Rewlys Divers

1Yndellma y lever an Arloedh: yet an klos a-bervedh, a vir troha'n est, a vydh deges y'n hwegh dydh a lavur; mes yn dydh an sabot y fydh igerys, hag yn dydh an loer nowydh. 2An pennsevik a dheu a-ji dre bortal an yet dhiworth an tu a-ves, ha sevel ryb post an yet. An oferysi a bareus y offrynn leskys ha'y offrynnow kres, hag ev a ombleg orth treudhow an yet. Ena ev a yn-mes, mes ny vydh an yet deges kyns an gorthugher. 3Pobel an tir ynwedh a ombleg orth daras an yet na a-rag an Arloedh y'n sabotys hag y'n loeryow nowydh. 4Ha'n offrynn leskys a wra an pennsevik y dhre dhe'n Arloedh yn dydh an sabot a vydh hwegh oen heb namm, ha hordh heb namm. 5An offrynn greun gans an hordh a vydh unn efa, ha'n offrynn greun gans an oen a vydh herwydh y vodh, war-barth gans hin a oyl rag pub efa. 6Yn dydh an loer nowydh ev a brovi tarow ha hwegh oen ha hordh; i a vydh heb namm. 7Hag ev a brovi offrynn greun unn efa rag an tarow hag efa rag an hordh, ha rag an eyn herwydh y vodh, war-barth gans hin a oyl rag pub efa. 8Pan dheu an pennsevik a-ji, ev a dheu dre bortal an yet, hag ev a yn-mes y'n keth fordh.

9Pan dheu pobel an tir a-rag an Arloedh y'n goelyow apoyntys, neb a dheu a-ji dre yet an gogledh dhe wordhya, ev a omdenn dre yet an soth; ha neb a dheu a-ji dre yet an soth, ev a omdenn dre yet an gogledh; ny wra ev dehweles der an yet may teuth a-ji dredhi, mes omdennes der an yet usi a-dal dhedhi. 10Pan dhons a-ji, an pennsevik a dheu yn aga mysk, ha pan omdennons, ev ynwedh a omdenn.

11Y'n goelyow ha'n solempnitys an offrynn greun gans tarow a vydh efa, ha gans hordh efa, ha gans oen herwydh an galloes, war-barth gans hin a oyl rag pub efa. 12Pan wra an pennsevik provia offrynn bolonjedhek, offrynn leskys po offrynn kres, avel offrynn bolonjedhek dhe'n Arloedh, an yet a vir troha'n est a vydh igerys ragdho; hag ev a offrynn y offrynn leskys ha'y offrynnow kres dell wra yn dydh an sabot. Ena ev a omdenn, ha wosa ev dhe omdenna, an yet a vydh deges.

13Ty a brovi oen a unn bloedh heb namm rag offrynn leskys dhe'n Arloedh pub dydh; pub myttin ty a'n provi. 14Ty a brovi offrynn greun ganso pub myttin, unn hweghves rann a efa, hag unn tressa rann a hin a oyl rag glybya an bleus fin, avel offrynn greun dhe'n Arloedh, avel ordenans bys vykken. 15I a brovi an oen ha'n offrynn greun ha'n oyl pub myttin, rag offrynn leskys pub-dydhyek.

16Yndellma y lever an Arloedh Duw: Mar re an pennsevik ro dhiworth y eretons dhe onan a'y vebyon, henna a vydh dh'y vebyon ev ynwedh; y fydh aga ferghennogeth dre eretons. 17Mes mar re ro dhiworth y eretons dhe onan a'y wesyon, y fydh dhodho bys vlydhen y livreson; ena ev a dhehwel dhe'n pennsevik. Ny vydh y eretons marnas rag y vebyon.. 18Ny wra an pennsevik kemmeres travyth a eretons an bobel, orth aga thewlel mes a'ga ferghennogeth; ev a re eretons dh'y vebyon yn-mes a'y berghennogeth y honan, ma na vo nagonan a'm pobel diberthys dhiworth y berghennogeth.

19Ena ev a'm dros der an entrans ryb tenewen an yet troha'n helyow sans rag an oferysi, a vir troha'n gogledh; hag ottena tyller y'n tenewen west anedha. 20Yn-medh ev dhymm, Hemm yw an tyller may frojyons ynno an offrynn kammweyth ha'n offrynn pegh, ha may pebons an offrynn greun, ma na's drons yn-mes dhe'n klos a-ves, ha sakra an bobel.

21Ena ev a'm dros yn-mes dhe'n klos a-ves, ha'm ledya dhe beder kornell an klos; hag yn pub kornell a'n klos yth esa klos arall. 22Y'n peder kornell a'n klos yth esa klosyow byghan, dewgens aga hirder ha deg warn ugens aga les. 23Yth esa rew a veyn a-dro dhe bubonan a'n peswar klos, gans oelesow rag bryjyon, gwrys yn-dann an rewyow oll a-dro. 24Yn-medh ev dhymm, An re ma yw an keginow may hwra an re a menyster y'n tempel bryjyon ynna sakrifis an bobel.