Distruyans Sodom ha Gomorra

1An dhew el a dheuth dhe Sodom gorthugherweyth, ha Lot esa owth esedha orth yet Sodom. Ha pan y's gwelas, Lot a sevis dh'aga metya hag omblegya, ha'y fas war-tu ha'n leur. 2Hag yn-medh ev, ‘Ow arlydhi, treylyewgh, dell y'gas pysav, a-berth yn chi agas gwas; trigewgh dres nos, ha golghi agas treys. Ena hwi a sev a-varr ha mos war agas fordh.’ Yn-medhons i, ‘Na vynnyn, ni a vynn spena an nos y'n plen.’ 3Mes ev a ynnias warnedha yn fras, hag i a dreylyas dhodho hag entra a-bervedh yn y ji, hag ev a wrug kevewi ragdha ha pobas bara heb goell hag i a dhybris. 4Mes kyns i dhe wrowedha, gwer an sita, gwer Sodom, a dheuth oll a-dro dhe'n chi, yowynk ha loes, oll an bobel, dhiworth pub le, 5hag i a elwis Lot ha leverel dhodho, ‘Ple'ma an wer a dheuth dhis nyhewer? Doro i yn-mes dhyn ni, may hwryllyn aga aswonn.’ 6Ha Lot eth yn-mes dhedha orth an daras, ha degea an daras a-dryv dhodho, 7ha leverel, ‘Ow breder, my a'gas pys, na wrewgh tra mar debel. 8Awotta lemmyn, yma dhymm diw vyrgh na aswonnsons gour. Gesewgh vy dh'aga dri yn-mes dhywgh, ha gwrewgh hwi dhedha dell vo plegadow dhywgh, saw na wrewgh travyth dhe'n wer ma. Rag henna y teuthons i yn-dann woskes ow tho vy.’ 9Hag yn-medhons i, ‘Sav a-denewen!’ Hag yn-medhons i arta, ‘An gwas ma re dheuth omma avel alyon, hag ev a vedh agan breusi. Lemmyn ni a vynn dha dhyghtya gweth es an re na.’ Hag i a waskas yn harow war an gour, war Lot, ha dos nes, rag terri an daras. 10Mes an wer a worras aga dorn yn-mes ha tenna Lot a-bervedh y'n chi dhedha ha degea an daras. 11Hag i a weskis an wer esa orth daras an chi gans dellni, byghan ha bras, ma na allsons kavoes an daras.

12Hag yn-medh an wer19:12 an wer: Henn yw an dhew el. dhe Lot, ‘Eus tus erell genes omma? Deuv, ha'th vebyon ha'th vyrghes, ha piwpynag a vo dhis y'n sita – doro i mes a'n tyller, 13rag ni a vynn distrui an tyller ma rag bos aga garm gyllys bras dherag an Arloedh, ha'n Arloedh re'gan dannvonas dh'y dhistrui.’ 14Ha Lot eth yn-mes ha kewsel gans y dheuvyon a dhemmedhis y vyrghes ha leverel, ‘Sevewgh yn-bann, kewgh yn-kerdh yn-mes a'n tyller ma, rag an Arloedh a vynn distrui an sita ma.’ Mes dh'y dheuvyon yth heveli ev dhe vos den ow kul ges.

15Ha pan dheuth golow dydh, an eledh a ynnias war Lot, ow leverel, ‘Sav yn-bann, kemmer dha wreg ha'th tiw vyrgh usi omma ma na vi diswrys yn kessydhyans an sita.’ 16Mes ev a dhelatyas, ytho an wer a settyas dalghenn yn y leuv ha leuv y wreg ha leuv y dhiw vyrgh, a-ban gemmeras an Arloedh truedh anodho; hag i a'n dros yn-mes, ha'y worra mes a'n sita 17Ha pan wrussens aga dri yn-mes, yn-medhons,19:17 yn-medhons: Ow siwya an Septuagint, an Syriek ha'n Vulgat. Ebrow yn-medh ev. ‘Fi rag dha vewnans. Na wra mires a-dryv dhis, na gortos le vyth y'n plen a-dro; fi dhe'n menydh ma na vi diswrys.’ 18Hag yn-medh Lot dhedha, ‘A, nansi, ow Arloedh! 19Awotta lemmyn, dha servont re gavas gras y'th wolok ha ty re gressyas dha dregeredh re wruss'ta genev ow sawya ow bewnans; ha ny allav fia dhe'n menydh, rag own a'n droktra dhe'm kemmeres ha my dhe verwel. 20Awotta lemmyn, ogas yw an sita ma dhe fia dhedhi, ha byghan yw hi. A, gas vy dhe skapya ena (a nyns yw hi onan byghan?) ha'm enev a vew.’ 21Hag yn-medh ev dhodho, ‘Otta, my a wront dhis dha vynnas y'n mater ma ynwedh. Ny wrav vy domhwel an sita ma re wruss'ta kewsel anedhi. 22Gwra fistena, fi ena, rag ny allav gul travyth erna dhyffi ena.’ Rag henna an sita a veu gelwys Soar. 23Drehevys veu an howl war an dor pan entras Lot yn Soar.

24Ena an Arloedh a asas glaw loskven dhe goedha war Sodom ha Gomorra ha tan dhiworth an Arloedh yn-mes a nev. 25Hag ev a dhomhwelas an sitys na hag oll an plen a-dro ha trigoryon oll an sitys ha'n pyth esa ow tevi war an dor. 26Mes gwreg Lot, esa a-dryv dhodho, a viras war-dhelergh ha mos ha bos pilar a hoelan. 27Hag Abraham eth myttin a-varr dhe'n tyller may hwrussa sevel dherag an Arloedh. 28Hag ev a viras war-woeles troha Sodom ha Gomorra ha trohag oll an plen a-dro, ha gweles, hag otta, yth esa mog an pow ow mos yn-bann kepar ha mog fornes.

29Ha pan dhistruis Duw sitys an plen, Duw a borthas kov a Abraham ha dannvon Lot yn-mes a gres an domhwelyans pan dhomhwelas an sitys mayth esa Lot trigys a-bervedh ynna.

Moab hag Ammon

30Ha Lot eth yn-bann mes a Soar ha triga y'n vro venydhyek ha'y dhiw vyrgh ganso, rag own a'n jeva a driga yn Soar, hag yth esa trigys yn kav, ev ha'y dhiw vyrgh. 31Ha'n kynsa-genys a leveris dhe'n yowynka, ‘Koth yw agan tas ha nyns eus gour vyth y'n norvys a dheffo a-bervedh dhyn ni war-lergh gis oll an norvys. 32Deun, gwren ni gul dh'agan tas eva gwin ha ni a wrowedh ganso, may hyllyn gwitha has der agan tas.’ 33Hag i a wrug dh'aga thas eva gwin an nos na, ha'n kynsa-genys a dheuth ha growedha gans hy thas, ha ny wodhva ev pan wrowedhas hi, na pan sevis yn-bann. 34Ha ternos y hwarva an kynsa-genys dhe leverel dhe'n yowynka, ‘Awotta, my a wrowedhas de gans ow thas. Gwren ni gul dhodho eva gwin haneth ynwedh, ha ke tejy dhe wrowedha ganso, may hyllyn gwitha has der agan tas.’ 35Ytho i a wrug dh'aga thas eva gwin an nos na ynwedh, ha'n yowynka a sevis yn-bann ha growedha ganso, ha ny wodhva ev pan wrowedhas hi, na pan sevis hi yn-bann. 36Ytho, diw vyrgh Lot a gonsevyas der aga thas. 37Ha'n kynsa-genys a dhineythis mab ha gelwel y hanow Moab; an keth hemma yw tas an Moabysi bys y'n jydh hedhyw. 38Ha'n yowynka, hi ynwedh a dhineythis mab ha gelwel y hanow Ben-ammi; an keth hemma yw tas an Ammonysi bys y'n jydh hedhyw.