An Sentri

1Ena ev a'm dros dhe'n tempel, ha musura an kilbostow, hwegh kevelin aga les war an dhew denewen.41:1 war an dhew denewen: Ow siwya an Septuagint. War-lergh tekst ebrow war an dhew denewen, les an tabernakel. 2Les an entrans o deg kevelin, ha fosow-tenewen an entrans o pymp kevelin war an dhew denewen. Ev a vusuras y hirder, dew-ugens kevelin, ha'y les ugens kevelin.

3Ena ev a entras a-ji dhe gynsa rann an sentri ha musura kilbostow an entrans, dew gevelin. Les an entrans o hwegh kevelin, ha fosow-tenewen41:3 fosow-tenewen: Ow siwya an Septuagint. Ebrow les. an entrans seyth kevelin. 4Ena ev a vusuras y hirder, dewgens kevelin, ha'n les dewgens kevelin a-rag an sentri. Yn-medh ev dhymm, ‘Hemm yw an tyller an moyha sans.’

5Ena ev a vusuras fos an chi, hwegh kevelin; ha les an chambouryow-tenewen peswar kevelin oll a-dro dhe'n chi. 6Yth esa an chambouryow-tenewen yn tri nivel, onan a-ugh an arall, ha deg warn ugens yn pub nivel. Yth esa jistys yn fos an chambouryow-tenewen oll a-dro, dh'aga skoedhya ma na vens skoedhys gans fos an chi. 7An chambouryow-tenewen a dheuth ha bos moy ledan war bub nivel. An drehevyans a-dro dhe'n chi o drehevys yn nivelyow ow mos yn-bann. Grisyow eth yn-bann dhiworth an nivel isella dhe'n ughella der an nivel y'n kres. 8My a welas ynwedh bos dhe'n chi terras ughelhes avel sel oll a-dro; selyow an chambouryow-tenewen o korsenn leun, hwegh kevelin aga ughelder. 9Les fos a-ves an chambouryow-tenewen o pymp kevelin. Yth esa spas igor yntra chambouryow-tenewen an chi 10ha'n helyow, ugens kevelin oll a-dro dhe'n chi. 11Yth esa darasow an chambouryow-tenewen ow mires troha'n spas igor, unn daras troha'n gogledh, hag unn daras troha'n dyghow. Les an tyller gwag o pymp kevelin oll a-dro.

12An drehevyans a-dal an garth troha'n howlsedhes o seyth kevelin, ha fos an drehevyans o pymp kevelin hy les oll a-dro, ha'y hirder deg kevelin ha peswar-ugens.

13Ena ev a vusuras an chi, kans kevelin y hirder, ha'n garth ha'n drehevyans gans y fosow kans kevelin aga hirder; 14ynwedh les fas an chi ha'n garth troha'n est o kans kevelin.

15Ena ev a vusuras hirder an drehevyans a-dal an garth a-dryv dhodho, ha'n tremenvaow a-dro dhodho, kans kevelin. An sentri a-ves, ha'n sentri a-bervedh, ha'n portal a-dal an klos, 16an treudhowyow, an fenestri ynn ha'n tremenvaow a-dro dh'aga thri, a veu pannellow gans prenn oll a-dro. Dhiworth an leur yn-bann dhe'n fenestri, ha'n fenestri aga honan, o kudhys. 17Y'n spas a-ugh an daras ha bys y'n chi a-bervedh, ha tu a-ves, ha war an fosow oll a-dro hag y'n sentri a-bervedh ha'n sentri a-ves 18yth o kervys cherubim ha palmys, palm yntra cherub ha cherub. Dhe bub cherub yth esa dew fas, 19fas den troha'n palm war unn tenewen, ha fas lew troha'n palm war an tenewen arall. Kervys ens war oll an chi a-derdro. 20Dhiworth an leur dhe dyller a-ugh an daras yth esa cherubim ha palmys kervys, ha war fos an tempel.

21Postow-daras an tempel o pedrek; hag a-rag an tyller sans yth esa neppyth gans semlans 22alter a brenn, tri hevelin y ughelder, ha dew gevelin y hirder; y gernow, y sel ha'y denwennow o a brenn. Yn-medh ev dhymm, ‘Hemm yw an voes usi a-rag an Arloedh.’ 23Yth esa darasow dewblek dhe'n tempel ha dhe'n tyller sans. 24Yth esa dhe bub daras diw dhelenn, diw dhelenn rag an eyl daras, ha diw dhelenn dhe'n daras arall. 25War dharasow an tempel yth o kervys cherubim ha palmys, haval dhe'n re kervys war an fosow; hag yth esa nen a brenn war fas an portal a-ves. 26Yth esa fenestri ynn gans palmys war an dhew denewen, war fosow-tenewen an portal, ha war jambouryow-tenewen an chi ha'n nenyow.