Ober Drehevyans an Tempel Dastallethys

1Ena an brofoesi, Haggay ha Zekaria mab Iddo, a brofoesas dhe'n Yedhewon esa yn Yuda ha Yerusalem yn hanow Duw Ysrael, esa warnedha. 2Ena Zerubbabel mab Shealtiel, ha Yeshua mab Yosadak a sevis, ha dalleth dastrehevel chi Duw usi yn Yerusalem: ha gansa yth esa brofoesi Duw, orth aga gweres.

3Yn kettermyn Tattenay, governour an rannvro Dres-an-Avon, ha Shethar-bozenay, ha'ga heskowetha a dheuth dhedha, ha kewsel dhedha yndella, ‘Piw re ros dhywgh arghadow dhe dhrehevel an chi ma, ha dhe gowlwul an fosow ma?’ 4I a wovynnas orta ynwedh, ‘Pyth yw henwyn an wer esons ow trehevel an drehevyans ma?’ 5Mes yth esa lagas aga Duw ow kwitha war henavogyon an Yedhewon, ma na wrussons aga lettya, bys pan dheffa an derivas dhe Darius: ha bys pan vo degemmerys gorthyp dre lyther dhe'n mater ma.

6Dasskrif a lyther Tattenay, governour an rannvro Dres-an-Avon, ha Shethar-bozenay, ha'ga heskowetha an soedhogyon, esa yn rannvro Dres-an-Avon, a dhannvonsons dhe Darius an myghtern; 7i a dhannvonas lyther dhodho hag ynno skrifys veu yndellma:

Dhe Darius an myghtern. Salusyans oll.

8Re bo godhvedhys dhe'n myghtern, ni eth yn rannvro Yuda, dhe ji an Duw meur; yma ow pos drehevys gans meyn bras, hag yma prennyer desedhys y'n fosow, ha'n ober ma a bes gans diwysygneth, hag a sewen yn aga leuv.

9Ena ni a wovynnas orth an henavogyon na, ha leverel dhedha yndellma, ‘Piw re ros dhywgh arghadow dhe dhrehevel an chi ma, ha dhe worfenna an fosow ma?’ 10Ynwedh, ni a wovynnas orta aga henwyn rag avisya dhis, may skriffyn henwyn an wer o aga ledyoryon.

11Ha hemma yw an gorthyp a rosons dhyn: ‘Servysi Duw nev ha leur on ni, hag yth esons ow dastrehevel an chi a veu drehevys nans yw lies blydhen, may hwrug myghtern bras a Ysrael y dhrehevel ha gorfenna. 12Mes drefenn agan tasow dhe serri Duw nev, ev a's delivras yn leuv Nebukadnessar myghtern Babylon, an Kaldean, neb a dorras an chi ma dhe'n dor, ha doen an bobel yn-kerdh dhe Babylon.

13‘Byttegyns, yn kynsa blydhen Kyrus myghtern Babylon, Kyrus an myghtern a dhellos arghadow rag dastrehevel an chi ma a Dhuw. 14Ha'n lestri ynwedh gwrys a owr hag a arghans yn chi Duw, a wrug Nebukadnessar aga hemmeres mes a'n tempel usi yn Yerusalem, ha'ga dri a-ji dhe dempel Babylon – Kyrus an myghtern a's kemmeras mes a dempel Babylon, ha'ga ri dhe nebonan henwys Sheshbassar, neb a apoyntyas governour. 15Yn-medh ev dhodho, “Kemmer an lestri ma, ke, ha'ga gorra a-ji dhe'n tempel usi yn Yerusalem, ha gas chi Duw dhe vos dastrehevys yn y dyller.” 16Ena an keth Sheshbassar a dheuth, ha settya selyow chi Duw usi yn Yerusalem: hag a-dhia'n eur na bys lemmyn ev re beu ow pos drehevys, ha nyns yw gorfennys hwath.’ 17Ytho lemmyn, mar hevel da dhe'n myghtern, re hwiller yn kovadhow an myghtern, usi ena yn Babylon, mar peu arghadow dyllys gans Kyrus an myghtern dhe dhrehevel an chi ma a Dhuw yn Yerusalem. Ha dhannvones an myghtern y vynnas dhyn a-dro dhe'n mater ma.