An Sita Woesek

1Ger an Arloedh a dheuth dhymm, ow leverel: 2Ty, A vab den, a vreusydh? A vreusydh an sita woesek? Gwra godhvedhys dhedhi oll hy thaklow kasadow. 3Lavar, Yndellma y lever an Arloedh Duw: Sita usi ow skoellya goes yn hy kres, may teffo hy thermyn, hag owth omdhefola dre wul idolys. 4Ty yw kablus drefenn an goes a skoellsys, ha ty re omdhefolsys der an idolys a wrussys. Ty re dhros dha dhydh nes, ha dos dhe dhiwedh dha vlydhynyow. Rakhenna my re'th wrug skorn dhe'n kenedhlow, ha ges dhe oll an powyow. 5An re yw a-ogas ha'n re yw a-bell a wra ges ahanas, ty sita drog-gerys, leun a dervans.

6Otta ynnos re beu pennsevigyon Ysrael, pubonan herwydh y nerth ow skoellya goes. 7Ynnos re beu tas ha mamm despitys; y'n kres ahanas i re arwaskas an alyon ha tebeldhyghtya an omdhivas ha gwedhwes. 8Ty re dhispresyas ow taklow sans, ha defola ow sabotys. 9Ynnos re beu tus ow sklandra dhe skoellya goes; ynnos re beu tus ow tybri war an menydhyow; i re wrug tra vethus y'n kres ahanas. 10Ynnos i re dhiskudhas noethedh aga thasow, ynnos i re dhefolas an benyn yn hy amseryow. 11Ynnos gour re wrug tra gasadow dhe wreg y gentrevek, ha gour a dhefol y wohydh gans vilta, ha gour a dhefol y hwoer, myrgh y das. 12Ynnos i re gemmeras falswober dhe skoellya goes; ty re gemmeras oker ha goroker, ha kemmeres gwayn dhiworth dha gentrevek dre arwask, ha ty re'm ankevsys, yn-medh an Arloedh Duw.

13Otta, my re weskis ow diwla war-barth erbynn dha wayn anewn re wrussys hag erbynn an goes skoellys genes y'n kres ahanas. 14A yll sev dha golonn sevel, po a vydh dha dhiwla krev rag an dydhyow may hwrav vy dha dhyghtya? My an Arloedh re gewsis, ha my a'n gwrav. 15My a wra dha lesa yn kenedhlow ha'th skattra y'n powyow, ha kartha dhiworthis dha vostedhes. 16Pan vydhydh defolys a-wel dhe'n kenedhlow, ena ty a woer my dhe vos an Arloedh.

17Ger an Arloedh a dheuth dhymm, ow leverel: 18Mab den, chi Ysrael re beu dhymm avel atal; i oll, brons, sten, horn, ha plomm a-berth yn forn. Atal arghans yns i. 19Rakhenna yndellma y lever an Arloedh Duw: Drefenn hwi oll dhe vos atal, otta, rakhenna my a'gas kuntell a-berth yn Yerusalem. 20Kepar dell guntellons arghans, brons, horn, plomm, ha sten a-berth yn forn dhe hwytha tan warnedha dh'aga theudhi, yndella my a'gas kuntell y'm sorr ha'm konnar, ha'gas settya ena22:20 ha'gas settya ena: Po amendyans ha hwytha warnowgh. ha'gas teudhi. 21My a'gas kuntell ha hwytha warnowgh gans tan ow sorrvann, ha hwi a vydh teudhys a-ji dhedhi. 22Kepar dell deudh arghans yn mysk forn, yndella y fydhowgh teudhys a-ji dhedhi; ha hwi a woer y hwrugavy, an Arloedh, diveri ow sorr warnowgh.

23Ger an Arloedh a dheuth dhymm, ow leverel: 24Mab den, lavar dhedhi, Ty yw dor ma na goedhas glaw warnodho,22:24 ma na goedhas glaw warnodho: Amendys war-lergh an Septuagint. Ebrow na veu glanhes. na kowasow y'n jydh a sorrvann. 25Hy fennsevigyon yn hy kres yw kepar ha lew owth usa, ow terri preydh; i re dhybris enevow; i re gemmeras tresor ha taklow drudh; i re wrug gwedhwesow pals a-berth ynno. 26Hy oferysi re wrug freudh erbynn ow lagha ha disakra ow thaklow sans; ny dhissernsons yntra sans hag ansans, ha ny dhysksons dissernya yntra glan hag avlan; i re dhegeas aga dewlagas dhiworth ow sabotys, mayth ov vy disakrys yn aga mysk. 27Hy fennsevigyon ynni yw avel bleydhi ow terri preydh, ow skoellya goes dhe dhistrui enevow may kaffons gwayn anewn. 28Hy frofoesi re wynngalghyas ragdha, ow kweles fals welesigethow hag ow kul dewinieth wowek, ow leverel, ‘Yndellma y lever an Arloedh Duw’, pan na gewsis an Arloedh. 29Pobel an tir re arwaskas ha ladra; i re debeldhyghtyas an boghosek ha'n edhommek, hag arwaska an alyon, ow nagha gwirvreus.

30My a hwilas gour anedha a vynna drehevel an fos ha sevel a-ragov y'n aswa, ma na ve an pow distruys, mes ny'n kevis. 31Ytho my a dhiveris ow sorrvann warnedha; my re's konsumyas gans tan ow honnar; my re attylis aga fordh war aga fenn aga honan, yn-medh an Arloedh Duw.