Luyow Gog Distruys

1Ha ty, A vab den, profoes erbynn Gog, ha lever, Yndellma y lever an Arloedh Duw: Otta, yth esov er dha bynn, A Gog, chyf pennsevik Meshek ha Tubal; 2my a'th treyl a-dro ha'th tenna yn-rag, ha'th tri yn-bann dhiworth penn pella an gledhbarth, ha'th hembronk erbynn menydhyow Ysrael. 3My a wysk dha warak yn-mes a'th dorn gledh, ha gul dhe'th sethow koedha yn-nans yn-mes a'th dorn dhyghow. 4Ty a goedh war venydhyow Ysrael, ty hag oll dha luyow, ha'n poblow eus genes; my a'th re dhe ydhyn-preydh a bub eghenn ha dhe'n bestes gwyls avel boes. 5Ty a goedh y'n gwel igor; rag my re gewsis, yn-medh an Arloedh Duw. 6My a dhannvon tan war Magog ha war an re trigys yn sawder y'n ynysow; i a woer my dhe vos an Arloedh. 7My a wra dhe'm hanow sans bos aswonnys yn mysk ow fobel Ysrael; ha ny asav ow hanow sans dhe vos defolys na fella; ha'n kenedhlow a woer my dhe vos an Arloedh, an Sans yn Ysrael. 8Otta, devedhys yw, hag y fydh gwrys. Hemm yw an jydh a gewsis anodho.

9Ena an re trigys yn sitys Ysrael a yn-mes ha gorra tan y'n arvow ha'ga leski, skoesow ha boklers, gwaregow ha sethow, fustow-dorn ha guwow. Seyth blydhen i wra tan gansa. 10Ny guntellons prenn dhiworth an gwel, na'y dreghi dhiworth an koeswigow, rag i a wra tan gans an arvow; i a gemmer preydh dhiworth an re a gemmeras preydh dhiworta i, hag i a byll an re a's pyllas i, yn-medh an Arloedh Duw.

Ynkleudhyans Gog

11Y'n jydh na my a re dhe Gog nans an re a dremen troha tu est an mor; ev a stopp hyns an dremenysi, rag Gog ha'y luyow a vydh ynkleudhys ena; henwys vydh Nans Hamon-gog. 12Ha chi Ysrael a vydh orth aga ynkleudhyas seyth mis, rag glanhe an tir. 13Oll pobel an tir a wra aga ynkleudhyas; ha hemma a dhre enor dhedha y'n jydh may tiskwedhav ow glori, yn-medh an Arloedh Duw. 14I a sett dhe denewen gwer dhe dremena heb hedhi der an tir hag ynkleudhyas an re gesys war enep an dor, dh'y lanhe; wosa seyth mis i a dhalleth hwilas. 15Ha pan dremenons der an tir, ev neb a wel askorn den a worr tokyn rybdho bys pan wrug an ynkleudhyoryon y ynkleudhyas yn nans Hamon-gog. 16Hag y fydh sita ena ynwedh, henwys Hamona. Yndella i a lanha an tir.

17Mes ty, A vab den, yndellma y lever an Arloedh Duw: Kows dhe ydhyn a bub eghenn, ha dhe oll an bestes gwyls: Omguntellewgh ha dos; dewgh war-barth a bub tu dhe'm sakrifis a wrav ragowgh, sakrifis bras, war venydhyow Ysrael, ha hwi a dheber kig hag eva goes. 18Hwi a dheber kig gwer alloesek, hag eva goes pennsevigyon an nor, hordhes, eyn, gever, terewi, i oll bestes peskys a Bashan. 19Hwi a dheber blonek bys pan vydhowgh lenwys, hag eva goes bys pan vydhowgh medhow, orth an sakrifis a wrav ragowgh. 20Ha hwi a vydh lenwys orth ow moes a vergh ha marghogyon, a wer grev ha kasoryon a bub eghenn, yn-medh an Arloedh.

21My a dhiskwedh ow glori yn mysk an kenedhlow, hag oll an kenedhlow a wel ow breus a wrugavy, ha'n leuv a worris warnedha. 22Ha chi Ysrael a woer, my dhe vos an Arloedh aga Duw, a'n jydh na hag yn-rag. 23Ha'n kenedhlow a woer, chi Ysrael dhe vos yn kethneth drefenn aga drogobereth, rag i dhe vos dislel dhymm. Ytho my a gudhas ow fas dhiworta, ha'ga ri yn leuv aga eskerens, hag i oll a goedhas der an kledha. 24My a's dyghtyas herwydh aga avlander ha herwydh aga hammweythresow, ha my a gudhas ow fas dhiworta.

25Rakhenna yndellma y lever an Arloedh Duw: Lemmyn my a dreyl kethneth Yakob ha kemmeres truedh war oll chi Ysrael; ha my a vydh avius rag ow hanow sans. 26I a ankev aga meth hag oll an dislelder a wrussons er ow fynn, pan vydhons trigys yn sawder yn aga thir, heb denvyth dhe worra own ynna. 27Wosa my dh'aga dri arta dhiworth an poblow, ha'ga huntelles dhiworth tiryow aga eskerens, my a dhiskwedh ow sansoleth yn golok lies kenedhel. 28Ena i a woer my dhe vos an Arloedh aga Duw, rag my dh'aga dannvon yn divroedh yn mysk an kenedhlow; hag ena my a's kuntellas yn aga thir aga honan, heb gasa nagonan anedha ena. 29Ny gudhav ow fas arta dhiworta, rag my re dhiveris ow spyrys war ji Ysrael, yn-medh an Arloedh Duw.