1My a lever, nag yw an her, hag ev hwath flogh, dihaval dhe gethwas, kynth yw ev mester a bup-tra, 2mes yma ev yn-dann withysi ha governours bys pan dheffo an termyn settys gans an tas. 3Yndella ni ynwedh, pan en ni fleghes, o synsys yn kethneth gans elvennow an bys ma; 4mes pan dheuth keweras an oes, Duw a dhellos y Vab, genys a venyn, genys yn-dann lagha, 5rag dasprena an re esa yn-dann lagha, may fen ni degemmerys avel mebyon. 6Drefenn agas bos mebyon, Duw a dhellos Spyrys y Vab bys yn agan kolonn, ow kria ‘Abba, a Das.’ 7Ytho nyns osta keth na fella mes mab; ha mars osta mab ytho ynwedh her dre Dhuw.4:7 dre Dhuw: War-lergh re a'n dornskrifow dre Grist.

Powl a Reprev Tus Galatia

8Byttegyns y'n eur na pan na aswonnsowgh hwi Duw, yth ewgh kethyon dhe'n re nag yw duwow dre natur; 9mes y'n eur ma owth aswonn Duw, mes moy yn tevri aswonnys gans Duw, fatell esowgh ow treylya arta war-tu ha'n elvennow gwann hag ydhil, may fynnowgh bos arta kethyon dhedha avel kyns? 10Dy'goelyow a solempnyowgh hwi dour, ha misyow ha termynyow ha blydhynyow. 11Yma own dhymm ragowgh, my dhe lavurya war neb kor yn euver ragowgh.

12Dewgh ha bos kepar dell ov vy, my a'gas pys, a vreder, ha my a'n keth par ha hwi. Ny wrussowgh hwi kamm vyth dhymm; 13mes hwi a woer, dre gleves a'n kig y pregewthis dhywgh y'n dalleth, 14hag yn despit dhe'n prevyans a veu dhywgh y'm kig, ny wrussowgh hwi dispresya na fia, mes hwi a'm degemmeras kepar hag el a Dhuw, kepar ha Krist Yesu. 15Ple'ma agas bennesikter ytho? Rag desta a wrav, y hwrussewgh terri mes agas dewlagas, mar kallewgh, ha'ga ri dhymm. 16Ytho a dheuth vy ha bos agas eskar rag my dhe leverel an gwirder dhywgh? 17Diwysyk yns i ragowgh, drog aga bodh, ha mynnes orthowgh bos kes mes, rag may fowgh hwi diwysyk a-barth dhedha i. 18Da yw bos diwysyk pup-prys pan vo an acheson onan da, heb bos unnsel yndella pan esov vy yn agas mysk. 19Ow fleghesigow, mayth esov arta yn gloesow genesigeth ragowgh bys pan vo Krist formys ynnowgh, 20my a vynna bos yn agas mysk y'n eur ma ha chanjya ow lev, rag dout a'm beus ahanowgh.

Ensampel Hagar ha Sara

21Leverewgh dhymm, hwi a vynn bos yn-dann lagha, a ny glewowgh an lagha? 22Rag skrifys yw bos dew vab dhe Abraham, an eyl a gethes ha'y gila a venyn rydh. 23Mes mab an gethes a veu genys war-lergh an kig, ha'n mab a venyn rydh der ambos. 24An re ma yw leverys avel allegori; rag an re ma yw dew gevambos, honna dhiworth menydh Sinay, ow tineythi rag kethneth, yw Hagar. 25Hagar yw menydh Sinay yn Arabia hag a styr Yerusalem, kepar dell yw y'n eur ma, rag kethes yw hi keffrys ha'y fleghes. 26Mes an Yerusalem usi a-vann yw frank, neb yw agan mamm. 27Rag skrifys yw,

‘Lowenha, ty anvap, neb na dhineyth,

tardh yn garmow a lowena, ty na lavur yn genesigeth,

rag yma lies flogh dhe'n venyn forsakys,

moy es hy ben neb a's teves gour.’

28Hwi, a vreder, yw fleghes a'n ambos kepar hag Ysak. 29Mes kepar dell wrug y'n eur na neb a veu genys war-lergh an kig helghya neb a veu genys war-lergh an Spyrys, yth or yndella hwath y'n eur ma. 30Mes pandr'a lever an skryptor? Pellha an gethes ha'y mab, rag ny vydh mab an gethes her war-barth gans mab an venyn rydh. 31Rakhenna, a vreder, nyns on ni fleghes a'n gethes mes a'n venyn rydh.