Profoesans erbynn Myghtern Tyr

1Ger an Arloedh a dheuth dhymm, ow leverel: 2Mab den, lavar dhe bennsevik Tyr, Yndellma y lever an Arloedh Duw:

Drefenn goeth dha golonn,

ty a lever, ‘My yw duw,

owth esedha war dron duwow

yn kolonn an moryow.’

Mes den osta a-der duw,

kyn settydh dha golonn

avel kolonn duw.

3Otta ty yw furra ages Daniel,

ha nyns eus kevrin kudhys dhiworthis.

4Gans dha furneth ha'th konvedhes

ty re wrug rychys ragos dha honan,

ha kuntell owr hag arghans

y'th tresorvaow.

5Gans dha furneth vras ha'th kenwerth

ty re ynkressyas dha rychys

ha'th kolonn re beu drehevys drefenn dha rychys.

6Rakhenna yndellma y lever an Arloedh Duw:

Drefenn ty dhe settya dha golonn

avel kolonn duw,

7rakhenna, awottavy ow tri estrenyon er dha bynn,

an fella a'n kenedhlow;

i a denn aga kledhedhyow erbynn tekter dha furneth

ha defola dha splannder.

8I a'th tre yn-nans dhe'n pytt,

ha ty a verow del verow an re yw ledhys

yn kolonn an moryow.

9A leverydh hwath, ‘My yw duw’,

yn golok an re a'th ladh?

Mes ty yw den a-der duw

y'n leuv an re a'th ladh.

10Ty a verow del verow an re antrodreghys

yn leuv estrenyon;

rag my re gewsis, yn-medh an Arloedh Duw.

Galargan war Vyghtern Tyr

11Ger an Arloedh a dheuth dhymm, ow leverel: 12Mab den, drehav galargan war vyghtern Tyr, ha lavar dhodho, Yndellma y lever an Arloedh Duw:

Ty o an sel a berfydhder,

leun a furneth, perfydh yn tekter.

13Yth eses yn Eden, lowarth Duw;

pub men drudh o dha gudhans,

rubi, topaz, ha gwyrven,

owrven, onyks, ha yasper,

saffir, garnet, ha beryl.

Ober a owr o dha settyansow28:13 settyansow: Amendys. Ebrow tabourigow. ha'th gravyansow ynnos;

y'n jydh may feus formys

y fons parys.

14Gans cherub untys avel gwithyas my a'th settyas;

yth eses war venydh sans Duw

ow kerdhes yn mysk meyn a dan.

15Ty o divlam yn oll dha fordhow

a-dhia'n jydh may feus formys

bys pan veu anewnder kevys ynnos.

16Yn lanwes dha genwerth

i a lenwis an kres ahanas gans garowder, ha ty a beghas.

Ytho my a'th tewlis avel tra ansans dhiworth menydh Duw,

ha'n cherub esa ow kwitha a'th chasyas yn-mes

dhiworth kres an meyn a dan.

17Dha golonn o goethus y'th tekter,

ty a dhefolas dha furneth drefenn dha splannder.

Ytho my a'th tewlis dhe'n dor,

my a'th worras a-rag myghternedh,

dhe vires warnas gans skorn.

18Y'th lies kammhynseth,

yn anewnder dha genwerth,

ty a dhisakras dha sentris.

Ytho my a dhros tan yn-mes dhiworthis;

ev a'th tybris,

ha my a'th treylyas dhe lusu war an dor

yn golok pubonan a'th welas.

19Oll an kenedhlow a'th aswonnis

a gemmeras skruth orthis;

ty re dheuth dhe browagh tromm

ha ny vydhydh nevra namoy.

Profoesans erbynn Sidon

20Ger an Arloedh a dheuth dhymm, ow leverel: 21Mab den, treyl dha fas troha Sidon, ha profoes er hy fynn, 22ha lavar, Yndellma y lever an Arloedh Duw:

Otta, yth esov er dha bynn, A Sidon,

ha my a vydh enorys a-berth ynnos.

I a woer my dhe vos an Arloedh

pan wrav breusow ynni,

ha my a vydh sanshes ynni.

23My a dhannvon plag ynni

ha goes yn hy stretys.

An re ledhys a goedh a-berth ynni,

gans an kledha er hy fynn a-derdro.

Ena i a woer my dhe vos an Arloedh.

24Ny'n jevydh chi Ysrael na fella spedhas dh'aga gwana na spern dh'aga fystiga yn mysk oll aga hentrevogyon, a wre aga despitya. Ena i a woer my dhe vos an Arloedh Duw.

Bennath war Ysrael y'n Termyn a Dheu

25Yndellma y lever an Arloedh Duw: Pan guntellav chi Ysrael dhiworth an poblow le mayth esens skattrys, my a vydh sanshes ynna yn golok an kenedhlow. Ena i a drig war aga thiredh aga honan, a res vy dhe'm gwas Yakob. 26I a drig ynno yn sawder, ha drehevel chiow, ha plansa gwinlannow; i a drig yn sawder pan wrav breusow war oll aga hentrevogyon a's dispres. Ena i a woer my dhe vos an Arloedh aga Duw.