An Dhew Er ha'n Gwinbrenn

1Ger an Arloedh a dheuth dhymm, ow leverel: 2Mab den, dro allegori yn-rag, ha lavar parabolenn dhe ji Ysrael. 3Lavar: Yndellma y lever an Arloedh Duw:

Er bras gans eskelli bras ha pluvennow hir,

leun a bluv liesliw,

a dheuth dhe Lebanon

ha kemmeres an ughella skorrenn a gederwydhenn;

4ev a dorras penn hy barrennow

ha'y dri dhe bow a genwerth,

ha'y settya yn sita a wikoryon.

5Ena ev a gemmeras neppyth a has an tir

ha'y worra y'n dor a hasek;

ryb lies dowr

ev a'n plansas avel helygenn;

6Ev a skyllas, ha bos gwinbrenn

owth omlesa isel;

y skorrennow a dreylyas war-tu hag ev,

hag y feu y wreydh yn-danno.

Ytho y teuth ha bos gwinbrenn

ha gul eginyow

ha dannvon barrennow yn-mes.

7Yth esa er bras arall

gans eskelli bras ha pluv pals;

hag otta, an gwinbrenn ma

a dreylyas y wreydhyow dhodho;

hag a dhannvonas y varrennow dhodho,

may hwrella y dhowrhe

dhiworth an dor may feu plynsys.

8Y feu treusplynsys

dhe dhor da ryb lies dowr

dhe wul skorr

ha dhe dhoen frut,

dhe vos gwinbrenn bryntin.

9Lavar: Yndellma y lever an Arloedh Duw:

A sewen?

A ny denn ev y wreydhyow yn-bann,

ha terri y frut rag may hwetthro,

hag oll y varrennow yr a wedher?

Ny vydh gans leuv grev na meur a bobel

y fydh tennys yn-bann dhiworth y wreydhyow.

10Mars yw treusplynsys, a wra ev sewena?

Pan wra gwyns an est y dochya

a ny wra ev gwedhra oll yn tien,

gwedhra y'n dor may tevis?

11Ger an Arloedh a dheuth dhymm, ow leverel: 12Lavar dhe'n chi diwostydh, A ny wodhowgh styr an taklow ma? Lavar, Otta myghtern Babylon a dheuth dhe Yerusalem ha kemmeres hy myghtern ha'y fennsevigyon, ha'ga dri ganso dhe Babylon. 13Ena ev a gemmeras onan a'n has ryel ha gul kevambos ganso, ha'y worra yn-dann li. Ynwedh ev a gemmeras ledyoryon an wlas, 14rag may fe gwlaskor isel, ha ma na omdhrehaffa arta, mes may saffa dre witha y gevambos. 15Mes ev a rebellyas er y bynn, ow tannvon y gannasow dhe Ejyp, dhe ri dhodho mergh ha lu bras. A yll bos seweni? A yll skapya, neb a wra yndella? A yll terri kevambos ha skapya?

16Dell vewav vy, yn-medh an Arloedh Duw, ev a verow yn Babylon, yn tyller an myghtern a'n gwrug ev myghtern; may tispresyas y li, ha terri y gevambos. 17Ny vydh Faro gweres dhodho yn bresel, gans y lu bras hag ost meur, pan vydh gweythyow-esedhva krugys, ha pan vydh touryow-esedhva drehevys dhe dreghi dhe-ves lies enev. 18Drefenn ev dhe dhispresya an ti, ow terri an kevambos, hag ow ri y leuv, ha gul oll an taklow ma, ny skap. 19Rakhenna yndellma y lever an Arloedh Duw: Dell vewav, my a attal war y benn ow ti a dhispresyas, ha'm kevambos a dorras. 20My a les ow roes warnodho, hag ev a vydh kechys y'm antell, ha my a'n dre dhe Babylon ha'y vreusi ena, drefenn ev dhe vos dislel dhymm. 21Hag oll flour y soudoryon a goedh dre'n kledha, ha'n remenant a vydh skattrys gans pub gwyns; ha hwi a woer, my, an Arloedh dhe gewsel.

22Yndellma y lever an Arloedh Duw:

My ow honan a gemmer skyllenn

dhiworth topp ughel an gederwydhenn,

ha'y settya y'n dor;

dhiworth topp hy barrennow yowynk

my a derr skyllenn bleudh;

my ow honan a's plans

war venydh pur ughel.

23Yn ughella menydh Ysrael

my a'n plans,

may hallo dri yn-mes skorrennow ha doen frut,

ha dos ha bos kederwydhenn vryntin,

ha pub par edhen a drig yn-danno,

ha pub par kreatur askellek

a drig yn skeus y skorrennow.

24Ena oll gwydh an gwel a woer

my dhe vos an Arloedh.

My a dhre dhe'n leur an wydhenn hir

hag ughelhe an wydhenn isel,

my a dhesygh an wydhenn las,

ha gul dhe'n wydhenn sygh skylla;

My an Arloedh re gewsis

ha my a'n gwra.