Bugeledh Fals

1Ger an Arloedh a dheuth dhymm, ow leverel, 2Mab den, profoes erbynn bugeledh Ysrael, profoes ha lavar dhedha – dhe'n vugeledh: Yndellma y lever an Arloedh Duw: Go-hwi bugeledh Ysrael, re beu ow maga aga honan! a ny dal an vugeledh maga an deves? 3Hwi a dheber an blonek, hag omwiska y'n gwlan, ha ladha an re peskys, mes ny vugelsowgh an deves. 4Ny wrussowgh krevhe an deves gwann, na yaghhe an re klav, na kelmi an re brew; ny dhresowgh dhe-dre an re a wandras yn sowdhan, na ny hwilsowgh an re kellys, mes gans nerth hwi re's rewlyas, ha gans garowder. 5Skattrys vons, heb bugel; i a veu boes rag oll bestes an gwel. 6Ow deves eth yn stray war oll an menydhyow, ha war pub bronn ughel; ow deves a veu skattrys war oll enep an nor, ha nagonan ny's hwilas na hwithra.

7Rakhenna, bugeledh, klewewgh ger an Arloedh: 8Dell vewav, yn-medh an Arloedh Duw, drefenn bos ow deves preydh, ha drefenn bos ow deves boes dhe bub best an gwel, heb bugel, ha ny wrug ow bugeledh hwilas ow deves, mes an vugeledh a vagas aga honan, heb maga ow deves, 9rakhenna, bugeledh, klewewgh ger an Arloedh: 10Yndellma y lever an Arloedh Duw: Ottavy erbynn an vugeledh, ha my a hwila ow deves dhiworth aga leuv, ha'ga lettya rag bugelya deves; ny wra an vugeledh maga aga honan arta. My a saw ow deves dhiworth aga ganow, ma na vons boes ragdha na fella.

Duw, An Bugel Da

11Rag yndellma y lever an Arloedh Duw: Ottavy, my ow honan, ow hwilas ow deves ha'ga hwithra. 12Kepar dell wra bugel hwithra y flokk pan usi ev yn mysk y dheves skattrys, yndella my a hwither ow deves vy ha'ga delivra a-dhiworth oll an tylleryow mayth yns skattrys yn dydh a gommol ha tewlder tew. 13My a's dre yn-mes a'n poblow, ha my a's kuntell yn-mes a'n gwlasow, ha'ga hembronk a-berth yn aga thir aga honan; ha my a wra aga maga war venydhyow Ysrael, ryb goverow, hag yn oll trigvaow an tir. 14My a's mag yn peurva dha, ha war venydhyow ughel Ysrael y fydh aga frasow. I a wrowedh yn peurva dha, hag yn prasow rych i a vydh megys war venydhyow Ysrael. 15My ow honan a vydh bugel ow deves, ha my a wrav dhedha growedha, yn-medh an Arloedh Duw. 16An re kellys a hwilav, ha'n re gyllys yn stray a dhrov dhe dre, ha'n re terrys a golmav, ha'n re wann a grevhav; mes an re dew ha'n re grev my a dhistru. My a's mag gans breus.

17Ha hwi, ow deves, yndellma y lever an Arloedh Duw: Ottavy ow preusi ynter unn dhavas ha davas arall, yntra hordhes ha boghes. 18A nyns yw lowr ragowgh, hwi dhe dhybri an beurva dha, mes hwi a drett yn-dann agas treys remenant agas peurva ynwedh? ha hwi dhe eva dowr kler, ha gul an remenant leysek gans agas treys? 19A dheber ow deves an pyth a veu trettys gans agas treys, hag eva an pyth o gwrys leysek gans agas treys?

20Rakhenna yndella y lever dhedha an Arloedh Duw: Ottavy, my ow honan, ow preusi ynter an deves tew ha'n deves tanow. 21Rag hwi dhe herdhya gans tenewen ha skoedh, ha kornya gans agas kern oll an re gwann, bys pan wrussowgh aga skattra dhe-ves, 22my a saw ow flokk, ha ny vydhons preydh na fella; ha my a vreus yntra davas ha davas.

23My a dhrehav warnedha unn bugel, ow gwas Davydh, hag ev a's mag; ev a's mag, ha bos dhedha bugel. 24My, an Arloedh, a vydh Duw dhedha, ha'm gwas Davydh a vydh pennsevik yn aga mysk. My, an Arloedh, re gewsis.

25My a wra kevambos kres gansa, ha pellhe drog vestes dhiworth an tir, hag i a drig y'n difeythtir yn sawder, ha koska y'n koeswigow. 26My a wra dhedha i ha'n tylleryow a-dro dhe'm bre bos bennath; ha my a dhannvon glaw yn-nans yn y seson; i a vydh kowasow a vennath. 27Gwydh an gwel a re aga froeth, ha'n tir a re y askorr. I a vydh saw yn aga thir; hag i a woer my dhe vos an Arloedh, pan dorrav barrys a'ga yew, ha'ga sawya dhiworth leuv an re a's kethhas. 28Ny vydhons na fella preydh rag an kenedhlow, ha ny wra bestes an tir aga devorya; mes i a drig yn sawder ha nagonan ny worr own ynna. 29My a brovi ragdha tyller gerys-da rag plansa, ha ny vydhons kemmerys arta gans divoetter y'n tir, na berthi arta despit a'n kenedhlow. 30Ena i a woer my, an Arloedh aga Duw, dhe vos gansa, hag i, chi Ysrael, dhe vos ow fobel,34:30 ow fobel: Amendys war-lergh an Septuagint. Ebrow ow fobel, hwi densys. yn-medh an Arloedh Duw. 31Hwi yw ow deves, deves ow feurva; my yw agas Duw, yn-medh an Arloedh Duw.