An Glori a Dhehwel dhe'n Tempel

1Ena ev a'm dros dhe'n yet, an yet ow mires troha'n est, 2hag otta, glori Duw Ysrael ow tos dhiworth an est; y lev o kepar ha son dowrow meur, ha'n nor a splannas gans y glori. 3An welesigeth a welis o haval dhe'n welesigeth a welis pan dheuth dhe dhistrui an sita, ha kepar ha'n welesigeth a welis ryb an avon Kebar; ha my a goedhas war ow fas. 4Glori an Arloedh a dheuth bys y'n tempel der an yet esa ow mires troha'n est. 5Ena an spyrys a'm drehevis ha'm dri dhe'n klos a-bervedh; hag otta, glori an Arloedh a lenwis an tempel.

6My a glewas nebonan ow kewsel dhymm yn-mes a'n tempel, ha'n gour ow sevel rybov. 7Yn-medh ev dhymm: Mab den, hemm yw tyller ow thron ha tyller godhnow ow threys may trigav ena yn mysk mebyon Ysrael bys vykken. Ny wra chi Ysrael defola ow hanow sans, naneyl i na'ga myghternedh, gans aga horyans, ha gans peulveyn aga myghternedh wosa i dhe verwel. 8Pan worrsons aga threudhow ryb ow threudhow vy, ha'ga fostow-daras ryb ow fostow-daras vy, gans travyth marnas paros yntra my hag i, i a dhefolas ow hanow sans gans an taklow kasadow a wrussons; ytho my re's konsumyas y'm sorr. 9Lemmyn gorrens dhe-ves aga horyans ha peulveyn aga myghternedh pell dhiworthiv, ha my a drig yn aga mysk bys vykken.

10Mes ty, A vab den, deskrif an tempel dhe ji Ysrael, may perthons meth a'ga hammweythresow; ha gwrens i musura an patron. 11Ha mar perthons meth drefenn pup-tra a wrussons, diskwedh dhedha furv an tempel, y aray, y fordhow mes ha'y entransow – oll y laghys, oll y ordenansow, ha'y desin kowal.43:11 oll y laghys, oll y ordenansow, ha'y desin kowal: Amendys. Ebrow hag oll y furvow hag oll y ordenansow hag oll y furvow hag oll y laghys. Skrif hemma a-rag aga dewlagas, may hwitthons ha siwya an desin kowal hag oll y ordenansow, ha'ga gul. 12Hemm yw lagha an tempel. War dopp an menydh, y diredh oll a-dro a vydh an moyha sans. Hemm yw lagha an tempel.

An Alter

13Hemm yw musurans an alter yn kevelinyow (an kevelin yw kevelin ha dornva). Downder an londer a vydh kevelin ha'y les kevelin, gans amal a unn dhornva a-dro dh'y amal. Hemm yw ughelder an alter. 14Dhiworth an londer war an leur bys y'n min isella, dew gevelin, ha'n les unn kevelin; ha dhiworth an byghanna min bys y'n brassa min, peswar kevelin, ha'n les unn kevelin. 15An alter-oeles, peswar kevelin; ha dhiworth an alter hag yn-bann, peswar korn. 16An alter-oeles a vydh pedrek, dewdhek kevelin hy hirder ha dewdhek kevelin hy les. 17An min a vydh pedrek, peswardhek kevelin y hirder ha peswardhek kevelin y les, gans amal a-dryv an alter. Hy grisyow a vir orth an est.

18Ena yn-medh ev dhymm: Mab den, yndellma y lever an Arloedh Duw: An re ma yw ordenansow an alter: Y'n jydh may fydh drehevys rag offrynna offrynnow leskys warnedhi ha rag skoellya goes warnedhi, 19ty a re tarow rag offrynn pegh dhe'n oferysi leviek a has Sadok, an re a dheu nes dhe venystra dhymm. 20Ha ty a gemmer rann a'y woes ha'y worra war an peswar karn anedhi, ha war peder kornell an min, ha war an amal a-derdro; yndella ty a's glanha ha gul prenedh rygdhi. 21Ha ty a gemmer tarow an offrynn pegh, hag y fydh leskys y'n tyller apoyntys y'n tempel a-ves dhe'n sentri.

22Y'n nessa dydh ty a offrynn bogh heb namm rag offrynn pegh; hag i a lanha an alter, kepar dell y's glanhasons gans an tarow. 23Wosa gorfenna an glanheans, ty a offrynn tarow heb namm ha hordh heb namm dhiworth an flokk. 24Ty a's offrynn a-rag an Arloedh, ha'n oferysi a skoell hoelan warnedha ha'ga offrynna avel offrynn leskys dhe'n Arloedh. 25Seyth dydh ty a dhre bogh rag offrynn pegh pub dydh; ynwedh tarow ha hordh dhiworth an flokk, heb namm. 26Seyth dydh i a wra prenedh rag an alter ha'y glanhe; yndella y hwrons hy sakra. 27Wosa gorfenna an dydhyow ma, ena an oferysi a wra agas offrynnow leskys ha'gas offrynnow kres war an alter; ha my a's degemmer, yn-medh an Arloedh Duw.