Profoesans erbynn Ejyp

1Y'n degves blydhen, y'n degves mis, yn dewdhegves dydh an mis, ger an Arloedh a dheuth dhymm, ow leverel: 2Mab den, treyl dha fas erbynn Faro myghtern Ejyp, ha profoes er y bynn hag erbynn oll Ejyp. 3Kows ha lavar, Yndellma y lever an Arloedh Duw:

Otta, yth esov er dha bynn,

A Faro myghtern Ejyp,

an dhragon vras ow krowedha

yn mysk hy avonyow,

neb a leveris dhymm, ‘Dhymmo vy yw ow Nil;

my a'n gwrug ragov vy ow honan.’

4Mes my a worr higow y'th tiwen

ha gul dhe buskes dha avonyow glena orth dha skans.

My a'th tre yn-bann yn-mes a'th avonyow,

gans oll puskes dha avonyow

ow klena orth dha skans.

5My a'th as, tewlys y'n difeythtir,

ty hag oll puskes dha avonyow.

Ty a goedh war an gwel,

ha ny vydhydh kuntellys nag ynkleudhys.

My a'th re dhe vestes an gwel

ha dhe ydhyn an nev rag boes.

6Ena oll trigoryon Ejyp a woer

my dhe vos an Arloedh,

rag ty re beu lorgh a gorsenn

dhe ji Ysrael.

7Pan y'th talghennsons er dha leuv ty a veu terrys,

ha ty a skwardyas oll aga skoedhow;

ha pan boessons warnas ty a veu terrys

ha gul dhe oll aga diwglun krena.

8Rakhenna yndellma y lever an Arloedh Duw: Awottavy ow tri kledha er dha bynn, ha treghi dhiworthis den ha best. 9Pow Ejyp a vydh ynyalder ha difeyth. Ena i a woer my dhe vos an Arloedh.

Rag ty dhe leverel, ‘An avon yw dhymm, ha my a's gwrug’, 10rakhenna otta, yth esov er dha bynn, hag erbynn dha avonyow, ha my a wra pow Ejyp ynyal kowal ha difeyth, dhiworth Migdol dhe Syene, bys yn or Ethiopia. 11Ny dremen dresto troes den, na ny dremen dresto troes best; ny vydh annedhys dewgens blydhen. 12My a wra pow Ejyp ynyalder yn mysk powyow ynyal, ha'y sitys a vydh difeyth dewgens blydhen yn mysk sitys difeyth; ha my a skatter Ejyp y'n kenedhlow, ha'ga lesa y'n powyow.

13Rag yndellma y lever an Arloedh Duw: Orth diwedh dewgens blydhen my a guntell Ejyp dhiworth an poblow le mayth ens skattrys 14My a dreyl kethneth Ejyp, ha'ga dri arta dhe dir Pathros, dhe dir aga dallethvos, hag y fydhons ena ruvaneth isel. 15Hi a vydh isella a'n ruvanethow, ha ny omughelha arta a-ugh an kenedhlow. My a's tanowha ma na rewllyons an kenedhlow arta. 16Ny wra chi Ysrael fydhya ynna arta; i a berth kov a'ga hammweyth pan dreylsons dhedha rag gweres. Ena i a woer my dhe vos an Arloedh Duw.

Ejyp a vydh Pyllys gans Babylon

17Y'n seythves blydhen warn ugens, yn kynsa dydh an mis, ger an Arloedh a dheuth dhymm, ow leverel: 18Mab den, Nebukadnessar myghtern Babylon a wrug dh'y lu lavurya yn krev erbynn Tyr; pub penn o bloghhes, ha pub skoedh o rutys lomm. Mes ny veu gwayn dhodho ev na dh'y lu rag y lavur erbynn Tyr. 19Rakhenna yndellma y lever an Arloedh Duw: Awottavy ow ri pow Ejyp dhe Nebukadnessar myghtern Babylon; ev a dheg hy rychys dhe-ves, ha kemmeres hy freydh, ha'y fylla; y fydh gober y lu. 20My re ros dhodho pow Ejyp yn attal rag y ober a wrug, rag i a lavuryas ragov vy, yn-medh an Arloedh Duw.

21Y'n jydh na y hwrav dhe gorn skylla rag Ysrael, ha my a re dhis ganow igor yn aga mysk. Ena i a woer my dhe vos an Arloedh.