Degewgh Beghyow Keskristonyon

1A vreder, mar pe nebonan kechys yn kammweythres, hwi, usi a'n Spyrys, restoryewgh den a'n par na yn spyrys a jentylys. Mir orthis dha honan, ma na vi temptys ynwedh. 2Degewgh agas beghyow an eyl a-barth y gila, hag yndella hwi a gollenow lagha Krist. 3Rag mar tyb neb den y vos neppyth pan nag yw ev travyth, ev a omdoell. 4Mes preves pubonan y ober y honan, hag ena y'n jevydh skila rag bostyans ynno ev y honan, a-der yn den arall; 5rag pubonan a dheg y vegh y honan.

6Neb yw katekumenus y'n ger, kevrennes gans an dyskador yn pup-tra yw da.

7Na vedhewgh toellys: ny vydh Duw skornys. Rag pypynag a wra den y hasa, an keth henna a wra ev y vysi; 8rag neb a wra hasa dh'y gig y honan, dhiworth an kig ev a wra mysi podredhes; mes neb a wra hasa dhe'n Spyrys, dhiworth an Spyrys y hwra ev mysi bewnans heb diwedh. 9Yn masobereth na vedhen digolonnek; rag y'n prys ewn y hwren ni mysi mar ny glamderyn. 10Ytho, hedre vo spas dhyn, gwren ni da dhe bubonan, ha kyns oll dhedha i usi a'n teylu a fydh.

Gwarnyans Diwettha

11Mirewgh ass yw bras an lytherennow may skrifis vy dhywgh gans ow dorn ow honan. 12An re a vynn gul omdhiskwedhyans teg y'n kig a'gas konstryn dhe vos trodreghys, unnsel ma na vons i helghys rag krows Krist. 13Rag ny wra an re yw trodreghys obaya dhe'n lagha aga honan, mes i a vynn orthowgh bos trodreghys may hallons bostya yn agas kig. 14Bynner re bo bostyans dhymmo vy, saw yn krows agan Arloedh Yesu Krist, ha dredhi an bys ma krowsys dhymm ha my dhe'n bys. 15Rag ny amont mann naneyl trodreghyans nag antrodreghyans, saw unnsel kreasyon nowydh. 16Ha kemmys a gerdh war-lergh an rewl ma, re bo kres warnedha ha tregeredh, ha war Ysrael Duw.

17Alemma rag, bynner re wrello denvyth ri troblow dhymm; rag my a deg merkyow Yesu war ow horf.

18Re bo gras agan Arloedh Yesu Krist gans agas spyrys, a vreder. Amen.