Arghadow Darius

1Ena Darius an myghtern a dhellos arghadow, hag i a hwilas yn lyverva an dresorva, yn tyller mayth esa gwithys an tresoryow yn Babylon. 2Hag y feu kevys yn Ekbatana, yn kastell usi yn rannvro an Medys, rol-skrifa, hag y feu skrifys ynni yndellma:

‘Kovskrifenn: 3Yn kynsa blydhen Kyrus an myghtern, an myghtern a dhellos arghadow a-dro dhe ji Duw yn Yerusalem: Bedhes dastrehevys an chi, le mayth offrynnons sakrifisow, ha bedhes offrynnow leskys dres; tri-ugens kevelin a vydh y ughelder, ha tri-ugens kevelin y les, 4gans tri rew a veyn bras, hag unn rew a brenn; ha bedhes an kost res a-dhiworth tresorva an myghtern: 5hag ynwedh bedhes daskorrys an lestri gwrys a owr hag a arghans a ji Duw, a wrug Nebukadnessar aga hemmeres yn-mes a'n tempel usi yn Yerusalem, ha'ga dri dhe Babylon, ha bedhens dres arta dhe'n tempel usi yn Yerusalem, kettep onan dh'y dyller; ha ty a's gorr yn chi Duw.

6‘Rakhenna lemmyn, Tattenay, governour Dres-an-Avon, Shethar-bozenay, ha'gas keskowetha an soedhogyon usi y'n rannvro Dres-an-Avon, bedhewgh pell alena: 7na vellyewgh gans gweyth an chi ma a Dhuw; gesewgh governour an Yedhewon ha henavogyon an Yedhewon dhe dhrehevel an chi ma a Dhuw yn y dyller. 8Gans henna, my a dhyllo arghadow dhywgh, pyth dhe wul dhe'n henavogyon ma a'n Yedhewon rag dastrehevyans an chi ma a Dhuw: bedhes an kost res yn leun dhe'n wer ma a-boynt, ma na vons lestys, dhiworth tresorva an myghtern, toll an rannvro Dres-an-Avon. 9Ha pypynag may fo edhomm dhedha anodho, keffrys lodhnow yowynk ha hordhes hag eyn, rag offrynn leskys dhe Dhuw nev, gwaneth, hoelan, gwin, hag oyl, herwydh ordenans an oferysi usi yn Yerusalem. Bedhes res dhedha pub dydh heb falladow, 10mayth offrynnons sakrifisow plegadow dhe Dhuw an nev, ha pysi rag bewnans an myghtern, ha dh'y vebyon. 11Ynwedh, my re dhellos arghadow, piwpynag a janchyo an ordenans ma, bedhes prenn tennys yn-nans a'y ji, ha bos settys yn-bann, ha bedhes ev kregys warnodho ha bedhes y ji gwrys teylek. 12Ha'n Duw neb a wrug dh'y hanow triga ena, re dhomhwello myghtern po pobel pynag a ystynno leuv dhe janjya hemma, po dhe dhistrui an chi ma a Dhuw, usi yn Yerusalem. My Darius re dhellos arghadow; bedhes gwrys gans meur a rach.’

Kowlwrians an Tempel

13Ena Tattenay, governour an rannvro Dres-an-Avon, Shethar-bozenay, ha'ga heskowetha, a wrug herwydh an pyth a dhannvonas Darius an myghtern, gans meur a rach. 14Ha henavogyon an Yedhewon a dhrehevis, ha sewena dre brofoesans Haggay an profoes ha Zekaria mab Iddo. Hag i worfennas drehevel herwydh gorhemmynn Duw Ysrael, ha herwydh arghadow Kyrus, ha Darius, hag Artakserkses myghternedh Persia. 15Ha'n chi ma a veu kowlwrys yn tressa dydh an mis Adar, y'n hweghves blydhen a reyn Darius an myghtern.

16Ha mebyon Ysrael, an oferysi, ha'n Levysi, ha remenant mebyon an divroedh, a solempnyas sakrans an chi ma a Dhuw gans lowena. 17Rag sakrans an chi ma a Dhuw i a offrynnas kans lodhen, dew kans hordh, peswar kans oen; ha rag offrynn pegh rag oll Ysrael dewdhek bogh, herwydh niver loethow Ysrael. 18Hag i a settyas an oferysi yn aga rannow, ha'n Levysi yn aga bagasow, rag servis Duw yn Yerusalem, dell yw skrifys yn lyver Moyses.

Solempnyans an Pask

19Mebyon an divroedh a solempnyas an pask yn peswardhegves dydh an kynsa mis.6:19 Gwersow 6:19 bys 7:11 yw skrifys yn Ebrow. 20An oferysi ha'n Levysi re lanhasa aga honan war-barth; i oll o glan, hag i a ladhas an pask rag oll mebyon an divroedh, ha rag aga breder an oferysi, ha ragdha aga honan. 21Mebyon Ysrael hag a dhehwelis mes a'n divroedh, hag oll an re a junyas gansa ha diberth aga honan a-dhiworth mostedhes kenedhlow an tir, rag hwilas an Arloedh, Duw Ysrael, a dhybris, 22ha solempnya goel an bara heb goell dres seyth dydh gans lowena, rag an Arloedh a's lowenhas, ha treylya kolonn myghtern Asshur dhedha, rag aga gweres yn ober chi Duw, Duw Ysrael.