Gwelesigeth an Rol-skrifa

1Yn-medh ev dhymm: Mab den, sav war dha dreys, ha my a gews genes. 2An Spyrys a entras ynnov pan gewsis dhymm, ha'm settya war ow threys, ha my a'n klewas ow kewsel dhymm. 3Yn-medh ev dhymm: Mab den, my a'th tannvon dhe vebyon Ysrael, dhe genedhel a rebellys re rebellyas er ow fynn; i ha'ga thasow re wrug treuspass er ow fynn bys y'n jydh ma. 4Mebyon penn-kales yns i ha gorth aga holonn; yth esov orth dha dhannvon dhedha. Lavar dhedha, ‘Yndellma y lever an Arloedh Duw.’ 5Hag i, mar koslowons po mar skonyons (rag chi diwostydh yns i) byttegyns i a woer y feu profoes yn aga mysk. 6Ha ty, A vab den, na borth own anedha na a'ga geryow. Na borth own kyn fo spern ha spedhas a-dro dhis, ha ty trigys yn mysk skorpyons. Na borth own a'ga geryow ha na borth euth a'ga fasow, rag chi diwostydh yns i. 7Kows ow geryow orta, mar koslowons po mar skonyons; rag chi diwostydh yns i.2:7 rag chi diwostydh yns i: Ow siwya an Septuagint, an Syriek ha'n Targum. Ebrow rag rebellyans yns i.

8Mes ty, A vab den, goslow orth an pyth esov orth y gewsel orthis. Na vydh rebell avel an chi diwostydh na; igor dha anow ha deber an pyth esov ow ri dhis. 9Ena my a viras, hag otta leuv ystynnys dhymm, hag otta, yth esa ynni rol-skrifa. 10Ena ev a's lesas a-ragov; yth esa skrif war hy dew denewen, ha skrifys warnedhi yth esa galargan ha kynvann ha guw.