Pennow Teyluyow a Dhehwelis gans Ezra

1An re ma yw pennow teyluyow, ha'ga hovskrifans yn rol an aghskrifow, neb eth yn-bann genev a-dhiworth Babylon, yn reyn Artakserkses an myghtern. 2A vebyon Finehas, Gershom; a vebyon Ithamar, Daniel; a vebyon Davydh, Hattush 3a vebyon Shekania; a vebyon Parosh, Zekaria, ha ganso kans gour ha hanter-kans kovskrifys; 4a vebyon Pahath-moab, Eliehoenay mab Zerahia, ha ganso dew kans gour. 5Dhe vebyon Shekania; mab Yahaziel, ha ganso tri hans gour; 6a vebyon Adin, Ebed mab Yonathan, ha ganso hanter-kans gour; 7a vebyon Elam; Yeshaya mab Athalia, ha ganso deg gour ha tri-ugens; 8a vebyon Shefatia, Zebadia mab Mighael, ha ganso peswar-ugens gour; 9a vebyon Yoab, Obadia mab Yehiel, ha ganso dew kans gour hag etek; 10a vebyon Bani,8:10 Bani: Amendys dhiworth 1Esd 8:36. Shelomith mab Yosifia, ha ganso kans gour ha tri-ugens; 11a vebyon Bebay, Zekaria mab Bebay, ha ganso eth gour warn ugens; 12a vebyon Azgad, Yohanan mab Hakkatan, ha ganso kans gour ha deg; 13a vebyon Adonikam, an re a dheuth a-wosa, Elifelet, Yeiel ha Shemaia, ha gansa tri-ugens gour; 14a vebyon Bigvay, Uthay ha Zakkur, ha gansa deg gour ha tri-ugens.

Gwesyon an Tempel

15My a's kuntellas war-barth orth an avon a res troha Ahava; ha ni a gampyas ena tri dydh. My a dhaswelas an bobel ha'n oferysi, ha ny gevis ena denvyth a vebyon Levi. 16Ena my a dhannvonas war-lergh Eliezer, Ariel, Shemaia, Elnathan, Yarib, Elnathan, Nathan, Zekaria, ha Meshullam, ledyoryon; ynwedh Yoyarib hag Elnathan, gwer a skians. 17Ha my a's dannvonas dhe Iddo, an penn y'n tyller sans Kasifia, hag a dherivas dhedha an pyth y talvia dhedha leverel dhe Iddo ha'y vreder, an Nethinim,8:17an Nethinim: kethwesyon an tempel. yn Kasifia, may trollens dhyn menystrys rag chi agan Duw. 18Ha dre leuv dha agan Duw warnan i a dhros dhyn gour a skians da, a vebyon Mahli mab Levi, mab Ysrael; ha mebyon ha breder Sherebia, etek; 19ha Hashabia, ha ganso Yeshaia a vebyon Merari, y vreder ha'ga mebyon, ugens; 20ynwedh a'n Nethinim, a wrug Davydh ha'n bennsevigyon aga ordena rag gonisogeth an Levysi, dew kans hag ugens; i oll o kovskrifys dre hanow.

Penys ha Pysadow rag Difresyans

21Ena my a elwis rag penys ena, ryb an avon Ahava, mayth omuvelhyn a-rag agan Duw, rag hwilas a-dhiworto hyns heb kaletter ragon, ha rag agan fleghes, gans oll agan pythow. 22Rag meth a'm bia govynn orth an myghtern kowethas soudoryon ha marghogyon dh'agan gweres erbynn ladron fordh; rag ni a leveris dhe'n myghtern, ‘Yma leuv agan Duw war oll an re a'n hwila; mes yma y alloes ha'y sorr erbynn oll a'n eskas.’ 23Ytho ni a benysas ha pysi dh'agan Duw rag hemma, hag a woslowas orthyn.

Rohow rag an Tempel

24Ena my a settyas dhe denewen dewdhek a'n bennoferysi, Sherebia, Hashabia, ha deg a'ga breder, 25ha my a boesas dhedha an arghans ha'n owr, ha'n lestri, henn yw an offrynn rag chi agan Duw, a offrynnas an myghtern, ha'y gusulyadoryon, ha'y bennsevigyon, hag oll tus Ysrael esa ena. 26My a boesas yn aga diwla hwegh kans talent a arghans ha hanter-kans, ha kans talent a lestri gwrys a arghans, ha kans talent8:26 talent: A-dro dhe 34 kilogramm. a owr; 27ugens bason a owr, a vil dharik,8:27 dharik: Bath owrek persek. ha dew lester a vrons lentrus, mar dhrudh avel owr. 28Yn-medhav dhedha, ‘Hwi yw sans dhe'n Arloedh ha'n lestri yw sans ynwedh. An arghans ha'n owr yw offrynn bolonjedhek dhe'n Arloedh, Duw agas tasow; 29Goelyewgh, ha'ga gwitha, bys pan y's poesowgh yn helyow chi an Arloedh yn Yerusalem a-rag an bennoferysi ha'n Levysi, ha pennow teyluyow Ysrael.’ 30Ytho an oferysi ha'n Levysi a dhegemmeras poes an arghans ha'n owr ha'n lestri, rag aga doen dhe Yerusalem dhe ji agan Duw.

An Dehwelyans dhe Yerusalem

31Ena ni eth yn-kerdh dhiworth an avon Ahava yn dewdhegves dydh an kynsa mis, rag mos dhe Yerusalem; yth esa leuv agan Duw warnan, hag ev a'n sawyas dhiworth leuv an eskar, ha dhiworth neb a gontrewayt ryb an fordh. 32Ni a dheuth dhe Yerusalem, ha powes ena tri dydh. 33Lemmyn y'n peswora dydh an arghans ha'n owr ha'n lestri a veu poesys yn chi agan Duw yn leuv Meremoth mab Uria an oferyas. Ganso yth esa Eleazar mab Finehas, hag ynwedh an Levysi Yozabad mab Yeshua, ha Noadia mab Binnuy. 34An niver ha'n poes a bup-tra a veu komptys: ha'n poes kowal a veu kovadhys yn eur na.

35Ena mebyon an divroedh, o devedhys mes a'n gethneth, a offrynnas offrynnow leskys dhe Dhuw Ysrael, dewdhek lodhen rag oll Ysrael, hwetek hordh ha peswar-ugens, seytek oen ha tri-ugens, ha dewdhek bogh avel offrynn pegh: oll an re ma o offrynn leskys dhe'n Arloedh. 36Hag i a dhelivras arghadowyow an myghtern dhe wahalyethow an myghtern, ha dhe wovernours an rannvro Dres-an-Avon: hag i a skoedhyas an bobel ha chi Duw.