Idolys Gordhys y'n Tempel

1Y'n hweghves blydhen, y'n hweghves mis, yn pympes dydh an mis, ha my owth esedha y'm chi, ha henavogyon Yuda owth esedha a-ragov, leuv an Arloedh Duw a goedhas warnav ena. 2My a viras, hag otta hevelep kepar ha semlans gour. Dhiworth an rann a hevelis bos y dhiwglun bys an leur y feu tan, ha dhiworth y dhiwglun war-vann kepar ha'n semlans a splannder, avel amber ow lentri. 3Ev a ystynnas furv leuv ha'm kemmeres er kudynn a wols ow fenn. An spyrys a'm drehevis ynter an nor ha'n nev, ha'm dri dhe Yerusalem yn gwelesigethow Duw, dhe dharas an yet a-bervedh, a vir troha'n gledhbarth, ple'th esa imaj an avi, a brovok dhe avi. 4Hag otta, yth esa ena glori Duw Ysrael, kepar ha'n welesigeth a welis y'n nans.

5Ena yn-medh ev dhymm, ‘Mab den, drehav dha dhewlagas war-tu ha'n gledhbarth.’ Ytho my a dhrehevis ow dewlagas war-tu ha'n gledhbarth, hag otta, a'n barth kledh dhe yet an alter yth esa idol an avi ma y'n entrans. 6Ena yn-medh ev dhymm, ‘Mab den, a welydh pandr'a wrons, an taklow vil bras usi chi Ysrael ow kul omma, dhe'm pellhe dhiworth ow sentri? Mes ty a wel taklow vil hwath brassa.’

7Ena ev a'm dros dhe dharas an klos. My a welas, hag awotta, toll y'n fos. 8Ena yn-medh ev dhymm, ‘Mab den, pal der an fos.’ Ytho my a balas der an fos, hag awotta, daras. 9Hag yn-medh ev dhymm, ‘Ke a-ji ha gwel an taklow vil ha kasadow esons ow kul omma.’ 10Ytho my eth a-ji ha gweles, hag otta pub furv a gramvil ha best kasadow, hag oll idolys chi Ysrael, kervys war an paros a-derdro. 11Hag yth esa deg ha tri-ugens gour dhiworth henavogyon chi Ysrael ow sevel a-ragdha, ha Yaazania mab Shafan ow sevel yn aga mysk. Ha peub a'n jeva y ynkyslester yn y leuv, hag ethenn kommolenn an ynkys a yskynnas. 12Ena yn-medh ev dhymm, ‘A welsys, A vab den, an pyth usi henavogyon chi Ysrael ow kul y'n tewlder, peub yn chambouryow y imajys? Rag yn-medhons, “An Arloedh ny'gan gwel, an Arloedh re forsakyas an tir.” ’ 13Hag yn-medh ev dhymm, ‘Ty a wel taklow vil hwath brassa esons orth aga gul.’

14Ena ev a'm dros dhe dharas yet chi an Arloedh usi a'n gledhbarth, hag ottena an benynes owth esedha, owth oela rag Tammuz. 15Ena yn-medh ev dhymm, ‘A welydh hemma, mab den? Ty a wel taklow vil hwath brassa es an re ma.’

16Ena ev a'm dros dhe'n klos a-bervedh a ji an Arloedh; hag otta, orth daras tempel an Arloedh, ynter an yet ha'n alter, yth esa a-dro dhe bymp gour warn ugens, gans aga heynow troha tempel an Arloedh ha'ga fasow troha'n est, owth omblegya dhe'n howl y'n est. 17Ena yn-medh ev dhymm, ‘A welsys, mab den? Yw ev tra drufel rag chi Yuda, i dhe wul an taklow vil re wrussons omma? Rag i re lenwis an tir a freudh, ha'm serri hwath moy. Ottensi ow korra skorrenn dh'aga throen. 18Ytho my a ober yn sorr; ny gemmer ow lagas truedh na ny's sparyav. Kyn krions y'm diwskovarn gans lev ughel ny woslowav orta.’