Terroesa ow Tos

1Ger an Arloedh a dheuth dhymm, ow leverel: 2Ha ty, A vab den, yndellma y lever an Arloedh Duw dhe bow Ysrael:

Diwedh! an diwedh a dheuth

war beswar korn an tir.

3Lemmyn an diwedh yw devedhys warnas

ha my re dhannvonas ow sorr er dha bynn;

ha my a'th vreus war-lergh dha fordhow,

ha dha gessydhya rag oll dha daklow kasadow.

4Ny gemmer ow lagas pita ahanas, ha ny'th sparyav,

rag my a attal dhis drefenn dha fordhow,

ha'th taklow kasadow a-berth ynnos.

Ena hwi a woer my dhe vos an Arloedh.

5Yndellma y lever An Arloedh Duw:

Anfeusi, unn anfeusi, otta re dheuth!

6Diwedh re dheuth, re dheuth an diwedh

ha difuna er dha bynn; otta re dheuth!

7An vreus re dheuth dhis

neb eus trigys y'n tir.

An termyn re dheuth, ogas yw an jydh –

yma skruth, a-der garm lowen y'n menydhyow.

8Lemmyn a verr spys my a dhinwa ow honnar warnas,

ha'y kowlwul ow sorr er dha bynn;

my a'th vreus war-lergh dha fordhow,

hag attyli dhis rag oll dha daklow kasadow.

9Ny gemmer ow lagas pita ahanas, na ny'th sparyav;

my a attal dhis war-lergh dha fordhow,

ha'th taklow kasadow usi a-berth ynnos.

Ena hwi a woer my dhe vos an Arloedh, usi ow kweskel.

10Otta an jydh! Otta re dheuth!

An vreus res eth yn-mes;

an welenn re vleujyowas, balghder re eginas.

11Freudh re devis avel gwelenn a sherewynsi;

ny vydh gesys nagonan anedha,

nagonan a'ga routh, na travyth a'ga golusogneth,

na travyth a bris ynna.

12An termyn re dheuth, devedhys yw an jydh.

Na lowenhes an prener, ha na wres an gwerther kyni,

rag yma sorr war oll an routh anedha.

13Rag ny wra an prener pe dhe'n gwerther, hedre vons aga dew hwath yn few; rag ny vydh an welesigeth erbynn an routh daskelwys. Drefenn y anewnder, ny yll nagonan gwitha y vewnans.

14I re hwythas an hirgorn ha pareusi pup-tra;

mes nyns a denvyth dhe'n vatel,

rag yma ow sorr war oll an routh anedha.

15An kledha a-ves, ha'n plag ha'n divoetter a-ji:

neb eus y'n gwel a verow der an kledha,

ha neb eus y'n sita, divoetter ha plag a'n deber.

16Peub yw gesys a skap,

hag i a vydh y'n menydhyow

kepar ha kelemmi an nansow,

i oll owth hanasa, peub yn y anewnder.

17Oll an dhiwla a vydh dinerth,

hag oll an dhewlin a vydh kepar ha dowr.7:17 a vydh kepar ha dowr: Po war-lergh an Septuagint a vydh defolys gans urin.

18I a wisk yskar,

ha kren a's kudh.

Meth a vydh dhe bub fas,

ha moelder war oll aga fennow.

19I a dewl aga arghans y'n stretys,

ha'ga owr a vydh pyth avlan.

Ny yll aga arghans na'ga owr aga delivra yn dydh konnar an Arloedh. Ni yllons kavoes lowr rag aga enev, na lenwel aga thorr, rag y feu sklander a's ledyas yn anewnder. 20Goeth a's tevo yn tekter aga thegennow ha gansa i a wrug aga imajys kasadow, aga thaklow kasadow; rakhenna my a's gwra mostedhes ragdha.

21My a'n re yn dorn estrenyon avel preydh,

ha dhe debeles an norvys avel da pyllys,

hag i a'n defol.

22My a dreyl ow fas dhiworta,

hag i a dhefol ow thresor;

ladron a dheu ynni,

hag i a's defol.

23Gwra an kadon,7:23 Gwra an kadon: Po amendyans Hag i a wra ladhva.

rag an tir yw leun a skoellya goes,

ha'n sita yw leun a freudh.

24My a dhre an gwetha a'n kenedhlow

hag i a erit aga chiow;

my a wra diwedh dhe woeth an re grev,

ha'ga sentris a vydh defolys.

25Angoes a dheu, hag i a hwila kres,

mes ny'n kevons.

26Anfeusi war anfeusi a dheu,

hag y fydh hwedhel war hwedhel.

I a hwila gwelesigeth dhiworth profoes;

dyskans a'n lagha gans an oferyas a vydh kellys,

ha kusul dhiworth an henavogyon.

27An myghtern a gyn,

ha'n pennsevik a vydh gwiskys yn euth;

diwla pobel an tir a gren.

My a's dyght war-lergh aga fordh,

ha my a's breus war-lergh aga breusow.

Ena i a woer my dhe vos an Arloedh.