Dowr ow Resek dhiworth an Tempel

1Ena ev a'm dros arta dhe entrans an tempel; hag otta, yth esa dowr ow resek a-dhann dreudhow an tempel troha'n est (rag yth esa an tempel ow mires troha'n est); hag yth esa an dowr ow resek a-dhann denewen soth an tempel, a'n soth dhe'n alter. 2Ena ev a'm dros yn-mes der yet an gogledh, ha'm ledya a-dro a'n tu a-ves bys an yet a-ves a vir troha'n est; hag otta, yth esa dowr ow resek yn-mes a denewen an soth.

3Pan eth an gour yn-mes gans kordenn-vusura yn y leuv, ev a vusuras mil gevelin, hag ena ev a'm ledyas der an dowr, a dheuth bys y'n dhewufern. 4Arta ev a vusuras mil ha'm ledya der an dowr, hag esa bys y'n dhewufern. Ena ev vusuras mil arall ha'm ledya der an dowr, hag a veu bys y'n dhiwglun. 5Arta ev a vusuras mil, hag yth o avon na yllis vy tremena dresti, rag an dowr re dhrehavsa lowr dhe neuvya ynno, avon na yllys tremena dredhi. 6Yn-medh ev dhymm, ‘Mab den, a welsys hemma?’

Ena ev a'm ledyas ha'm dri arta dhe lann an avon. 7Wosa my dhe dhehweles, otta, war lann an avon gwydh pals, pur lies, war dhiw lann an avon. 8Yn-medh ev dhymm, ‘Yma'n dowr ma ow resek yn-mes troha ranndir an est, hag ow mos yn-nans dhe'n Araba; pan dheu bys y'n mor, bys yn mor an dowrow trenk, an dowr a vydh yaghhes. 9Plepynag yth a an avon, pub kreatur bew ow hesya a vew, hag y fydh puskes pur lies drefenn an dowrow a dheu di. Y fydhons yaghhes, ha pup-tra a vew plepynag a dheu an avon. 10Tus a sev ryb an mor ow pyskessa; dhiworth En-gedi ha bys En-eglaym y fydh tylleryow rag lesa roesow. An puskes a vydh a lies kinda, kepar ha puskes an Mor Bras, pur lies. 11Mes ny vydh yaghhes y wernow ha'y halow; i a vydh gesys rag hoelan, 12Ryb an avon, war hy diw lann, y tyv gwydh a bub kinda rag boes, ma na wedher aga del, na ny fyll aga frut, mes i a dheg frut nowydh, rag bos aga dowrow dhiworth an sentri. Aga frut a vydh rag boes, ha'ga del rag yaghheans.’

Oryon Nowydh an Tir

13Yndellma y lever an Arloedh Duw: An re ma yw an oryon may hwrewgh ranna an tir avel eretons rag an dewdhek loeth a Ysrael. Y fydh diw rann dhe Yosep. 14Hwi a'n rann yntredha gans an eyl eretons kepar ha'y gila. My a dos gans ow leuv drehevys y ri dh'agas tasow, ha'n tir ma a goedh dhywgh avel agas eretons.

15Hemma a vydh or an tir: Yn tu an orth, dhiworth an Mor Bras dre fordh Hethlon dhe Lebo-hamath, hag yn-rag dhe Sedad, 16Berotha, Sibraym (usi ynter or Damaskus hag or Hamath), bys Haser-hattikon, usi ryb or Hawran. 17Ytho an or a vydh dhiworth an mor dhe Hasar-enan,47:17 Hasar-enan: Ow siwya an Septuagint. Ebrow Hasor-enon. usi a'n gogledh dhe or Damaskus, gans or Hamath dhe'n gogledh. Hemma a vydh tenewen an gogledh.

18Yn tenewen an est, an or a vydh yntra Hawran ha Damaskus; ha dhiworth Gilead ha pow Ysrael orth an Yordan; dhe vor an est bys yn Tamar. Hemma a vydh tenewen an est.

19Yn tenewen an soth y fydh dhiworth Tamar bys dowrow Meribath-kadesh, ena ryb an avon dhe'n Mor Bras. Hemma a vydh or an soth.

20Yn tenewen an west, an Mor Bras yw an or bys yn tyller a-dal Lebo-hamath. Hemma a vydh tenewen an west.

21Yndella hwi a rann an tir ma yntredhowgh, herwydh loethow Ysrael. 22Hwi a'n rann ow tewlel prenn avel eretons dhywgh ha rag an alyons yw trigys yntredhowgh ha dhedha fleghes dineythys yn agas mysk. I a vydh ragowgh avel Ysraelysi teythyek; i a's tevydh eretons yn mysk loethow Ysrael. 23Yn py loeth pynag a vo an alyons trigys, ena hwi a rann dhedha aga eretons, yn-medh an Arloedh Duw.