Profoesans Erbynn Ammon

1Ger an Arloedh a dheuth dhymm, ow leverel: 2Mab den, sett dha fas troha an Ammonysi ha profoes er aga fynn. 3Lavar dhe vebyon Ammon, Klewewgh ger an Arloedh Duw: Yndellma y lever an Arloedh Duw, Drefenn ty dhe leverel, ‘Aha!’ war ow sentri pan veu disakrys, ha war dir Ysrael pan veu gwrys ynyal, ha dhe ji Yuda pan ethons yn divroedh; 4rakhenna awottavy orth dha ri dhe vebyon an est rag perghennogeth. I a sett aga hampow ynnos ha drehevel aga thyldow ynnos; i a dheber dha froeth, hag i a yv dha leth. 5My a wra Rabba peurva rag kowrvergh, hag Ammon growedhva rag deves. Ena hwi a woer my dhe vos an Arloedh. 6Rag yndellma y lever an Arloedh Duw: Drefenn ty dhe dakya diwleuv ha stankya treys, ow lowenhe gans oll an atti y'th enev erbynn pow Ysrael, 7rakhenna awottavy owth ystynn ow leuv er dha bynn ha'th ri avel preydh dhe'n kenedhlow. My a'th tregh dhiworth an poblow ha'th tilea dhiworth an powyow; my a'th tistru; ha hwi a woer my dhe vos an Arloedh.

Profoesans Erbynn Moab

8Yndellma y lever an Arloedh Duw: Drefenn Moab ha Seir dhe leverel, Otta, chi Yuda yw avel oll an kenedhlow erell, 9rakhenna my a iger tenewen Moab, ow talleth dhiworth an sitys yn y oryon, glori an pow, Beth-yeshimoth, Baal-meon, ha Kiryathaym. 10My a's re war-barth gans an Ammonysi dhe vebyon an est avel perghennogeth, ma na vo kovhes an Ammonysi na fella yn mysk an kenedhlow; 11ha my a wra breus erbynn Moab; ena i a woer my dhe vos an Arloedh.

Profoesans Erbynn Edom

12Yndellma y lever an Arloedh Duw: Drefenn Edom dhe dyli dial war ji Yuda, hag y feu pur gablus pan dylis dial warnedha, 13rakhenna yndellma y lever an Arloedh Duw, My a ystynn ow leuv erbynn Edom, ha treghi dhiworto den ha best; ha my a'n gwra tyller a vagoryow; dhiworth Teman bys Dedan i a goedh der an kledha. 14My a dal ow dial war Edom dre leuv ow fobel Ysrael, hag i a wra yn Edom war-lergh ow sorr ha'm konnar; hag i a woer ow dial, yn-medh an Arloedh Duw.

Profoesans Erbynn Filistia

15Yndellma y lever an Arloedh Duw: Drefenn an Filistysi dhe dyli dial, ha gans atti an enev dhe dhistrui yn eskarogeth heb diwedh; 16rakhenna yndellma y lever an Arloedh Duw, Awottavy owth ystynn ow leuv erbynn an Filistysi, hag ow treghi an Kerethysi, hag ow tistrui remenant an arvor. 17My a dal warnedha dial bras gans kessydhyans konneryek. Ena i a woer my dhe vos an Arloedh, pan dalav ow dial warnedha.