Kledha erbynn Yerusalem

1Ha ty, A vab den, kemmer kledha lymm, kemmer e avel altenn barver, ha gwra e dhe bassya war dha benn ha war dha varv; ena kemmer mantol ha rann an blew. 2Ty a worr tressa rann anodho yn tan yn kres an sita, wosa bos gorfennys dydhyow an esedhva; ha kemmer tressa rann ha gwask gans an kledha a-dro dhe'n sita; ha tressa rann a skattrydh dhe'n gwyns, ha my a denn an kledha war aga lergh. 3Mes kemmer alena niver byghan a vlewennow, ha'ga helmi yn lappys dha dhillasenn. 4Ena kemmer moy anedha ha'ga tewlel yn kres an tan, ha'ga leski y'n tan. Alena tan a yn-mes dhe oll chi Ysrael.

5Yndellma y lever an Arloedh Duw: Homm yw Yerusalem; my re's settyas yn mysk an kenedhlow, gans gwlasow oll a-dro dhedhi. 6Mes hi re rebellyas erbynn ow breusow moy ages sherewynsi an kenedhlow, hag erbynn ow ordenansow moy ages an gwlasow usi a-dro dhedhi; rag i re dhenaghas ow breusow ha ny gerdhsons y'm ordenansow. 7Rakhenna yndellma y lever an Arloedh Duw: Drefenn bos agas balghder brassa ages an kenedhlow usi a-dro dhis, ha ny gerdhsowgh y'm ordenansow ha ny wrussowgh ow breusow, ha ny wrussowgh hwath war-lergh breusow an kenedhlow usi a-dro dhywgh; 8rakhenna yndellma y lever an Arloedh Duw: Mir, my ow honan, yth esov er dha bynn, ha my a wra breusow a-berth ynnos a-wel dhe'n kenedhlow. 9My a wra ynnos an pyth na wrug vy bythkweth, ha ny wrav vy travyth avello nevra arta, drefenn oll dha daklow kasadow. 10Rakhenna tasow a dheber mebyon a-berth ynnos, ha mebyon a dheber aga thasow; ha my a wra breusow ynnos, ha skattra oll an remenant ahanas dhe oll an gwynsow. 11Rakhenna, dell vewav, yn-medh an Arloedh Duw, drefenn ty dhe dhefola ow sentri gans oll dha daklow vil ha gans oll dha daklow kasadow, ytho my a'th tivarv; ow lagas ny gemmer pita, hag ynwedh ny gemmerav truedh. 12Tressa rann ahanowgh a verow dre bla po mos dhe goll dre dhivoetter a-berth ynnos; tressa rann a goedh der an kledha a-dro dhis; ha tressa rann a skattrav dhe oll an gwynsow ha tenna an kledha war aga lergh.

13Ena ow sorr a vydh kowlwrys, ha'm konnar er aga fynn a wrav dhe bowes, ha my a vydh diellys; hag i a woer my, an Arloedh, dhe gewsel y'm avi, pan wrav vy kowlwul ow honnar er aga fynn. 14Ha my a'th wrav dhe vos tyller a vagoryow ha skorn yn mysk an kenedhlow usi a-dro dhis, yn golok oll an dremenysi 15Ty a vydh skorn, ha tont, ha bysna hag euth dhe'n kenedhlow a-dro dhis, pan wrav breusow er dha bynn yn sorr hag yn konnar hag yn keredhyow konneryek. My, an Arloedh, re gewsis. 16Pan dhannvonav an tebel sethow a dhivoetter er agas pynn5:16 er agas pynn: Amendys. Ebrow er aga fynn. rag distruyans, my a's tannvon dh'agas distrui. My a ynkress divoetter warnowgh ha terri agas lorgh bara. 17My a dhannvon divoetter ha tebel vestes er agas pynn, hag i a'th wra anvap. Plag ha goes a dremen dresos, ha my a dhre kledha warnas. My, an Arloedh, re gewsis.