Dibarth Lot dhiworth Abram

1Ytho Abram eth yn-bann yn-mes a Ejyp troha'n Negeb, ev ha'y wreg, ha pup-tra esa dhodho, ha Lot ganso. 2Pur rych o Abram gans chatel, arghans hag owr. 3Hag ev eth yn y gerdhow dhiworth an Negeb dhe Bethel, bys y'n tyller may fia y dylda y'n dalleth yntra Bethel hag Ay, 4bys yn tyller an alter re wrussa y'n dalleth; hag ena Abram a elwis war hanow an Arloedh.

5Mes Lot ynwedh, neb esa ow mos gans Abram, a'n jeva flokkys ha chatel ha tyldow, 6ha ny ylli an tir aga sostena, hag i trigys war-barth, rag bos bras aga fyth, ma na yllens triga war-barth. 7Ytho yth esa strif yntra bugeledh chatel Abram ha bugeledh chatel Lot. Yth esa an Kananysi ha'n Perizzysi trigys ena y'n pow.

8Hag yn-medh Abram dhe Lot, ‘My a'th pys, na vedhes strif yntra my ha ty hag yntra dha vugeledh jy ha'm bugeledh vy, rag breder on ni. 9A nyns usi oll an tir a-dheragos? Diberth dhiworthiv, dell yth pysav. Mar mynnydh kemmeres an barth kledh, my a gemmer an barth dhyghow, ha mar kemmerydh an barth dhyghow my a gemmer an barth kledh.’

10Ha Lot a dhrehevis y dhewlagas ha gweles oll an plen a-dro dhe'n Yordan, oll anodho dhe vos dowrhes – kyns an Arloedh dhe dhiswul Sodom ha Gomorra – kepar ha lowarth an Arloedh, kepar ha pow Ejyp ha ty ow tos bys yn Soar. 11Ha Lot a dhewisas oll an plen a-dro dhe'n Yordan dhodho y honan, ha Lot a dravalyas troha'n howldrevel hag i a dhibarthas an eyl dhiworth y gila. 12Yth esa Abram trigys yn pow Kanan, hag yth esa Lot trigys yn sitys an plen, ha kavoes gwiryow peuri13:12 kavoes gwiryow peuri: Posettya y dylda. bys Sodom. 13Mes tus Sodom o tebel ha peghadoryon dres eghenn dherag an Arloedh.

14Ha'n Arloedh a leveris dhe Abram, wosa bos Lot diberthys dhiworto, ‘Drehav dha dhewlagas, ha mir dhiworth an tyller mayth esos troha'n kledh, ha'n dyghow, ha'n howldrevel, ha'n howlsedhes. 15Rag my a re oll an tir a welydh dhiso jy ha dhe'th has bys vykken. 16Ha my a wra dha has kepar ha doust an dor: mar kyll den nivera doust an dor, dha has ynwedh a yll bos niverys. 17Sav yn-bann, kerdh der an pow, der y hys ha der y les, rag my a vynn y ri dhiso.’

18Ena Abram a gavas gwiryow peuri13:18 a gavas gwiryow peuri: Poa removas y dylda. ha dos ha triga ryb derow Mamre usi yn Hebron ha drehevel alter dhe'n Arloedh y'n tyller na.