1Yn-medh ev dhymm, A vab den, deber an pyth a gevydh; deber an rol-skrifa ma, ha ke, kows dhe ji Ysrael. 2Ytho my a igeris ow ganow, hag ev a wrug dhymm dybri an rol-skrifa ma. 3Hag yn-medh ev dhymm, A vab den, gwra dhe'th torr dybri, ha lanw dha groth a'n rol-skrifa ma esov ow ri dhis. Ytho my a's dybris hag y feu y'm ganow maga hweg avel an mel.

4Ena yn-medh ev dhymm, A vab den, ke, deus dhe ji Ysrael ha kows gans ow geryow dhedha. 5Rag nyns os dannvenys dhe bobel a yeth estren ha taves kales, mes dhe ji Ysrael, 6a-der dhe boblow pals a yeth estren ha taves kales, ma na gonvedhydh aga geryow. Mara'th tannvonnen dhedha, i a woslowsa dhis. 7Mes chi Ysrael ny vynn goslowes orthis, rag ny vynnons goslowes orthiv vy, drefenn oll chi Ysrael dhe vos penn-kales ha gorth a golonn. 8Awotta my re wrug dha fas dhe vos kales kepar ha'ga fasow i, ha'th tal dhe vos kales kepar ha'ga thal i. 9Avel adamant kreffa ages kellester, re wrugavy dha dal. Na borth own anedha, na bos digolonnek drefenn aga fasow, rag chi diwostydh yns i. 10Hag yn-medh ev dhymm: Mab den, oll an geryow a gowsav orthis, kemmer i y'th kolonn, ha'ga klewes gans dha dhiwskovarn. 11Ha ke, deus dhe'n dhivresow, dhe vebyon dha bobel, ha kows orta. Lavar dhedha, ‘Yndellma y lever an Arloedh Duw’, mar koslowons po mar skonyons.

Ezekiel orth an avon Kebar

12Ena an Spyrys a'm drehevis, ha my a glewas a-dryv dhymm son grommyans bras, pan sevis glori an Arloedh3:12 pan sevis glori an ARLOEDH: Amendys. Ebrow Benniges re bo glori an ARLOEDH. a'y le, 13ha son eskelli an kreaturs bew ow tochya an eyl dh'y ben, ha son an rosow rybons, ha son grommyans bras. 14Ena an spyrys a'm drehevis hag a'm kemmeras, ha gyllys veuv yn hwerowder, yn sorr ow spyrys, ha leuv an Arloedh o krev warnav. 15My a dheuth dhe Tel-abib, dhe'n dhivresow trigys ryb an avon Kebar; hag ena, y'n tyller mayth esens trigys, my a esedhas seyth dydh dyegrys yn aga mysk.

16Dhe benn seyth dydh, ger an Arloedh a dheuth dhymm, ow leverel: 17Mab den, my re'th wrug goelyador rag chi Ysrael; peskweyth may klewydh ger dhiworth ow ganow, ty a re dhedha gwarnyans dhiworthiv. 18Pan lavarav dhe'n tebelwas, ‘Ty a verow yn tevri’, ha ny redh dhodho gwarnyans, na kewsel dhe warnya tebelwas dhe dreylya dhiworth y fordh dhrog may sawyo y vewnans, an tebelwas na a verow yn y anewnder, mes y woes y hwilav a'th leuv. 19Mes mar kwarnydh an tebelwas, ha ny dreyl dhiworth y sherewynsi ha'y fordh dhrog, ev a verow yn y anewnder, mes ty a dhelirv dha enev. 20Ha mar treyl den gwiryon dhiworth y ewnder ha gul drog, my a worr men a drebuchya a-ragdho; ev a verow. Drefenn na'n gwarnsys, ev a verow yn y begh. Ny vydh kovhes y wiryonedh re wrug; mes y woes a hwilav a'th leuv. 21Mes mar kwarnydh den gwiryon rag na beggho, ha ny begh, y few yn tevri, rag ev dhe vos gwarnyes, ha ty a dhelirv dha enev.

Duw a Lett Ezekiel rag Profoesa

22Yth esa leuv an Arloedh warnav eno; hag ev a leveris dhymm, Sav ha ke yn-mes dhe'n nans, hag eno my a gews genes. 23Ytho my a sevis ha mos yn-mes dhe'n nans. Hag awotta glori an Arloedh ow sevel ena, kepar ha'n glori a welis ryb an avon Kebar, ha my a goedhas war ow fas. 24Ena an Spyrys a entras dhymm ha'm settya war ow threys, ha kewsel orthiv, ha leverel dhymm, Ke, dege dha honan a-bervedh y'th chi. 25Ha ty, A vab den, i a worr warnas lovonow, ha'th kelmi gansa, ma na ylli mos yn-mes yn aga mysk. 26My a wra dhe'th taves glena orth dha stevnik, may fydhydh avlavar, ha ny yllydh aga heredhi; rag chi diwostydh yns i. 27Mes pan gowsav orthis, my a iger dha anow, ha ty a lever dhedha, ‘Yndellma y lever An Arloedh Duw.’ Ev neb a glew, klewes; hag ev neb a skon, skonys; rag chi diwostydh yns i.