Tokyn an Kevambos

1Ha pan o Abram nownsek bloedh ha peswar-ugens, an Arloedh a omdhiskwedhas dhe Abram ha leverel dhodho, ‘Duw Ollgalloesek17:1 Duw Ollgalloesek: Ebrow El Shadday. ov vy. Kerdh a-dheragov, ha bydh divlam. 2Ha my a wra ow hevambos yntra my ha ty, ha my a wra dha gressya dres eghenn.’ 3Hag Abram a goedhas war y fas ha Duw a gewsis ganso, ow leverel, 4‘Dhe'm parth evy, awotta ow hevambos genes: ty a vydh an tas a genedhlow pals. 5Ny vydh dha hanow Abram namoy, mes dha hanow a vydh Abraham, rag my a'th wra an tas a genedhlow pals. 6Ha my a'th wra dhe dhoen meur a frut, ha my a wra kenedhlow ahanas, ha myghternedh a dheu yn-mes ahanas. 7Ha my a fast ow hevambos yntra my ha ty, ha'th has war dha lergh yn aga henedhow avel kevambos bys vykken, dhe vos Duw dhiso, ha'th has war dha lergh. 8Ha my a re dhis, ha dhe'th has war dha lergh, an pow mayth esos ow kodriga ynno, oll an tir a Kanan dh'y berghenna bys vykken, ha my a vydh aga Duw.’

9Hag yn-medh Duw dhe Abraham. ‘Dhe'th parth tejy, ty a with ow hevambos, ty ha'th has war dha lergh yn aga henedhow. 10Hemm yw ow hevambos a wre'ta y witha, yntra my ha hwi ha'th has war dha lergh. Pub gorreydh ahanowgh a vydh trodreghys 11Ha hwi a wra trodreghi kig agas kudhgenn ha hemma a vydh tokyn a'n kevambos yntra my ha hwi. 12Ha nebonan yn agas mysk a vo eth dydh y oes a vydh trodreghys, pub flogh gorow der agas henedhow neb yw genys y'th chi po nebonan nag yw dha has jy prenys gans mona dhiworth estren. 13Neb yw genys y'th chi ha neb yw prenys gans mona a dal bos trodreghys; ow hevambos a vydh a-bervedh y'th kig rag kevambos bys vykken. 14Ha gorreydh heb trodreghyans, nag yw trodreghys kig y gudhgenn, treghys dhe-ves dhiworth y bobel vydh an enev na; ev re dorras ow hevambos.’

15Ha Duw a leveris dhe Abraham, ‘Saray dha wreg, ny wre'ta gelwel hy hanow Saray, mes Sara a vydh hy hanow. 16Ha my a vynn hy benniga ha ri dhis mab dhiworti hi ynwedh, ha hi a dheu ha bos kenedhlow; myghternedh poblow a dheu dhiworti.’ 17Ena Abraham a goedhas war y fas ha hwerthin ha leverel yn y golonn, ‘A vydh flogh dineythys dhe wour kans bloedh y oes? Hag a wra Sara dineythi, deg bloedh ha peswar-ugens bloedh hy oes?’ 18Hag yn-medh Abraham dhe Dhuw, ‘Unnweyth a kwrella Yshmael bewa y'th wolok!’ 19Hag yn-medh Duw, ‘Sara dha wreg a dhineyth mab, ha ty a elow y hanow Ysak, ha my a fast ow hevambos ganso avel kevambos bys vykken rag y has war y lergh. 20Ha rag Yshmael, my re'th klewas. Awotta, my a wra y venniga, ha gul dhodho doen frut, ha'y gressya dres eghenn. Ev a dhineyth dewdhek pryns ha my a'n gwra dhe vos kenedhel vras. 21Mes my a fast ow hevambos gans Ysak, neb a wra Sara y dhineythi dhis y'n termyn ma a'n vlydhen a dheu.’

22Hag ev a astelas kewsel ganso, ha Duw eth yn-bann dhiworth Abraham. 23Hag Abraham a gemmeras Yshmael y vab, ha pub kethwas re bia genys yn y ji, ha peub re bia prenys gans mona, pub gorreydh yn mysk tus chi Abraham, ha trodreghi kig aga hudhgenn an keth jydh na, kepar dell wrussa Duw y leverel dhodho. 24Hag Abraham o nownsek bloedh ha peswar-ugens pan veu trodreghys kig y gudhgenn. 25Hag Yshmael a veu trydhek bloedh pan veu trodreghys yn kig y gudhgenn. 26An keth jydh na y feu Abraham hag Yshmael y vab trodreghys; 27hag oll an wer a'y ji, an re genys y'n chi, ha'n re prenys gans mona dhiworth estren, a veu trodreghys ganso.