifia dhedha. 22Hag yn oll dha daklow kasadow ha'th fornikasyon ny berthsys kov a dhydhyow dha yowynkneth pan es noeth ha lomm, hag ow potya a-dro y'th woes.

23War-lergh oll dha debelwrians – Go-jy, go-jy! yn-medh an Arloedh Duw – 24ty a dhrehevis growedhva ragos, ha gul ragos tyller ughel yn pub plen. 25Orth penn pub fordh ty a dhrehevis dha dyller ughel, ha gul aborrys dha dekter, hag igeri dha dreys dhe bub tremenyas, ha ty a lieshas dha fornikasyon. 26Ty a wrug fornikasyon gans mebyon Ejyp, dha gentrevogyon bras aga hig, ha ty a lieshas dha fornikasyon, dhe'm provokya dhe sorr. 27Awotta, my re ystynnas ow leuv warnas ha lehe dha rann a diredh, ha'th worra yn-dann vynnas an re a'th kas, myrghes an Filistysi; i a gemmeras sham a'th fordh vethus. 28Ty a wrug fornikasyon gans mebyon Assyria ynwedh, rag ty dhe vos heb dha walgha; ty a wrug fornikasyon gansa ha hwath ny veus gwalghys. 29Ty a lieshas dha fornikasyon bys yn Kaldea, tir an wikoryon, ha hwath ny veus gwalghys.

30Ass yw toemm dha golonn gans fevyr, yn-medh an Arloedh Duw, pan wredh oll an taklow ma, ober hora meur hy maystri, 31ow trehevel dha wrowedhva orth penn pub fordh, hag ow kul dha dyller ughel yn pub plen. Mes ny veus avel hora, rag ty a skonyas gober. 32A wreg avoutres, neb a gemmer estrenyon yn le hy gorti! 33Dhe bub hora i a re gober, mes ty a re dha rohow dhe oll dha garoryon, ha'ga arveth dhe dhones dhis a bub tenewen dhe wul fornikasyon genes. 34Ty yw dihaval dhe venynes erell y'th fornikasyon, rag ny'th tynyas denvyth dhe wul fornikasyon; ty a re gober, ha nyns yw gober res dhis; ty yw dihaval.

35Rakhenna, a hora, klew ger an Arloedh: 36Yndellma y lever an Arloedh Duw: Drefenn bos dha meth diverys, ha dha noethedh diskudhys y'th fornikasyon gans dha garoryon, ha drefenn oll dha idolys kasadow, ha drefenn goes dha vebyon a resys dhedha, 37rakhenna, awottavy ow kuntell oll dha garoryon a gevsys plesour gansa, hag oll myns a gersys, hag oll myns a gessys, ha my a's kuntell er dha bynn a bub tenewen, ha my a dhiskudh dha noethedh a-ragdha, hag i a wel oll dha brivita. 38My a'th vreus gans breus avoutres ha'n re a skoell goes; ha my a dhre warnas an goes a sorr hag avi. 39My a'th re yn aga leuv, hag i a dewl yn-nans dha wrowedhva, ha terri dha dylleryow ughel; i a dhestrypp dha dhillas, ha kemmeres dha emmweyth, hag i a'th as noeth ha lomm. 40I a dhre routh yn-bann er dha bynn, hag i a'th labydh gans meyn, ha'th hakkya dhe demmyn gans aga kledhedhyow. 41I a lesk dha jiow gans tan, ha gul breusow er dha bynn a-wel dhe lies benyn. My a worr diwedh dhe'th fornikasyon, hag ynwedh ny redh gober arta. 42My a gyv powes a'm sorr warnas, ha'm avi a dreyl dhiworthis; my a vydh kosel, ha ny vydhav serrys arta. 43Drefenn na berthsys kov a dhydhyow dha yowynkneth, mes ty a'm sorras gans oll an taklow ma, otta, my ynwedh a attal dha fordh war dha benn, yn-medh an Arloedh Duw. A ny wrussys vilta dres oll dha daklow kasadow?

44Otta, peub a lever henlavarow a lever an henlavar ma er dha bynn: ‘Kepar hag yw mamm, yndella yw hy myrgh.’ 45Ty yw myrgh dha vamm, a dhivlasas hy gorti ha'y mebyon; ty yw hwoer dha hwerydh neb a dhivlasas aga gwerti ha'ga mebyon; agas mamm o Hittyades ha'gas tas o Amoryas. 46Dha hwoer gottha yw Samaria, hi ha'y myrghes neb a drig a'n barth kledh dhis; ha'th hwoer yowynka neb a drig a'n barth dhyghow dhis yw Sodom ha'y myrghes. 47A ny gerdhsys yn aga fordhow ha'ga thaklow kasadow? A verr spys y feus moy legrys agessa i yn oll dha fordhow. 48Dell vewav, yn-medh, an Arloedh Duw, ny wrug Sodom dha hwoer na'y myrghes kepar dell wrussys, ty ha'th vyrghes. 49Awotta anewnder Sodom dha hwoer: goeth, gwalgh a vara, hag es hebask o dhedhi hi ha dh'y myrghes; ny nerthas leuv an boghosek na'n edhommek. 50Goethus ens, hag y hwrussons taklow kasadow a-ragov; ytho my a's removas, dell welsys.16:50 dell welsys: Amendys war-lergh an Vulgat. Ebrow dell welis vy. 51Samaria ny wrug hanter dha beghosow; ty re lieshas dha daklow kasadow moy agessa i. Ty re wrug dhe'th hwerydh bos ewnhynsek aga semlans gans oll dha daklow kasadow a wrussys. 52Ytho ty ynwedh, borth dha dhespit; ty re wrug dhe'th hwerydh bos vreusys moy ewnhynsek agesos, rag bos dha beghosow re wrussys moy kasadow ages aga feghosow i. Ytho ty ynwedh, porth dha veth, rag ty re wrug dhe'th hwerydh bos ewnhynsek aga semlans.

53My a wra restorita dhedha, restorya Sodom ha'y myrghes, ha restorya Samaria ha'y myrghes, ha my a wra restorita dhiso jy war-barth gansa, 54rag may perthi dha dhespit ha bos methek a bup-tra a wrussys, orth aga honfortya. 55Dha hwerydh, Sodom ha'y myrghes, a dreyl dh'aga hynsa studh, ha Samaria ha'y myrghes a dreyl dh'aga hynsa studh, ha ty ha'th vyrghes a dreyl dh'agas kynsa studh. 56A ny veu dha hwoer Sodom drog-gerys y'th anow yn dydh dha woeth, 57kyns bos dha sherewynsi diskudhys? Lemmyn ty yw testenn a skorn dhe vyrghes Aram, hag oll hy hentrevogyon, dhe vyrghes an Filistysi – myns eus oll a-dro dhis. 58Ty a berth keredh dha vilta ha'th oberow kasadow, yn-medh an Arloedh.

Kevambos Bys Vykken

59Rag yndellma y lever an Arloedh Duw: My a wra genes kepar dell wrussys, rag ty dhe dhispresya an ti, ow terri an kevambos. 60Mes my a berth kov a'm kevambos genes yn dydhyow dha yowynkneth, ha fastya genes kevambos a dhur bys vykken. 61Ena ty a berth kov a'th fordhow ha kemmeres meth pan ressevydh dha hwerydh, an re kottha agesos ha'n re yowynka agesos. My a's re dhis avel myrghes, mes ny vydh henna drefenn ow hevambos genes. 62My a fast ow hevambos genes, ha ty a woer my dhe vos an Arloedh; 63rag may perthi kov ha bos methek, heb igeri dha anow arta drefenn dha dhisenor, pan wrav prenedh dhis rag pup-tra re wrussys, yn-medh an Arloedh Duw.