Galargan rag Pennsevigyon Ysrael

1Ty, drehav galargan rag pennsevigyon Ysrael, 2ha lavar:

Assa veu dha vamm lewes

yntra lewyon!

Hi a wrowedhas yn mysk lewyon yowynk,

ow meythrin hy lewigow.

3Hi a vagas onan a'y lewigow;

ev a dheuth ha bos lew yowynk.

Ev a dhyskas skwardya preydh;

ev a dhybris tus.

4An kenedhlow a glewas anodho;

kechys veu yn aga fytt.

I a'n dros gans higow

dhe bow Ejyp.

5Pan welas hi, hi dhe waytyas yn euver,

ha'y govenek dhe vos kellys,

hi a gemmeras onan arall a'y lewigow

ha'y wul lew yowynk.

6Yth esa ow mos a-dro yn mysk lewyon;

ev a dheuth ha bos lew yowynk.

Ev a dhyskas skwardya preydh

ev a dhybris tus.

7Ev a dorras aga falesyow dhe'n dor19:7 Ev a dorras aga falesyow dhe'n dor: Amendys. Ebrow Ev a wodhva y wedhwesow.

ha gul aga threvow ynyal.

An pow a skruthas ha pup-tra esa ynno

gans son y usa.

8Kenedhlow a omsettyas er y bynn

dhiworth an ranndiryow oll a-dro,

ha lesa aga roes warnodho;

kechys veu yn aga fytt.

9I a'n gorras yn bond-konna gans higow,

ha'y dhri dhe vyghtern Babylon.

I a'n gorras yn-dann with,

ma na ve klewys y lev arta

war venydhyow Ysrael.

10Dha vamm o avel gwinbrenn y'th winlann

plynsys ryb dowr;

feyth o hi, ha tew gans skorrennow

drefenn palster dowr.

11Hi a's teva garrow krev

gwiw rag ternwelennow rewloryon.

Ughel o hi

a-ugh an skorrennow tew;

hewel o hi yn hy ughelder

gans lanwes hy del.

12Mes hi a veu diwreydhys yn sorr,

ha tewlys dhe'n dor;

gwyns an est a's desyghas;

hy frut a veu destryppys,

hy garr grev a wedhras;

tan a's dybris.

13Lemmyn hi yw plynsys y'n difeyth,

yn tir kras ha sygh.

14Tan eth war-ves dhiworth hy garr

ha dybri hy skyll ha'y frut.

Nyns eus ynni garr grev

gwiw rag ternwelenn rewler.

Hemm yw galargan, hag y fydh usys avel galargan.