Peghosow

1Ger an Arloedh a dheuth dhymm, ow leverel: 2Prag yth esowgh hwi owth usya an henlavar ma a-dro dhe bow Ysrael, ow leverel: ‘An tasow re dhybris grappys trenk, ha dyns an fleghes re dheuth ha bos sogh’? 3Dell vewav, yn-medh an Arloedh Duw, ny vydh usys genowgh an henlavar ma byth moy yn Ysrael. 4Otta, oll an enevow yw dhymm; keffrys enev an tas hag enev an mab yw dhymm. An enev a begh a verow.

5Mes gour mar pydh gwiryon ha gul an pyth yw lafyl hag ewn – 6mar ny dheber war an menydhyow, na drehevel y dhewlagas dhe idolys chi Ysrael, na defola gwreg y gentrevek, na dos nes dhe wreg yn hy amseryow, 7nag arwaska denvyth, mes ev a dhaskorr an pyth a gemmeras avel gaja rag prestenn; mar ny wra ladrynsi, mes ev a re y vara dhe'n nownek, ha kwetha an noeth gans dillasenn, 8mar ny wra presta rag oker, na kemmeres goroker, mar ny dreyl y leuv dhiworth kammhynseth, mes ev a wra gwirvreus yntra gour ha gour, 9hag a gerdh y'm ordenansow hag a wayt gul ow breusow yn gwirder – ev yw gwiryon, ev a vew yn sur, yn-medh an Arloedh Duw.

10Mes mars eus dhodho mab neb a lader hag a skoell goes, hag a wra onan a'n taklow ma, 11(kyn na wrug an tas nagonan anedha), mes ynwedh ev a dheber war an menydhyow ha defola gwreg y gentrevek, 12neb a arwask an boghosek ha'n edhommek, neb a byll, neb na dhaskorr gaja, neb a dhrehav y dhewlagas dhe idolys, ha gul tra gasadow, 13neb a re rag oker ha kemmeres goroker: a wra ev bewa? Ny vew; ev re wrug oll an taklow kasadow ma; ev a vydh gorrys dhe'n mernans yn sur; y woes a vydh warnodho y honan.

14Mes mar kwra an den ma dineythi mab neb a wel oll an peghosow gwrys gans y das, ha spit dh'aga gweles ny wra yndella, 15neb na dheber war an menydhyow, na drehevel y dhewlagas dhe idolys chi Ysrael, na defola gwreg y gentrevek, 16neb na arwask denvyth, na kemmeres gaja, na pylla, mes neb a re y vara dhe'n nownek, ha kwetha an noeth gans dhillasenn; 17neb a dreyl y leuv dhiworth den boghosek, neb na gemmer oker na goroker, neb a wra ow breusow, ha kerdhes y'm ordenansow: ny verow ev drefenn anewnder y das; ev a vew yn surredi. 18Mes y das, drefenn ev dhe arwaska ha pylla y vreder, ha ny wrug da yn mysk y bobel, otta ev a verow drefenn y anewnder.

19Mes hwi a lever, ‘Prag na dheg an mab anewnder an tas?’ Pan wrug an mab an pyth yw lafyl hag ewn, ha re waytyas gul oll ow ordenansow, ev a vew yn surredi. 20An enev a begh a verow; mab ny dheg anewnder an tas, ha tas ny dheg anewnder an mab; ewnder an den gwiryon a vydh warnodho, ha sherewynsi an tebelwas a vydh warnodho.

21Mes mar treyl an tebelwas dhiworth oll y beghosow a wrug, ha gwitha oll ow ordenansow, ha gul an pyth yw lafyl hag ewn, ev a vew yn surredi; ny verow. 22Ny vydh kovhes er y bynn nagonan a'y dreuspassow re wrug; drefenn y wiryonedh a wrug, ev a vew. 23Eus delit dhymm yn mernans tebelwas? yn-medh an Arloedh Duw; a nyns eus moy delit dhymm pan dreyl dhiworth y fordhow ha bewa? 24Mes pan dreyl an den gwiryon dhiworth y wiryonedh ha gul war-lergh oll an taklow kasadow a wra an tebelwas, a vew ev? Ny vydh kovhes travyth a'y wiryonedh a wrug; drefenn an dislelder ha'n peghes a wrug, ev a verow.

25Mes hwi a lever, ‘Fordh an Arloedh yw anewn.’ Klewewgh, chi Ysrael: Yw ow fordh anewn, po a nyns yw agas fordhow hwi anewn? 26Pan dreyl den gwiryon dhiworth y ewnder ha gul sherewneth, ev a verow rygdhi; rag y sherewneth a wrug, ev a verow. 27Mes pan dreyl tebelwas dhiworth y dhrogober re wrug, ha gul an pyth yw lafyl hag ewn, ev a saw y enev yn few. 28Rag ev dhe weles ha treylya dhiworth oll y kammweythresow re wrug, ev a vew yn sur; ny verow. 29Byttegyns chi Ysrael a lever, ‘Fordh an Arloedh yw anewn.’ Yw ow fordhow anewn, chi Ysrael? A nyns yw agas fordhow hwi anewn?

30Rakhenna my a'gas breus pubonan war-lergh y fordhow, a ji Ysrael, yn-medh an Arloedh Duw. Koedhewgh yn edrek ha treylyewgh agas honan dhiworth oll agas kammweythresow; ena ny vydh drogober dhywgh ken a drebuchya. 31Tewlewgh a-dhiwarnowgh oll agas kammweythresow re wrussowgh ha gwrewgh ragowgh agas honan kolonn nowydh ha spyrys nowydh. Prag y ferwowgh, a ji Ysrael? 32Rag nyns ov hwansek dhe vernans den marow, yn-medh an Arloedh Duw; ytho treylyewgh ha bewewgh.