Profoesans erbynn Gog

1Ger an Arloedh a dheuth dhymm, ow leverel: 2Mab den, sett dha fas erbynn Gog, tir Magog, chyf pennsevik Meshek ha Tubal, ha profoes er y bynn, 3ha lavar: Yndellma y lever an Arloedh DUW: Otta, yth esov er dha bynn, A Gog, chyf pennsevik Meshek ha Tubal. 4My a'th treyl a-dro ha gorra higow y'th tiwen, ha'th tri yn-mes gans oll dha lu, mergh ha marghogyon, i oll gwiskys yn arvwisk leun, kowethas bras, i oll gans boklers ha skoesow, i oll ow synsi kledhedhyow. 5Yma Persia hag Ethiopia gansa, i oll gans skoesow ha basnettow; 6Gomer hag oll y luyow, chi Togarma dhiworth an gledhbarth pell, gans oll y luyow, ha genes poblow pals.

7Ombareus ha bydh parys, ti hag oll dha guntelles yw kuntellys dhis, ha bydh gwithyas dhedha. 8Wosa lies dydh y fydhydh gelwys. Yn blydhynyow a dheu yth edh erbynn tir yw restorys wosa bresel, gans lies pobel kuntellys war venydhyow Ysrael, hirneth re bia difeyth; y bobel a veu dres yn-mes dhiworth an poblow, ha lemmyn i oll yw trigys yn sawder. 9Ty a yskynn, ow tos yn-rag avel annawel, kepar ha kommolenn ow kudha an tir, ty ha'th luyow, ha genes poblow pals.

10Yndellma y lever an Arloedh Duw: Y'n jydh na prederow a dheu y'th vrys, ha ty a bareus towlenn dhrog. 11Ty a lever, ‘Yth av yn-bann erbynn tir a drevow heb fosow; my a dheu erbynn an dus kosel, trigys yn sawder, i oll trigys heb fosow, heb barrys na yetys dhedha’, 12dhe gemmeres preydh ha dhe bylla, dhe dreylya dha leuv erbynn an difeythtir yw annedhys lemmyn, hag erbynn an bobel kuntellys dhiworth an kenedhlow, usi ow kavoes chatel ha gwara, trigys yn kres an tir. 13Y lever dhis Sheba ha Dedan, ha marchons Tarshish, hag oll hy gwikoryon,38:13 hy gwikoryon: Amendys. Po war-lergh an Septuagint hy threvow. Ebrow hy lewyon yowynk. ‘A dheuthys dhe gemmeres preydh? A guntellsys dha lu dhe bylla, dhe dhoen dhe-ves arghans hag owr, dhe gemmeres chatel ha gwara, ha dhe gemmeres meur a breydh?’

14Rakhenna, profoes, A vab-den, ha lavar dhe Gog: Yndellma y lever an Arloedh Duw: Y'n jydh na pan eus ow fobel Ysrael trigys yn sawder, ty a dhifun, 15ha dos dhiworth dha dyller y'n gledhbarth pell, ty ha lies pobel genes, i oll ow marghogeth war vergh, ost bras, ha lu krev. 16Ty a yskynn erbynn ow fobel Ysrael kepar ha kommolenn dhe gudha an tir. Y'n dydhyow diwettha my a'th tro erbynn ow thir, rag may hwrello an kenedhlow ow aswonn, pan vydhav sanshes dredhowgh, A Gog, a-rag aga dewlagas.

Breus war Gog

17Yndellma y lever an Arloedh Duw: A nyns yw ty neb a gewsis vy a-dro dhodho y'n dydhyow koth, dre leuv ow gwesyon profoesi Ysrael, a brofoessons lies blydhen y'n dydhyow na, my dhe'th tri er aga fynn? 18Y'n jydh na, pan dheu Gog erbynn pow Ysrael, yn-medh an Arloedh Duw, ow sorr a dhifun. 19Y'm avi hag y'm sorrvann my a dheklar: Y'n jydh na y fydh dorgrys bras war diredh Ysrael. 20Puskes an mor, ydhyn an nev, bestes an gwel, pub kreatur a slynk war an dor, hag oll an dus usi war enep an tir, a gren a-ragov, ha'n menydhyow a vydh tewlys dhe'n dor, ha'n alsyow a goedh, ha pub fos a goedh dhe'n leur. 21My a elow ow kledha erbynn Gog yn oll ow menydhyow, yn-medh an Arloedh Duw; kledha pubonan a vydh erbynn y vroder. 22My a re breus warnodho dre bla ha dre woes; my a dhinwa glaw warnodho yn fros, ha keserennow, tan ha loskven, ha war y luyow ha war lies pobel eus ganso. 23My a dhiskwedh ow meuredh ha'm sansoleth a-rag dewlagas lies kenedhel. Ena i a woer my dhe vos an Arloedh.