Kevambos Duw gans Abram

1Wosa an taklow ma, ger an Arloedh a dheuth dhe Abram yn gwelesigeth, ow leverel, ‘Na borth own, Abram, my yw dha skoes, dha wober pur vras.’ 2Hag yn-medh Abram, ‘Arloedh Duw, pandr'a vynn'ta ri dhymm, rag yth ov prest heb flogh, ha her ow chi a vydh Eliezer a Damaskus?’ 3Hag yn-medh Abram, ‘Awotta, ny wruss'ta ri has dhymm, hag awotta, onan genys y'm chi vy a vydh ow her.’ 4Hag awotta, ger an Arloedh a dheuth dhodho ow leverel, ‘Ny vydh hemma dha her, mes neb a dheu yn-mes a'th kolodhyon jy, ev a vydh dha her.’ 5Hag ev a'n dros mes a-ji ha leverel, ‘Mir lemmyn troha'n nev ha reken niver an ster, mar kyllydh aga nivera.’ Hag yn-medh ev dhodho, ‘Yndella y fydh dha has.’ 6Hag ev a grysis y'n Arloedh, neb a'n reknas dhodho avel ewnder.

7Hag ev a leveris dhodho, ‘My yw an Arloedh a'th tros mes a Ur an Kaldeanys dhe ri dhis an pow ma dh'y gavoes yn perghennogeth.’ 8Hag yn-medh ev, ‘A Arloedh Duw, fatell allav vy godhvos my dh'y gavoes yn perghennogeth?’ 9Hag ev a leveris dhodho, ‘Kemmer ragov lejek tri bloedh ha gaver tri bloedh ha hordh tri bloedh ha turenn, ha kolomm yowynk.’ 10Ytho ev a gemmeras oll an re ma ragdho ha'ga treghi yn diw rann der an kres, ha gorra pub hanter an eyl a-dal y gila; mes ny troghas an ydhyn yn diw rann. 11Ha pan dheuth an ydhyn-preydh yn-nans war an korfow, Abram a's chasyas dhe-ves.

12Ha pan esa an howl ow sedhi, kosk down a goedhas war Abram, hag awotta, euth, tewolgow bras, a goedhas warnodho. 13Ena ev a leveris dhe Abram, ‘Godhvydh yn sur y fydh dha has alyons yn pow nag yw dhedha i, hag i a wra aga servya; hag i a wra aga arwaska peswar kans blydhen. 14Ha'n genedhel ynwedh a wrons i servya, my a wra hy breusi; ha wosa henna i a dheu yn-mes gans rychys meur. 15Ha ty a wra mos dhe'th tasow yn kres, ha bos ynkleudhys yn kothni dha. 16Y'n peswora henedh i a dhehwel omma; rag ny vydh kowlwrys na hwath kammweyth an Amorysi.’

17Hag y hwarva, pan sedhis an howl hag yth o tewl, awotta, forn ow megi ha faglenn ow leski a dremenas ynter an rannow na. 18An keth jydh na an Arloedh a wrug kevambos gans Abram, ow leverel, ‘My re ros an tir ma dhe'th has, dhiworth avon Ejyp bys y'n avon vras, an avon Ewfrates, 19tir an Kenysi, an Kenizzysi an Kadmonysi, 20an Hittysi, an Perizzysi, an Refaim, 21an Amorysi, an Kananysi, an Girgashysi ha'n Yebusysi.’