Devedhyans Ezra ha'y Ober

1Lemmyn wosa an hwarvosow ma, yn reyn Artakserkses myghtern Persia, Ezra mab Seraya, mab Azaria, mab Hilkia, 2mab Shallum, mab Sadok, mab Ahitub, 3mab Amaria, mab Azaria, mab Merayoth, 4mab Zerahia, mab Uzzi, mab Bukki, 5mab Abishua, mab Finehas, mab Eleazar, mab Aron an pennoferyas: 6an Ezra ma a dheuth yn-bann a-dhiworth Babylon; hag ev o skriba skentel yn lagha Moyses, a wrug an Arloedh Duw a Ysrael hy ri. An myghtern a wrontyas dhodho oll y worholedhow, rag bos leuv an Arloedh y Dhuw warnodho.

7Ha rann a vebyon Ysrael, ha rann a'n oferysi, an Levysi, an ganoryon, an borthoryon, ha'n Nethinim7:7 Nethinim: kethwesyon an tempel. eth yn-bann dhe Yerusalem ynwedh, y'n seythves blydhen a Artakserkses an myghtern. 8Ezra a dheuth dhe Yerusalem y'n pympes mis, henn o y'n seythves blydhen a'n myghtern. 9Ev a erviras mos yn-bann a-dhiworth Babylon yn kynsa dydh an kynsa mis, hag ev a dheuth dhe Yerusalem yn kynsa dydh an pympes mis, drefenn bos leuv dha y Dhuw warnodho. 10Rag Ezra re settsa y golonn dhe hwilas lagha an Arloedh, ha dh'y gul, ha dhe dhyski ordenansow ha breusow yn Ysrael.

Lyther Myghtern Artakserkses

11Ytho, ottomma dasskrif a'n lyther a wrug myghtern Artakserkses y ri dhe Ezra an oferyas, an skriba, dyskys yn mater gorhemmynnow an Arloedh, ha'y ordenansow rag Ysrael:

12Artakserkses, myghtern myghternedh. Dhe Ezra an oferyas, dyskys yn lagha Duw nev, salusyans. Ha lemmyn:7:12 Gwersow 7:12 bys 7:26 yw skrifys yn Aramaek.

13Arghadow yw dyllys genev, y hyll mos genes pubonan y'm ruvaneth a bobel Ysrael, ha'y oferysi ha'n levysi, yw bodhek dhe vos dhe Yerusalem. 14Rag ty yw dannvenys gans an myghtern, ha'y seyth kusulyador, may hwovynni a-dro dhe Yuda ha Yerusalem, herwydh lagha dha Dhuw usi y'th leuv; 15ha dhe dhoen an arghans ha'n owr a wra an myghtern ha'y gusulyadoryon profya a-vodh dhe Dhuw Ysrael, a'n jeves y drigva yn Yerusalem, 16hag oll an arghans ha'n owr a yllydh aga huntell yn rannvro Babylon oll, gans offrynnow bolonjedhek an bobel ha'n oferysi, ambosys a-vodh rag chi aga Duw usi yn Yerusalem. 17Gans an arghans ytho ty a vydh diwysyk ow prena lodhnow, hordhes, hag eyn, gans aga offrynnow greun hag offrynnow diwes, ha ty a's offrynn war alter chi agas Duw usi yn Yerusalem. 18Gans remenant an arghans ha'n owr ty ha'th vreder a yll gul pynagoll a havallo da, herwydh bodh agas Duw. 19Ty a dhelirv a-rag an Duw a Yerusalem an lestri a veu res dhis rag servis chi dha Dhuw. 20Ha pynagoll moy a vo edhomm dhis anodho rag chi dha Duw, mayth yw res dhis y ri, ty a yll y ri a-dhiworth tresorva an myghtern.

21Ha my, Artakserkses an myghtern ow honan, a dhyllo arghadow dhe oll an alhwedhoryon usi y'n rannvro Dres-an-Avon, may fo gwrys yn uskis pynagoll Ezra an oferyas, skriba lagha Duw nev, a wovynno orthowgh, 22bys kans talent a arghans, ha bys kans kor a waneth, ha bys kans bath a win,7:22 Talent : a-dro dhe 34 kilogramm. Kor: musur sygh, a-dro dhe hwegh bushel. Bath: a-dro dhe 22 liter. ha bys kans bath olew, ha hoelan heb ragsettya an myns. 23Pynagoll a vo erghys gans Duw nev, bedhes gwrys gans rach a-barth chi Duw nev: rag prag y fydh sorr erbynn myghterneth an myghtern ha'y vebyon? 24Bedhewgh avisys ynwedh, na vydh laghel beghya na toll-benn, na toll-wara, na toll-dir war denvyth a'n oferysi an Levysi, an ganoryon, an borthoryon, gwesyon an tempel, na servysi erell a'n chi ma a Dhuw.

25Ha ty, Ezra, herwydh furneth dha Dhuw, usi yn dha leuv, orden justisyow ha breusysi, a yll breusi oll an dus usi y'n rannvro Dres-an-Avon, oll an re a aswonn laghys dha Dhuw; ha dyskewgh neb na's aswonn. 26Ha piwpynag na vynno bos gostydh dhe lagha dha Dhuw ha lagha an myghtern, bedhes breus gwrys warnodho yn straght, po mernans, po divroedh, po kemmeryans y byth, po prisonyans.

27Benniges re bo an Arloedh, Duw agan tasow, re worras mater a'n par ma yn kolonn an myghtern, rag ri enor dhe ji an Arloedh usi yn Yerusalem, 28ha neb re ystynnas tregeredh dhymm a-rag y gusulyoryon hag oll soedhogyon alloesek an myghtern. Ha my a veu kennerthys, rag bos leuv an Arloedh ow Duw warnav, ha my a guntellas ledyoryon yn-mes a Ysrael rag mos yn-bann genev.