Profoesans erbynn Menydhyow Ysrael

1Ger an Arloedh a dheuth dhymm, ow leverel: 2Mab den, sett dha fas war-tu ha menydhyow Ysrael, ha profoes dhedha, 3ha lavar, Menydhyow Ysrael, goslowewgh ger an Arloedh Duw. Yndellma y lever an Arloedh Duw dhe'n menydhyow ha dhe'n brennow, dhe'n goverow ha dhe'n nansow, Awottavy ow tri warnowgh kledha, ha my a dhistru agas tylleryow ughel. 4Agas alteryow a vydh forsakys, ha'gas alteryow ynkys a vydh terrys, ha my a dewl dhe'n leur agas re ledhys a-rag agas idolys. 5My a worr korfow mebyon Ysrael a-rag aga idolys, ha skattra agas eskern a-dro dh'agas alteryow. 6Yn oll agas annedhow an sitys a vydh difeythys; agas tylleryow ughel a vydh distruys, may fydh agas idolys terrys ha diswrys, agas alteryow ynkys treghys dhe'n dor, ha'gas oberow defendys dhe-ves. 7An re ledhys a goedh yn agas mysk, ha hwi a woer my dhe vos an Arloedh.

8Mes my a as remenant; re ahanowgh a skap an kledha yn mysk an kenedhlow, pan vydhowgh skattrys y'n gwlaskordhow. 9An re ahanowgh a skap a wra ow kovhe y'n kenedhlow mayth yns i degys yn kethneth, fatell ov vy terrys gans aga holonn avoutrek6:9 fatell ov vy terrys gans aga holonn avoutrek: Po war-lergh an Vulgat pan dhistruav aga holonn avoutrek. a dreylyas a-dhiworthiv, ha gans aga dewlagas ow horya war-lergh aga idolys. Kasa aga honan a wrons dre reson an drogow a wrussons rag oll aga taklow kasadow. 10Hag i a woer my dhe vos an Arloedh; ny gewsis yn euver my dhe wul dhedha an terroes ma.

11Yndellma y lever an Arloedh Duw: Tak dha dhiwla ha stank dha droes, ha lavar, Ellas rag oll an taklow kasadow vil a ji Ysrael, rag i a goedh der an kledha, dre dhivoetter, ha dre blag. 12Neb yw a-bell a verow der an plag, ha neb yw ogas a goedh der an kledha, ha neb yw gesys po gwithys a verow dre dhivoetter. Yndella my a gowlwra ow honnar warnedha. 13Ena hwi a woer my dhe vos an Arloedh, pan vydh aga re ledhys yn mysk aga idolys a-dro dh'aga alteryow, war bub bronn ughel, war oll pennow an menydhyow, hag yn-dann bub gwydhenn las, hag yn-dann bub terebinthenn dhelyek, le may rosons ena sawer plegadow dhe oll aga idolys. 14My a ystynn ow leuv warnedha ha gul an tir ynyal, dhiworth an difeyth bys Dibla,6:14 Dibla: Po amendyans Ribla. yn oll aga thrigvaow. Ena i a woer my dhe vos an Arloedh.