Salusyans

1Powl, abostol na dhiworth tus, na der unn den, mes dre Yesu Krist ha Duw an Tas neb a'n drehevis dhiworth an re varow, 2hag oll an vreder usi genev,

Dhe eglosyow Galatia:

3Gras dhywgh ha kres dhiworth Duw agan Tas ha'n Arloedh Yesu Krist, 4a omros y honan rag agan peghosow rag ma'gan deliffra mes a'n bys, drog dell yw y'n eur ma, herwydh bodh agan Duw ha Tas, 5ha dhodho re bo gordhyans bys vykken ha bynnari. Amen.

Nyns Eus Marnas Unn Aweyl

6Marth a'm beus drefenn hwi dhe gildenna mar uskis a-dhiworto ev neb a'gas gelwis yn gras Krist war-tu ha ken aweyl, 7– mes nyns eus aweyl arall, marnas yma tus neb a wra agas ankombra hag ow mynnes dihevelebi aweyl Krist; 8mes mar pydh pregewthys dhywgh genen ni po gans el dhiworth nev neb aweyl kontrari dhe'n pyth a bregewthsyn ni, re bo milliges. 9Kepar dell leversyn kyns, arta y'n eur ma y lavarav, mar pregoth neb den dhywgh ow kontradia an pyth a dhegemmersowgh, re bo milliges. 10Esov vy ytho owth assaya y'n eur ma perswadya tus po Duw? Po a hwilav plesya tus? Mar pen vy hwath ow plesya tus ny vien kethwas Krist.

Fatell Veu Powl Gwrys Abostol

11Rag my a vynn hwi dhe wodhvos, an aweyl pregewthys genev – nyns yw hi war-lergh mab-den 12rag ny's degemmeris dhiworth denvyth na ny's dyskis marnas dre dhiskwedhyans Yesu Krist.

13Rag re glewsowgh a'm fara seulabrys yn yedhowieth pan helghyn vy eglos Duw dres eghenn ha'y dhistrui, 14hag avonsya pella yn yedhowieth ages lies kevoes genev a'm kenedhel vy ha bos tynn dres eghenn rag hengovyow ow hendasow. 15Byttegyns pan vynnas Duw, neb a'm dibarthas a-dhia vrys ow mamm ha'm gelwel der y ras, 16diskwedhes y Vab ynnov, ma'n pregowtthen yn mysk an Jentilys, a-dhesempis ny wrug vy omgusulya gans kig na goes, 17na ny wrug vy yskynna bys yn Yerusalem dhe'n re o abesteli kyns es dell veuv vy abostol, mes yth yth dhe-ves dhe Arabia ha dehweles arta dhe Damaskus.

18Ena wosa teyr blydhen yth yskynnis bys yn Yerusalem dhe omgusulya gans Kefas, ha triga ganso pymthek dydh, 19mes ny welis abesteli erell vyth marnas Jamys broder an Arloedh. 20Y'n taklow a skrifav dhywgh, otta, Duw yn test, nyns ov vy gowek. 21Ena my a dheuth dhe ranndiryow Syria ha Kilikia. 22Mes nyns o ow fas aswonnys dhe eglosyow Yudi esa yn Krist; 23nyns esens ow klewes, marnas ‘Ev neb a'gan helghi seulabrys yma lemmyn ow pregoth an fydh a wre hy distrui seulabrys’; 24hag i a wordhyas Duw ynnov.