Powl ha'n Abesteli Erell

1Ena wosa peswardhek blydhen yth yskynnis arta dhe Yerusalem gans Barnabas, ow kemmeres Titus genev ynwedh; 2my a yskynnas dre dhiskwedhyans ha gorra a-dheragdha an aweyl a bregowthav yn mysk an Jentilys, yn priva dhe dus a vri, ma na vien ow poenya po na wrussen poenya war neb kor yn euver. 3Byttegyns Titus devri, esa genev, hag ev Grek, ny veu ev konstrynys na hwath a vos trodreghys; 4mes rag bos breder fekyl dres a-ji yn-dann gel, skolkyoryon a slynkyas a-ji rag aspia orth agan rydhses a'gan beus yn Krist Yesu, ma'gan drollens bys yn kethneth; 5ny omblegsyn ni toch vyth dhedha yn gostytter, may halla gwiryonedh an aweyl pesya ragowgh. 6Mes a-dhiworth an re a dybys bos neppyth, – py sort pynag yns ny vern dhymm; nyns usi Duw ow favera tremmynn denvyth – an dus enorys na, ny geworrsons travyth dhymmo vy, 7mes y'n kontrari parth hag i ow konvedhes bos an aweyl a antrodreghyans kemmynnys dhymm kepar dell veu an aweyl a drodreghyans dhe Peder, 8rag neb a wrug y ober yn Peder rag abostolieth an trodreghyans a wrug y ober ynwedh ynnov vy rag an Jentilys, 9hag ow konvedhes an gras re beu res dhymm, Jamys ha Kefas ha Yowann, hag i an kolovenyow dell dybys, a ros an dhorn dhyghow a gowethyans dhymm ha dhe Barnabas, mayth ellen ni dhe'n Jentilys, hag i aga honan dhe'n dus trodreghys; 10marnas i a vynnas orthyn perthi kov a'n voghosogyon, an keth tra may feu hwans dhymm dh'y wul.

Powl a Geredh Peder yn Antiogh

11Mes pan dheuth Kefas dhe Antiogh, my a sevis er y bynn orth y anow, rag y vos dhe vlamya. 12Rag kyns neb tus dhe dhos dhiworth Jamys, ev a dhybri gans an Jentilys; mes pan dheuthons i, ev a omdennas ha diberth ow perthi own a dus an trodreghyans. 13Ha'n Yedhewon erell a junyas ganso y'n falsuri ma, may feu Barnabas ynwedh ledys yn stray gansa der aga falsuri. 14Mes pan gonvedhis vy na gerdhens i yn ewnhynsek herwydh gwiryonedh an aweyl, my a leveris dhe Kefas a-dheragdha yn kettep penn, ‘Mar pewydh jy, ha ty Yedhow, yn maner an Jentilys ha ny vewydh yn maner an Yedhewon prag y konstrynydh jy an Jentilys a vewa kepar dell vens i Yedhewon?’

Yedhewon ha Jentilys Ewnhes dre Fydh

15Ni yw Yedhewon dre enesigeth ha nyns on ni peghadoryon a'n Jentilys, 16ow konvedhes nag yw denvyth ewnhes der oberow a'n lagha mes dre fydh yn Krist Yesu, ha nyni a grysis yn Krist Yesu, may fen ni justifiys dre fydh yn Krist hag a-der dre oberow a'n lagha; rag ny vydh kig vytholl justifiys der oberow a'n lagha. 17Mes mars on ni, neb a hwila bos justifiys yn Krist, agan honan kevys dhe vos peghadoryon, yw Krist ytho menyster a begh? Bynner re bo! 18Rag mar tastrehavav an taklow a dhistruis vy, my a dhiskwa my ow honan dhe vos treuspasser. 19Rag der an lagha my a verwis dhe'n lagha, may fewen vy dhe Dhuw. Krowsys veuv gans Krist; 20bew ov, mes na fella my ow honan, mes Krist a vew ynnov; an bewnans a'm beus y'n eur ma y'n kig my a vew yn fydh Mab Duw neb a'm karas hag omri y honan ragov. 21Ny wrav vy dilea gras Duw; rag mar pe ewnder der an lagha ytho Krist a verwis yn euver.