Tokyn a Esedhva Yerusalem

1Ha ty, A vab den, kemmer brykk ha gorr e a-ragos, ha delin warnodho sita Yerusalem. 2Ena gwra esedhva er hy fynn, ha drehevel tommenn er hy fynn, ha krugya gweyth-esedhva er hy fynn, ha settya kampow er hy fynn, ha gorra er hy fynn hor'bennow a-derdro. 3Ha ty, kemmer ragos horn-pobas ha gorr e avel fos horn yntra ty ha'n sita; treyl dha fas er hy fynn, ha hi a vydh yn-dann esedhva, ha ty a wra esedhva er hy fynn. Hemma a vydh tokyn dhe ji Ysrael.

4Ha ty, growedh war dha denewen kledh, ha gorr anewnder chi Ysrael warnas.4:4 warnas: Amendys. Ebrow warnodho. Rag niver an dydhyow a wrowedhydh warnodho, ty a berth aga anewnder. 5My re ros dhis an keth niver a dhydhyow avel blydhynyow aga anewnder, tri hans, deg ha peswar-ugens dydh. Yndella ty a berth anewnder chi Ysrael. 6Wosa kowlwul hemma, ty a wrowedh arta, mes war dha denewen dyghow, ha ty a berth anewnder chi Yuda dew-ugens dydh. Dydh rag pub blydhen a rov dhis. 7Treyl dha fas troha esedhva Yerusalem, ha gans bregh lommhes ty a brofoes er hy fynn. 8Otta, my a worr warnas lovonow, ma na dreylli a unn tenewen dhe'n tenewen arall bys pan gowlwredh dydhyow dha esedhva.

9Ha ty, kemmer ragos dha honan gwaneth, ha heydh, ha fav, ha lentilow, ha myll ha gwaneth-spelt; ha gorr i yn unn lester, ha gwra bara ragos war-lergh niver an dydhyow may hwrowedhydh war dha denewen. Ty a'n deber tri hans, deg ha peswar-ugens dydh. 10Ha'th voes a dhybrydh a vydh ugens shekel orth poes pub dydh; yn termynyow settys ty a'n deber. 11Ynwedh ty a yv hweghves rann a hin; yn termynyow settys ty a'n yv. 12Ty a'n deber avel bara heydh; yn kawgh denel y'n pebydh a-wel dhedha. 13Ena an Arloedh a leveris, ‘Yndella y tebrons mebyon Ysrael aga bara avlan y'n kenedhlow ma's skattrav di.’ 14Ena my a leveris, ‘Ogh Arloedh Duw, otta, ny veu ow enev defolys, ha karynyes ha kig skwardys gans bestes gwyls ny dhybris a-dhia'm yowynkneth bys lemmyn, ha kig avlan ny dheuth y'm ganow.’ 15Ena ev a leveris dhymm, ‘Mir, my a re dhis glos yn le kawgh denel, ha ty a wra dha vara warnodho.’

16Ena yn-medh ev dhymm, A vab den, awottavy ow terri lorgh bara yn Yerusalem; i a dheber bara orth poes ha gans preder, hag i a yv aga musur a dhowr gans desper; 17rag bara ha dowr a fyll; skruth a's kemmer, ow mires an eyl orth y gila, hag i a wra pedri yn aga hammweyth.