Profoesans Erbynn Tyr

1Y'n unnegves blydhen, yn kynsa dydh an mis, ger an Arloedh a dheuth dhymm, ow leverel, 2Mab den, drefenn Tyr dhe leverel erbynn Yerusalem, ‘Aha! Yetys an poblow yw terrys ha'n sita yw igor a-ragov; my a vydh sewen, rag hy bos distruys’, 3rakhenna yndellma y lever an Arloedh Duw: Otta, yth esov er dha bynn, A Tyr, ha my a dhre yn-bann lies kenedhel er dha bynn, kepar dell wra an mor dri y donnow yn-bann. 4I a dhistru fosow Tyr, ha terri hy thouryow dhe'n dor, ha skuba dhe-ves hy doust dhiworti, ha'y gul karrek lomm. 5Y fydh tyller rag lesa roesow yn kres an mor; rag my re gewsis, yn-medh an Arloedh Duw. Hi a vydh preydh dhe'n kenedhlow, 6ha'y myrghes usi y'n gwel a vydh ledhys gans an kledha. Ena i a woer my dhe vos an Arloedh.

7Rag yndellma y lever an Arloedh Duw: Awottavy ow tri erbynn Tyr Nebukadnessar myghtern Babylon dhiworth an gogledh, myghtern myghternedh, war-barth gans mergh ha charettow, gans marghoglu ha troeslu meur. 8Ev a ladh dha vyrghes y'n gwel gans an kledha, ha krugya gweyth-esedhva er dha bynn, ha krugya krug-esedhva er dha bynn, ha drehevel to a skoesow er dha bynn. 9Ev a sett strokosow y hor'bennow erbynn dha fosow, ha terri dha douryow dhe'n dor gans y voelyow. 10Mar lies vydh y vergh may hwra aga doust dha gudha. Orth son an varghogyon, ha'n rosow, ha'n charettow dha fosow a gren, pan enter y'th yetys kepar ha'n re a enter yn sita mayth eus ynni aswa. 11Gans karnow y vergh ev a drett oll dha stretys; ev a ladh dha bobel gans an kledha, ha'th kolovenyow krev a goedh dhe'n dor. 12I a byll dha rychys hag a breydh dha wara; i a derr dhe'n dor dha fosow ha distrui dha jiow desiradow; hag i a dewl dha veyn ha'th prennyer ha'th doust yn kres an mor. 13My a wra dhe dros dha gana tewel, ha son dha sowtris ny vydh klewys arta. 14My a'th wra karrek lomm; ty a vydh tyller rag lesa roesow. Ny vydhydh nevra dastrehevys, rag my an Arloedh re gewsis, yn-medh an Arloedh Duw.

15Yndellma y lever an Arloedh Duw dhe Tyr: A ny gren an arvoryow orth son dha goedh, pan hanas an re goliys, pan vydh an ladhva y'n kres ahanas? 16Ena oll pennsevigyon an mor a dhiyskynn dhiworth aga thronys ha gorra dhe denewen aga fowsyow, ha diwiska aga dillas brosys. I a omwisk gans krena, hag esedha war an dor; i a gren heb hedhi, hag i a gemmer skruth orthis. 17I a dhrehav galargan warnas, ha leverel dhis,

Fatell osta distruys, annedhyades an moryow,26:17 Fatell osta distruys, annedhyades an moryow: Po amendyans war-lergh an Septuagint Fatell osta gyllys dhe goll dhiworth an mor.

an sita gerys-da,

neb a veu krev war an mor,

hi ha'y annedhysi;

hi neb a worras hy euth

war oll hy annedhysi!

18Lemmyn an arvoryow a gren

yn dydh dha goedh;

an ynysow usi y'n mor

a gemmer skruth orth dha dhibarth.

19Rag yndellma y lever an Arloedh Duw: Pan y'th wrav sita wastys avel sitys nag yw annedhys, pan dhrov yn-bann warnas an downder, ha'n dowrow meur a'th kudh, 20ena my a'th tre yn-nans gans an re a dhiyskynn dhe'n pytt, dhe'n bobel a dermynyow koth; ha my a'th wrav dhe driga y'n dor barth a-woeles, kepar hag yn magoryow an termynyow koth, gans an re a dhiyskynn dhe'n pytt, ma na ylli dehweles, na kavoes tyller yn mysk an re vew.26:20 ma na ylli dehweles, na kavoes tyller yn mysk an re vew: Amendys. 21Euth tromm a wrav dhis. Ty a vydh hwilys, heb bos kevys arta bys vykken, yn-medh an Arloedh Duw.