Enebieth erbynn Dastrehevyans an Tempel

1Pan glewas eskerens Yuda ha Benyamin mebyon an divroedh dhe dhrehevel tempel rag an Arloedh, Duw Ysrael, 2i a dheuth dhe Zerubbabel, ha dhe bennow an teyluyow, ha leverel dhedha, ‘Gesewgh ni dhe dhrehevel genowgh: rag avelowgh hwi ni a hwila agas Duw; ha ni re beu ow sakrifia dhodho a-dhia dhydhyow Esarhaddon myghtern Asshur, neb a'gan dros yn-bann bys omma.’ 3Mes Zerubbabel, Yeshua ha'n bennow teyluyow erell a Ysrael, a leveris dhedha, ‘Ny'gas beus travyth dhe wul genen rag drehevel chi dh'agan Duw; mes ni agan honan war-barth a vynn drehevel rag an Arloedh, Duw Ysrael, dell erghis dhyn myghtern Kyrus, myghtern Persia.’

4Ytho pobel an pow a dhiskonfortyas4:4 a dhiskonfortyas: Ebrow a wannhas diwla. pobel Yuda, hag a's ownhas, ma na dhrehaffens. 5Hag i a falswobras kusulyadoryon er aga fynn, dhe lesta aga thowl, der oll dydhyow Kyrus myghtern Persia, bys yn reyn Darius myghtern Persia.

Lyther Rehum erbynn Dastrehevyans Yerusalem

6Yn reyn Ahasuerus, yn dalleth y reyn, i a skrifas kuhudhans erbynn annedhysi Yuda ha Yerusalem.

7Hag yn dydhyow Artakserkses, Bishlam, Mithredath, Tabeel ha'ga heskowetha erell a skrifas dhe Artakserkses myghtern Persia; an lyther o skrifys yn skrif aramaek, hag y'n yeth aramaek.

8Rehum an chansler ha Shimshay an skrifwas a skrifas lyther erbynn Yerusalem dhe Artakserkses an myghtern dell siw:4:8 Gwersow 4:8 bys 6:18 yw skrifys yn Aramaek.

9Ena Rehum an chansler, ha Shimshay an skrifwas, ha'ga heskowetha erell – an vreusysi, an wovernours, an soedhogyon, an Persianys, tus a Erek, Babylon, Shushan, henn yw an Elamysi, 10ha'n kenedhlow erell, hag a wrug Ashurbanipal bras ha nobyl aga divroa, ha gorra yn sitys Samaria hag y'n rann arall a'n rannvro Dres-an-Avon. 11Ottomma dasskrif a'n lyther a dhannvonsons dhodho:

Dhe Artakserkses an myghtern:

Dhiworth dha servysi an wer y'n rannvro Dres-an-Avon:

12Re bo godhvedhys dhe'n myghtern, an Yedhewon neb a dheuth yn-bann a-dhiworthis dhyn ni re dheuth dhe Yerusalem. Yth esons ow trehevel an sita dhiwostydh ha drog na, ow korfenna hy fosow, hag owth ewnhe hy selyow.

13Re bo godhvedhys lemmyn dhe'n myghtern, mar pydh drehevys an sita ma, ha'n fosow gorfennys, alena ny dalvydhons na toll-benn, na toll-wara, na toll-dir, ha les an myghternedh a vydh aperys yn sur. 14Lemmyn, drefenn agan bos ow tybri hoelan palys an myghtern, ha nag o gwiw ni dhe weles disenor an myghtern, rakhenna ni re dhannvonas rag may fo godhvedhys dhe'n myghtern, 15may hwiller yn lyver kovadhow dha dasow: yndella ty a gyv yn lyver an kovadhow, ha dyski bos an sita ma sita dhiwostydh, hag a wra pystiga myghternedh ha rannvroyow, hag rebellyans re sordyas ynni a-henys: rakhenna an sita ma a veu difeythys. 16Ni a dheriv dhe'n myghtern, mar pydh an sita ma dastrehevys, ha'y fosow gorfennys, ena ny vydh perghennogeth dhis y'n rannvro Dres-an-Avon.

17Ena an myghtern a dhannvonas gorthyp:

Dhe Rehum an chansler, ha dhe Shimshay an skrifwas, ha dh'aga heskowetha erell trigys yn Samaria, hag yn rannow erell an rannvro Dres-an-Avon: Salusyans.

18An lyther a dhannvensowgh dhyn re beu treylys ha lennys a-ragov. 19Ytho my a dhellos arghadow, hag i a hwithras, ha dyski an sita ma dhe omsevel a-henys erbynn myghternedh, ha rebellyans hag ankres re beu gwrys ynni. 20Byttegyns, re beu myghternedh galloesek dhe Yerusalem, neb a rewlyas oll an rannvro Dres-an-Avon; ha toll-benn ha toll-wara, ha toll-dir, a veu tylys dhedha. 21Dyllewgh ytho arghadow mayth ynnier an wer ma dhe hedhi, ha na vo an sita ma drehevys, bys pan vo arghadow dyllys dhiworthiv. 22Gwaytyewgh ma na vydhowgh logh y'n mater ma, ma na deffo dregynn, ha dhe bystiga myghternedh.

23Ena, pan veu lennys dasskrif lyther myghtern Artakserkses a-rag Rehum, ha Shimshay an skrifwas, ha'ga heskowetha, i eth war-not dhe Yerusalem, dhe'n Yedhewon, ha'ga honstryna dhe hedhi dre nerth ha galloes. 24Yndella yn eur na ober chi Duw usi yn Yerusalem a hedhis, ha pesya yndella bys y'n nessa blydhen a reyn Darius myghtern Persia.