Nans an Eskern Sygh

1Yth esa warnav leuv an Arloedh, hag ev a'm dug mes yn spyrys an Arloedh, ha'm settya yn kres an nans; y feu leun a eskern. 2Hag ev a wrug dhymm tremena dresta a-derdro. Hag otta, fest lies ens i war enep an nans, ha pur sygh ens. 3Ha dhymmo y leveris, ‘A vab den, a yll an eskern ma bewa?’ Yn-medhav, ‘Arloedh Duw, ty a woer.’ 4Ev a leveris dhymm, ‘Gwra profoesa war an eskern ma, ha lavar dhedha: A hwi eskern sygh, klewewgh ger an Arloedh. 5Yndellma y lever an Arloedh Duw dhe'n eskern ma: Otta, my a dhre anall ynnowgh, ha hwi a vew. 6Ha my a worr warnowgh giow, ha gul kig dhe devi warnowgh, ha'gas kudha gans kneus; ha my a worr ynnowgh anall ha hwi a vew. Ena hwi a woer my dhe vos an Arloedh.’

7Ytho my a brofoesas, kepar dell veu erghys dhymm. Ena y feu tros, ha my ow profoesa, hag otta son rugla, ha'n eskern a dheuth war-barth, an eyl askorn dh'y gila. 8My a viras, hag otta giow ha kig a dheuth yn-bann warnedha, ha kneus a's kudhas a-wartha, saw ynna nyns esa anall. 9Ev a leveris dhymm, ‘Profoes dhe'n anall, gwra profoesa, A vab den, ha lavar dhe'n anall: Yndellma y lever an Arloedh Duw: Deus dhiworth an peswar gwyns, A anall, hag anella war an dus ledhys ma, may fons bew.’ 10Ytho my a brofoesas kepar dell erghis dhymm, ha'n anall a dheuth a-berth ynna, hag i a wrug bewa, ha sevel war aga threys, lu fest bras.

11Ena yn-medh ev dhymm, ‘A vab den, an eskern ma yw chi Ysrael oll yn tien. Otta, i a lever, “Sygh yw agan eskern, ha kellys yw agan govenek. Treghys dhe-ves on ni.” 12Rakhenna gwra profoesa ha leverel dhedha, Yndellma y lever an Arloedh Duw: Otta, yth esov owth igeri agas bedhow, ha my a'gas drehav mes a'gas bedhow, ow fobel vy, ha'gas dri bys yn pow Ysrael. 13Ha hwi a woer my dhe vos an Arloedh, pan igorav agas bedhow, ha pan y'gas drehavav mes a'gas bedhow, ow fobel. 14Ha my a worr ow spyrys ynnowgh, ha hwi a vew, ha my a'gas sett yn agas tiredh agas honan. Ena hwi a woer my, an Arloedh, dhe gewsel, ha my a'n kollenow’, yn-medh an Arloedh.

An Dhew Brenn

15Ger an Arloedh a dheuth dhymm, ow leverel, 16Ha ty, A vab den, kemmer dhis dha honan unn prenn ha skrif warnodho, ‘Rag Yuda, ha rag mebyon Ysrael y gowetha.’ Ena kemmer unn prenn arall ha skrif warnodho, ‘Rag Yosep, prenn Efraym, ha rag oll chi Ysrael y gowetha.’ 17Ha gwra aga junya an eyl gans y gila dhe vos unn prenn, may fons onan y'th leuv. 18Pan wra mebyon dha bobel leverel dhis, ‘A ny dhiskwedhydh dhyn pyth yw styr hemma?’ 19lavar dhedha, Yndellma y lever an Arloedh Duw: Otta, my a gemmer prenn Yosep usi yn leuv Efraym, ha loethow Ysrael y gowetha ha'ga junya gans prenn Yuda ha'ga gul dhe vos unn prenn, hag i a vydh onan y'm leuv. 20Y fydh an prennyer, may skrifydh warnedha, a-rag aga dewlagas. 21Lavar dhedha, Yndellma y lever an Arloedh Duw: Ottavy ow kemmeres mebyon Ysrael yn-mes a'n kenedhlow mayth ethons, ha my a's kuntell a bub tu, ha'ga dri dh'aga thiredh aga honan. 22My a's gwrav unn genedhel y'n tir war venydhyow Ysrael, hag unn myghtern a vydh myghtern dhedha i oll, ha ny vydhons arta diw genedhel. 23Ny omdhefolons nevra namoy gans aga idolys, na gans aga thaklow kasadow, na gans oll aga threuspassow. My a's saw dhiworth oll aga gwriansow dislel may peghsons ynna, ha'ga glanhe. Ena i a vydh ow fobel, ha my a vydh aga Duw.

24Ow gwas Davydh a vydh myghtern warnedha, hag y fydh unn bugel dhedha i oll. I a gerdh war-lergh ow breusow, ha gwaytyas gwitha ow ordenansow. 25I a drig y'n tir a res vy dhe'm gwas Yakob, mayth esa agas tasow trigys ynno. I ha'ga mebyon, ha mebyon aga mebyon a drig ynno bys vykken, ha Davydh ow gwas a vydh pennsevik dhedha bys vynitha. 26My a wra gansa kevambos kres; y fydh kevambos gansa bys vykken. My a's fastyav ha'ga moghhe, ha my a worr ow sentri yn aga mysk bys vynnari. 27Ow thrigva a vydh gansa; my a vydh aga Duw, hag i a vydh ow fobel. 28Ena an kenedhlow a woer my, an Arloedh, dhe sanshe Ysrael, pan vydh ow sentri yn aga mysk bys vykken.