Gwelesigeth Ezekiel

1Y'n trydhegves blydhen, y'n peswora mis, yn pympes dydh an mis, pan esen yn mysk an dhivresow ryb an avon Kebar, an nevow a veu igerys, ha my a welas gwelesigethow Duw. 2Yn pympes dydh an mis, y'n pympes blydhen a dhivroedh myghtern Yehoyakin, 3ger an Arloedh a dheuth dhe'n oferyas Ezekiel mab Buzi yn pow an Kaldeanys, ryb an avon Kebar; hag ena y feu leuv an Arloedh warnodho.

4My a viras, hag otta annawel ow tos dhiworth an gogledh, kommolenn vras, ha tan ow lughesi gans golow splann a-dro dhedhi, hag ow tos yn-mes anedhi neppyth kepar hag amber, dhiworth kres an tan. 5Y'n kres anedhi y feu hevelep peswar kreatur bew, ha hemma a veu aga semlans: i a's teva hevelep den, 6dhe bubonan peswar fas, ha dhe bubonan anedha peder askell. 7Aga garrow o garrow ewn; godhnow aga garrow o avel godhen leugh, ow terlentri avel brons splannhes. 8Yth esa diwla den yn-dann aga eskelli war aga feswar tenewen. An fasow ha'n eskelli anedha aga feswar o yndella: 9aga eskelli a dochya an eyl dh'y ben; ny dreylyens hag i ow mos, mes yth esa pubonan ow mos kompes war-rag. 10Hevelep fasow aga feswar o fas den ha fas lew a-dhyghow, ha fas ojyon a-gledh; ha'ga feswar a's tevo fas er; 11yndella y feu aga fasow. Aga eskelli a omlesa war-vann; dhe bubonan yth esa diw askell a dochya an eyl dh'y ben, ha diw askell a gudha aga horfow. 12Pubonan e war-rag. Pyle pynag y fynna an spyrys mos, ena yth ens heb treylya, hag i ow mos. 13Y feu hevelep an kreaturs bew kepar ha kolennow bew ow tewi, kepar ha semlans faglennow ow kwaya ynter an kreaturs bew; an tan o splann, ha dhiworth an tan yth esa lughes ow mos yn-mes. 14An kreaturs bew a boenya ha dehweles kepar ha lughesenn.

15My a viras orth an kreaturs bew, hag awotta, unn ros war an dor ryb pub kreatur bew gans y beswar fas. 16Semlans an rosow ha'ga framweyth o avel liw owrven, ha'n keth hevelep dh'aga feswar. Aga semlans ha'ga framweyth o avel ros yn kres ros. 17I a ylli mos dhe gwartron vytholl, hag i ow mos; ny dreylyens hag i ow mos. 18Aga hammogow o ughel hag euthyk, ha kammogow aga peswar o leun a lagasow a-derdro. 19Pan ens an kreaturs bew, yth esa an rosow ow mos rybons; ha pan yskynna an kreaturs bew a-dhiwar an dor, an rosow a yskynnas ynwedh. 20Plepynag yth ella an spyrys, ena yth ens i, ha'n rosow a yskynna gansa, rag yth esa spyrys an kreatur bew y'n rosow. 21Pan e an rosow, yth esa i ynwedh ow mos, ha pan sevi an rosow, yth esa i ynwedh owth yskynna, drefenn bos spyrys an kreatur y'n rosow.

22A-ugh pennow an kreaturs bew, yth esa hevelep an fyrmament, avel gwrys euthyk ystynnys a-ugh aga fennow. 23Yn-dann an fyrmament yth o aga eskelli ewn, an eyl troha'y ben; yth esa dhe bubonan diw askell ow kudha y gorf. 24My a glewas son aga eskelli, avel son dowrow pals, hag i ow mos, avel lev an Ollgalloesek,1:24 an Ollgalloesek: Ebrow Shadday. son tervans lu. Pan sevens, i a asa aga eskelli dhe goedha. 25Ena yth esa lev dhiworth an fyrmament a-ugh aga fennow. Pan sevens, i a asa aga eskelli dhe goedha.

26A-ugh an fyrmament esa a-ugh aga fennow yth esa hevelep men saffir, an hevelep a dron; ha war hevelep an tron yth esa an hevelep a dhen a-ughti. 27My a welas neppyth haval dhe wolow amber, kepar ha golowgylgh a dan a-dro dhodho, war-vann dhiworth semlans y dhiwglun; ha war-nans dhiworth semlans y dhiwglun my a welas neppyth haval dhe dan, ow splanna a-dro dhodho. 28Haval dhe semlans kammneves y'n kommol yn dydh glaw, yndella o an golowyjyon a-dro dhodho. Hemm o semlans kepar ha glori an Arloedh.

Pan y'n welis, my a goedhas war ow fas, ha klewes lev ow kewsel.