Gwithewgh agas Rydhses

1Rag rydhses5:1 Rag rydhses: Po Gans rydhses. y hwrug Krist agan delivra; rakhenna sevewgh fast, na vedhewgh maglennys arta yn-dann yew a gethneth.

2Ottavy, Powl, ow leverel dhywgh, mar pydhowgh hwi trodreghys ny vydh Krist travyth dh'agas les. 3Desta a wrav dhe bub den a dhegemmer trodreghyans y fydh kendoner dhe synsi oll an lagha. 4Hwi yw diberthys dhiworth Krist, hwi neb yw justifiys der an lagha, koedhys dhiworth gras. 5Rag ni, der an Spyrys, a wayt gans mall an govenek a ewnder, dre fydh. 6Rag yn Krist Yesu ny wrer fors a drodreghyans nag a antrodreghyans, mes a fydh owth oberi dre gerensa.

7Yth esewgh hwi ow poenya yn ta; piw a'gas lettyas a obaya dhe'n gwiryonedh? 8Ny dheuth an tennvos dhiworth neb a'gas gelow. 9Temmik a woell a wra dhe oll an toes sevel. 10Fydhyans a'm beus yn agas kever y'n Arloedh, na vydh dhywgh tybyans nahen, mes neb a'gas ankomber a wra godhevel an dial piwpynag a vo. 11Mes my, a vreder, mar pregowthav vy hwath an trodreghyans, prag yth ov vy helghys hwath? Offens an grows re beu defendys ytho. 12My a vynnsa, yth omspattha aga honan an re a'gas ankomber.

13Rag hwi a veu gelwys dhe rydhses, a vreder, saw na wrewgh dhe'n rydhses ri spas dhe'n kig, mes dre gerensa bedhewgh servysi an eyl dh'y gila. 14Rag oll an lagha yw kollenwys yn unn lavar: ‘Kar dha gentrevek kepar dell omgerydh dha honan.’ 15Mar kwrewgh bratha ha lenki an eyl y gila bedhewgh war ma na vowgh konsumys an eyl gans y gila.

An Spyrys ha'n Kig

16Y lavarav, kerdhewgh war-lergh an Spyrys, saw na wrewgh kollenwel lust an kig. 17Rag an kig a wra hwansa kontrari dhe'n Spyrys, ha'n Spyrys kontrari dhe'n kig, rag an re ma yw kontrari an eyl dh'y gila, ma na wryllowgh gul an pyth a vynnowgh. 18Saw mars owgh hwi ledys der an Spyrys, ena nyns esowgh hwi yn-dann an lagha. 19Oberow an kig yw apert; an re ma yw fornikasyon, mostedhes, fara direwl,5:19 fornikasyon, mostedhes, fara direwl: War-lergh re a'n dornskrifow avoutri, fornikasyon, mostedhes, fara direwl. 20gordhyans idolys, pystri, kas, strif, envi, sorr, strif, fowt akord, eresys, 21avi, medhwenep, kevewiow gwyls, ha traow a'n par na. Anedha my a lever dhywgh lemmyn, kepar dell wrugavy leverel kyns, oll an re a wrello taklow a'n par ma ny wrons erita gwlaskor Duw.

22Mes frut an Spyrys yw kerensa, lowena, kres, perthyans, kuvder, dader, lenduri, 23jentylys, omrewl; nyns eus lagha vyth erbynn traow a'n par na. 24Seul eus dhe Grist Yesu re growsyas an kig, keffrys ha'n yeunesow ha'n hwansow. 25Mar pewyn der an Spyrys, kerdhyn ynwedh der an Spyrys. 26Na vedhen goethus, ow serri an eyl y gila, ow perthi avi an eyl a'y gila.