Rannow a Loethow

1An re ma yw henwyn an loethow. Dhiworth or an gogledh, war fordh Hethlon, dhe Lebo-hamath, bys Hasar-enan, usi war or Damaskus troha'n gogledh, ryb Hamath: dhiworth tenewen an est dhe'n west: y fydh unn rann dhe Dan. 2Ryb or Dan, dhiworth tenewen an est bys tenewen an west, unn rann dhe Asher. 3Ryb or Asher dhiworth tenewen an est bys tenewen an west, unn rann rag Naftali. 4Ryb or Naftali, dhiworth tenewen an est bys tenewen an west, unn rann dhe Manasse. 5Ryb or Manasse, dhiworth tenewen an est bys tenewen an west, unn rann dhe Efraym 6Ryb or Efraym, dhiworth tenewen an est bys tenewen an west, unn rann dhe Rewben. 7Ryb or Rewben, dhiworth tenewen an est bys tenewen an west, unn rann dhe Yuda.

8Ryb or Yuda, dhiworth tenewen an est bys tenewen an west, y fydh an offrynn a offrynnowgh, pymp mil warn ugens y les, ha'y hirder kepar ha'n rannow erell, dhiworth tenewen an est bys tenewen an west; ha'n sentri a vydh y'n kres anodho. 9An offrynn a offrynnowgh dhe'n Arloedh a vydh pymp mil warn ugens y hirder ha deg mil y les. 10An re ma a vydh an offrynn sans rag an oferysi: y'n gogledh, pymp mil warn ugens, hag y'n howlsedhes deg mil y les, hag y'n est deg mil y les, hag y'n soth pymp mil warn ugens y hirder; ha'n sentri a vydh y'n kres anodho. 11Y fydh rag an oferysi sakrys, mebyon Sadok, a withas ow charj, ha nag ethons yn sowdhan, dell wrug an Levysi. 12Y fydh dhedha avel offrynn arbennik dhiworth offrynn sans an tir, tyller moyha sans, ryb or an Levysi. 13Ryb or an oferysi y fydh offrynn dhe'n Levysi pymp mil warn ugens y hirder ha deg mil y les. Oll an hirder a vydh pymp warn ugens, ha'n hirder deg mil. 14Ny werthons travyth anodho, na'y geschanjya. Ny'n statyons, rag an gwella tir yw, ha sans dhe'n Arloedh.

15An pymp mil yn les yw gesys, ha'n pymp warn ugens yn hirder, a vydh tyller na veu sakrys rag an sita dhe wul devnydh anodho, rag annedhow, ha rag peurvaow. An sita a vydh y'n kres anodho. 16An re ma a vydh hy musuryow: yn tenewen an gogledh pymp kans ha peswar mil, yn tenewen an soth, pymp kans ha peswar mil, yn tenewen an est pymp kans ha peswar mil, hag yn tenewen an west pymp kans ha peswar mil. 17Y fydh peurva dhe'n sita: y'n gogledh dew kans ha hanter-kans, y'n soth dew kans ha hanter-kans, y'n est dew kans ha hanter-kans, hag y'n west dew kans ha hanter-kans. 18Remenant an hirder ryb an offrynn sans a vydh deg mil y'n est, ha deg mil y'n west; y fydh ryb an offrynn sans. Y askorr a vydh boes rag oberoryon an sita. 19Oberoryon an sita dhiworth oll loethow Ysrael a wra y gonedha. 20Oll an offrynn a vydh pymp mil warn ugens orth pymp mil warn ugens, pedrek. Ty a offrynn an offrynn sans war-barth gans perghennogeth an sita.

21An remenant war dhew denewen an offrynn sans ha perghennogeth an sita a vydh rag an pennsevik. Y fydh owth ystynn dhiworth pymp mil warn ugens an offrynn troha or an est, ha troha'n west a-dal an pymp mil warn ugens bys or an west, kettuel gans rannow an loethow; y fydh rag an pennsevik. An offrynn sans gans an sentri a vydh y'n kres anodho. 22Perghennogeth an Levysi ha perghennogeth an sita a vydh yn kres an pyth usi dhe'n pennsevik. Perghennogeth an pennsevik a vydh ynter or Yuda hag or Benyamin.

23Remenant an loethow: y fydh dhe Benyamin unn rann, dhiworth tenewen an est bys yn tenewen an west. 24Ryb or Benyamin, dhiworth tenewen an est bys tenewen an west, unn rann dhe Simeon. 25Ryb or Simeon, dhiworth tenewen an est bys tenewen an west, unn rann dhe Yssakar. 26Ryb or Yssakar, dhiworth tenewen an est bys tenewen an west, unn rann dhe Zebulun. 27Ryb or Zebulun, dhiworth tenewen an est bys tenewen an west, unn rann dhe Gad. 28Ryb or Gad dhe denewen an soth, an or a vydh dhiworth Tamar dhe dhowrow Meribath-kadesh, ena ryb an avon bys an Mor Bras. 29Hemm yw an tir a wredh y ranna avel eretons ow tewlel prenn rag loethow Ysrael, ha'n re ma yw aga rannow, yn-medh an Arloedh Duw.

30An re ma yw an fordhow yn-mes a'n sita: yn tenewen an gogledh, yw peswar mil ha pymp kans orth musur, 31yetys an sita a vydh war-lergh henwyn loethow Ysrael, teyr yet y'n gogledh, yet Rewben onan, yet Yuda onan, yet Levi onan. 32Yn tenewen an est, yw peswar mil ha pymp kans, teyr yet: yet Yosep onan, yet Benyamin onan, yet Dan onan. 33Yn tenewen an soth, yw peswar mil ha pymp kans orth musur, teyr yet, yet Simeon onan, yet Yssakar onan, yet Zebulun onan. 34Yn tenewen an west, yw peswar mil ha pymp kans orth musur, teyr yet, yet Gad onan, yet Asher onan, yet Naftali onan. 35An kompas yw etek mil. Ha hanow an sita a-dhia'n jydh na a vydh: Yma an Arloedh Ena.48:35 Yma an ARLOEDH Ena: Ebrow Adonay Shamma.