Ezekiel Goelyador Ysrael

1Ger an Arloedh a dheuth dhymm, ow leverel: 2Mab den, kows dhe vebyon dha bobel, ha leverel dhedha, Pan dhrov kledha war neb tir, mar kemmer pobel a'n tir na neb unn gour a-dhiworth aga oryon ha'y wul goelyador ragdha; 3ha mar kwel ev an kledha ow tos war an tir, ha hwytha an hirgorn, ha gwarnya an bobel, 4ena piwpynag a glewo son an hirgorn heb goslowes an gwarnyans, pan dheu an kledha dh'y gemmeres, y woes a vydh war y benn y honan. 5Ev a glewas son an hirgorn ha ny woslowas an gwarnyans; y woes a vydh warnodho y honan, mes mar koslowas an gwarnyans, ev a saw y vewnans. 6Mes mar kwel goelyador an kledha ow tos ha ny hwyth an hirgorn, ha nyns yw an bobel gwarnyes, ha'n kledha a dheu ha kemmeres nebonan dhiworta, y fydh an den na kemmerys dhe-ves yn y gammhynseth, mes y woes a wovynnav orth leuv an goelyador.

7Ytho ty, A vab den, my a'th wra goelyador rag chi Ysrael; ytho peskweyth may klewydh ger dhiworth ow ganow, ty a re dhedha gwarnyans dhiworthiv. 8Pan lavarav dhe debelwas, ‘Tebelwas, ty a verow surredi’, ha ny gewsydh dhe warnya an tebelwas dhe dreylya dhiworth y fordh, an tebelwas a verow yn y gammhynseth, mes y woes a wovynnav orth dha leuv. 9Mes mar redh gwarnyans dhe'n tebelwas dhe dreylya dhiworth y fordh, ha ny dreyl dhiworth y fordh, ena ev a verow yn y gammhynseth, mes ty re sawyas dha enev.

Fordh Duw yw Ewn

10Ha ty, A vab den, lavar dhe ji Ysrael, Yndella y leversowgh, ‘Beghys on i gans agan kammweythresow ha'gan peghosow, ha ni a wra pedri ynna: ytho fatell vewyn?’ 11Lavar dhedha, Dell vewav, yn-medh an Arloedh Duw, nyns eus dhymm plesour yn mernans an tebelwas, mes may treyllyo tebelwas dhiworth y fordh ha bewa. Treylyewgh! Treylyewgh dhiworth agas drog fordhow; prag y ferwowgh, chi Ysrael? 12Ha ty, A vab den, lavar dhe vebyon dha bobel, Ny wra ewnder an ewnhynsek y sawya yn dydh y gammweythres, ha ny wra droktra an tebelwas gul dhodho trebuchya y'n jydh may treyl dhiworth y gammweythres, ha ny yll an den ewnhynsek bewa yn y ewnder y'n jydh may beggho. 13Pan lavarav dhe wiryon ev dhe vewa sur, mar trest yn y wiryonedh ha gul sherewneth, ena ny vydh kovhes oll y wiryonedh; mes yn y sherewneth a wrug, ev a verow. 14Ha pan lavarav dhe debelwas, ‘Ty a verow surredi’, hag ev a dreyl dhiworth y begh ha gul an pyth yw lafyl hag ewn, 15– mar taskorr an tebelwas gaja, hag attyli an pyth ledrys, ha kerdhes yn ordenansow bewnans heb gul anewnder – ev a vew yn surredi, ha ny verow. 16Ny vydh kovhes er y bynn oll an peghosow re wrug ev. Ev re wrug an pyth yw lafyl hag ewn; ev a vew yn surredi.

17Mebyon dha bobel a lever, ‘Fordh an Arloedh nyns yw ewn’, pan nag yw ewn aga fordh i. 18Pan dreyllyo an den gwiryon dhiworth y ewnder ha gul kammweythres, ena y ferow ynno. 19Pan dreyllyo an tebelwas dhiworth y debelwrians ha gul an pyth yw lafyl hag ewn, ev a vew ynno. 20Hwi a lever, ‘Fordh an Arloedh yw anewn.’ Mes my a vreus pubonan herwydh y fordhow, A ji Ysrael.

Koedh Yerusalem

21Y'n dewdhegves blydhen a'gan divroedh, y'n unnegves mis, yn pympes dydh an mis, dianker dhiworth Yerusalem a dheuth dhymm, ow leverel, ‘An sita yw gweskys.’ 22Leuv an Arloedh a veu warnav gorthugherweyth kyns dos an dianker; mes ev re igorsa ow ganow erbynn an termyn may teuth dhymm myttin; ytho ow ganow o igerys, ha nyns en vy avlavar na fella.

23Ger an Arloedh a dheuth dhymm, ow leverel: 24Mab den, an re trigys y'n magoryow na yn pow Ysrael a lever, ‘Abraham o onan hag ev a eritas an tir, mes ni yw lies, dhyn ni re beu an tir res avel eretons.’ 25Rakhenna, lavar dhedha, Yndellma y lever an Arloedh Duw: Hwi a dheber kig gans an goes, ha drehevel agas dewlagas dh'agas idolys, ha skoellya goes. A eritowgh an tir? 26Hwi a drest yn agas kledha, hwi a wra taklow kasadow, ha pubonan a dhefol benyn y gentrevek. A eritowgh an tir? 27Yndellma y leverydh dhedha, Yndellma y lever an Arloedh: Dell vewav, an re trigys y'n magoryow a goedh der an kledha; ha neb eus y'n gwel a rov dhe'n bestes dhe vos dybrys; ha'n re usi yn skonsow hag yn fowys a verow der an pla. 28My a wra an tir ynyalder ha difeythtir, hag y fydh diwedh dh'y nerth goethus; menydhyow Ysrael a vydh ynyal heb tremenyas. 29Ena i a woer my dhe vos an Arloedh, pan wrav an tir ynyalder ha difeythtir rag oll aga thaklow kasadow re wrussons.

30Ha ty, A vab den, mebyon dha bobel a geskews a-dro dhis ryb an fosow hag orth darasow an chiow, ow leverel an eyl dh'y gila, pubonan dh'y gentrevek, ‘Dewgh, ha klewewgh pyth yw an ger dhiworth an Arloedh.’ 31I a dheu dhis, kepar dell yw usadow an bobel dhe wul, hag i a esedh a-ragos, ha klewes dha eryow, mes ny wrons war aga lergh. Rag yma gowyow33:31 gowyow: Ow siwya an Septuagint. Ebrow lustys. yn aga ganow, hag yma aga holonn ow mos war-lergh aga gwayn anewn. 32Nyns osta dhedha marnas kaner a ganow kerensa gans lev teg, ha nebonan a sen daffar menestrouthi yn ta; i a glew dha eryow, heb aga gul. 33Pan dheu hemma – hag a teu yn surredi – i a woer y feu profoes yn aga mysk.