Breus erbynn Menydh Seir

1Ger an Arloedh a dheuth dhymm, ow leverel, 2Mab den, sett dha fas erbynn menydh Seir, ha profoes er y bynn, 3ha lavar dhodho, Yndellma y lever an Arloedh Duw:

Ottavy er dha bynn, A venydh Seir,

ha my a ystynn ow leuv er dha bynn,

ha'th wul difeyth hag ynyal.

4My a wra dha sitys magoryow,

ha ty a vydh difeyth,

ha ty a woer my dhe vos an Arloedh.

5Drefenn bos dhis eskarogeth bythkwethek, ha ty re dhelivras mebyon Ysrael dhe nerth an kledha yn termyn aga therroes, yn termyn aga hessydhyans finek, 6rakhenna, dell vewav, yn-medh an Arloedh Duw, my a'th dhaskorr dhe woes, ha goes a'th helgh; drefenn na wrussys kasa goes, goes a'th helgh. 7My a wra menydh Seir ynyalder ha difeyth, ha my a dregh dhiworto pubonan eus ow tos hag ow mos. 8My a lenow y venydhyow a'y re ledhys; an re ledhys gans an kledha a goedh y'th vrennow ha'th nansow, hag yn oll dha woverow. 9My a'th wra ynyalder bys vykken, ha ny vydh dha sitys annedhys. Ena hwi a woer my dhe vos an Arloedh.

10Drefenn ty dhe leverel, ‘An dhiw genedhel ma ha'n dhew bow ma yw dhymmo vy, ha ni a's erit’, kyn feu an Arloedh ena, 11rakhenna, dell vewav, yn-medh an Arloedh Duw, my a'th tyght war-lergh dha sorr ha war-lergh dha avi a dhiskwedhsys, drefenn dha gas er aga fynn; ha my a vydh aswonnys yntredha pan wrav dha vreusi. 12Ha ty a woer y hwrugavy, an Arloedh, klewes oll dha vlasfemiow a gewssys erbynn menydhyow Ysrael, ow leverel, ‘Wastys yns; i re beu res dhyn dhe dhevorya.’ 13Hwi a vostyas er ow fynn gans agas ganow, ha kressya agas geryow er ow fynn; my a'n glewas. 14Yndellma y lever an Arloedh Duw: Pan lowenha oll an norvys, my a'th wra ynyalder. 15Kepar dell lowenhasys erbynn eretons chi Ysrael, drefenn y vos ynyalder, yndella my a wra dha dhyghtya; ty a vydh ynyalder, menydh Seir, hag Edom kowal. Ena i a woer my dhe vos an Arloedh.