Kynvann war Ejyp

1Ger an Arloedh a dheuth dhymm, ow leverel: 2Mab den, profoes ha lavar, Yndellma y lever an Arloedh Duw:

Kynewgh, ‘Ellas rag an jydh!’

3Rag ogas yw an jydh,

ogas yw dydh an Arloedh;

y fydh dydh a gommol,

prys breus an kenedhlow.

4Kledha a dheu erbynn Ejyp,

hag y fydh angoes yn Ethiopia,

pan goedh an re ledhys yn Ejyp;

i a gemmer hy rychys dhe-ves,

ha'y selyow a vydh terrys dhe'n dor.

5Ethiopia, ha Put, Lud hag oll Arabia, Libya ha mebyon pow an kevambos a goedh war-barth gansa der an kledha.

6Yndellma y lever an Arloedh:

An re a skoedh Ejyp a goedh,

ha goeth hy galloes a dhiyskynn;

dhiworth Migdol dhe Syene

i a goedh ynni der an kledha,

yn-medh an Arloedh Duw.

7I a vydh dibobel yn mysk powyow ynyal

ha'y sitys a vydh yn mysk sitys gwastys.

8Ena i a woer my dhe vos an Arloedh,

pan worrav tan yn Ejyp,

hag oll hy gweresoryon a vydh terrys.

9Y'n jydh na kannasow a yn-mes dhiworthiv yn gorholyon dhe ownekhe Ethiopia dhibreder, hag y fydh kren ynna yn dydh Ejyp, rag otta, ev a dheu.

10Yndellma y lever an Arloedh Duw:

My a wra dhe routh Ejyp hedhi

dre leuv Nebukadnessar myghtern Babylon.

11Ev ha'y bobel ganso, an fella a'n kenedhlow,

a vydh dres dhe bylla an pow,

I a denn aga kledhedhyow erbynn Ejyp,

ha lenwel an pow a'n re ledhys.

12My a wra an avonyow sygh,

ha gwertha an pow yn leuv an debeles,

ha gwastya an pow ha pup-tra eus ynno

dre leuv estrenyon;

my, an Arloedh, re gewsis.

13Yndellma y lever an Arloedh Duw:

My a dhistru idolys

ha ri diwedh dhe'n imajys yn Nof.30:13 Nof: Honn yw Memfis.

Ny vydh na fella pennsevik yn pow Ejyp;

ha my a worr own yn pow Ejyp.

14My a wra Pathros ynyal,

ha gorra tan yn Soan

ha gul breusow yn No.30:14 No: Honn yw Thebes.

15My a dhiver ow sorr war Sin,30:15 Sin: Honn yw Pelusium.

skons Ejyp,

ha treghi dhe-ves an routh a No.

16My a worr tan yn Ejyp,

Sin a omwen yn payn;

Fos No a vydh folsys,

hag y fydh dhe No ahwer pub dydh.

17Gwer yowynk On ha Pi-beseth30:17 On ha Pi-beseth: On yw Heliopolis, Pi-beseth yw Bubastis. a goedh der an kledha,

hag yth ons an sitys na yn kethneth.

18Yn Tahpanhes an jydh a dewl,

pan dorrav ternwelennow30:18 ternwelennow: Amendys war-lergh an Septuagint ha'n Vulgat. Ebrow yewow. Ejyp eno,

ha goeth hy nerth dheu dhe dhiwedh ynni;

kommolenn a's kudh,

hag yth a hy vyrghes yn kethneth.

19My a wra breusow yn Ejyp,

hag i a woer my dhe vos an Arloedh.

Profoesans erbynn Faro

20Y'n unnegves blydhen, y'n kynsa mis, yn seythves dydh an mis, ger an Arloedh a dheuth dhymm, ow leverel, 21Mab den, my re dorras bregh Faro myghtern Ejyp, hag otta nyns yw kelmys rag yaghheans na nyns yw lystennys dh'y gelmi may fo krev lowr dhe synsi kledha. 22Rakhenna yndellma y lever an Arloedh Duw: Awottavy erbynn Faro, myghtern Ejyp. My a derr y breghow krev, an bregh krev ha'n bregh terrys, ha gul dhe'n kledha koedha dhiworth y leuv. 23My a skatter Ejyp y'n kenedhlow ha'ga lesa der an powyow. 24My a grevha breghow myghtern Babylon ha gorra ow kledha yn y leuv; mes my a derr breghow Faro, hag i a gyn a-ragdho kepar dell gyn den ledhys. 25My a grevha breghow myghtern Babylon, mes breghow Faro a goedh. Ena i a woer my dhe vos an Arloedh, pan worrav ow kledha yn leuv myghtern Babylon, hag ev a'n ystynn erbynn pow Ejyp. 26My a skatter Ejyp y'n kenedhlow ha'ga lesa der an powyow. Ena i a woer my dhe vos an Arloedh.