An Chek ow Pryjyon

1Ger an Arloedh a dheuth dhymm y'n nawves blydhen, y'n degves mis, yn degves dydh an mis, ow leverel: 2Mab den, skrif an dydhyas ma, poran an jydh ma. Myghtern Babylon a omsettyas erbynn Yerusalem poran y'n jydh ma. 3Gwra parabolenn rag an chi diwostydh ma, ha lavar dhedha, Yndellma y lever an Arloedh Duw:

Sett an chek, sett an chek,

diver dowr ynno ynwedh.

4Gorr ynno temmyn a gig,

pub rann dha, an vordhos ha'n skoedh.

Gwra y lenwel a eskern dewisys.

5Kemmer davas dhewisys,

ynwedh bern an prenn24:5 prenn: Amendys. Ebrow eskern. yn-danno;

bros hi yn uskis;

ha bryjyewgh hy eskern a-berth ynno.

6Rakhenna yndellma y lever an Arloedh Duw:

Go-hi an sita woesek,

kalter gans gossen ynni,

ha'y wossen ny a dhiworti!

Kemmer an kig dhiworti tamm ha tamm,

heb tewlel koelbrenn.

7Rag yma an goes a skoellyas a-berth ynni;

hi a'n dinewis war garrek lomm;

ny'n diveris war an dor

dh'y gudha gans doust.

8Dhe dhri ow sorr yn-bann, dhe dyli dial,

my re worras an woes a skoellyas

war garrek lomm,

ma na vo kudhys.

9Rakhenna yndellma y lever an Arloedh Duw:

Go-hi an sita woesek!

My ynwedh a wra bern bras a brenn.

10Bern an prenn, enow an tan;

kegin an kig yn ta, diver an kowl;24:10 diver an kowl: Amendys. Ebrow pareus an spisys.

bedhes an eskern leskys.

11Ena sett an chek gwag war an regydh

rag may fo poeth, ha'y gober leskys,

may teuttho y avlander a-berth ynno,

ha may fo y wossen konsumys.

12My re omskwithas yn euver;

ny eth a-dhiworto y wossen dew,

na hwath gans tan.

13Y'th avlander yma fornikasyon.

Drefenn my dhe assaya dha lanhe,

mes ny vynnsys bos glanhes,

ny vydhydh glanhes arta dhiworth dha avlander

bys pan rov powes dhe'm sorr er dha bynn.

14My an Arloedh re gewsis. An termyn re dheuth, ha my a'n gwrav. Ny vydhav owth omwitha, na sparya, na diserri. War-lergh dha fordhow ha'th wriansow my a'th vreus, yn-medh an Arloedh Duw.

Mernans Gwreg Ezekiel

15Ger an Arloedh a dheuth dhymm, ow leverel: 16Mab den, awottavy ow kemmeres dhiworthis desir dha dhewlagas gans strekys; ny gynydh, na ny oelydh, na ny vydh dhis dagrow. 17Hanas – mes yn kosel; na wra kynvann rag an re varow. Fast dha dulyfant warnas ha gorr dha sandalyow war dha dreys; na gudh dha vinvlew, ha na dheber bara an gynoryon.24:17, 22 an gynoryon: Amendys war-lergh an Vulgat. 18Ytho myttin my a gewsis orth an bobel, ha'm gwreg a verwis y'n gorthugher. Ternos myttin my a wrug par dell veu erghys dhymm.

19Ena an bobel a leveris dhymm, ‘A ny dherivydh dhyn, pyth yw an styr ragon ni, ty dhe wul yndella?’ 20Yn-medhav dhedha: Ger an Arloedh a dheuth dhymm, ow leverel: 21Lavar dhe ji Ysrael, Yndellma y lever an Arloedh Duw: Awottavy ow tisakra ow sentri, goeth agas nerth, desir agas dewlagas, ha delit agas enev. Agas mebyon ha'gas myrghes, a wrussowgh aga gasa, a goedh der an kledha. 22Ha hwi a wra kepar dell wrugavy; ny gudhowgh ages minvlew na dhybri bara gynoryon. 23Agas tulyfantys a vydh war agas pennow, ha'gas sandalyow war agas treys. Ny gynowgh na ny oelowgh, mes hwi a wra pedri yn agas kammweythresow, ha hanasa an eyl dh'y gila. 24Ezekiel a vydh tokyn dhywgh; hwi a wra kepar ha pup-tra a wrug ev. Pan hwyrvydh, hwi a woer my dhe vos an Arloedh Duw.

25Ha ty, A vab den, y'n jydh may hwrav vy kemmeres dhiworta aga skons, lowena aga thekter, delit aga dewlagas, desir aga enev, hag ynwedh aga mebyon ha'ga myrghes – 26y'n jydh na, fowesik a dheu dhis dhe dherivas dhis an nowodhow. 27Y'n jydh na dha anow a vydh igor dhe'n fowesik; ty a gews ha ny vydhydh taw na fella. Yndella ty a vydh tokyn dhedha, hag i a woer my dhe vos an Arloedh.