Ysak ha Rebeka

1Gyllys koth o Abraham yn y dhydhyow, ha'n Arloedh re vennigsa Abraham yn pup-tra. 2Hag yn-medh Abraham dh'y servont, an kottha a'y vayni esa ow rewlya war bup-tra esa dhodho, ‘Gorr dha leuv yn-dann ow mordhos, my a'th pys, 3ha my a wra dhis ti re'n Arloedh, Duw an nevow ha Duw an norvys, na wre'ta kemmeres gwreg rag ow mab a vyrghes an Kananysi, mayth esov trigys yn aga mysk. 4Mes ke dhe'm pow vy ha dhe'm kerens ha kemmer gwreg rag ow mab, rag Ysak.’ 5Hag yn-medh an servont dhodho, ‘Martesen ny vynn an venyn dos war ow lergh a-ji dhe'n pow ma. A goedh dhymm gul dhe'th vab dehweles dhe'n pow may hwruss'ta dos dhiworto?’ 6Yn-medh Abraham dhodho, ‘Bydh war na wre'ta gul dhe'm mab dehweles ena. 7An Arloedh Duw a'n nevow neb a'm kemmeras dhiworth chi ow thas ha pow ow genesigeth24:7 genesigeth: Po neshevin. ha neb a gewsis genev ha neb a dos dhymm, ow leverel, “My a re an pow ma dhe'th has”, ev a dhannvon y el a-dheragos, ha ty a gemmer gwreg rag ow mab alena. 8Mes mar ny vynn an venyn dos war dha lergh, ena kwit vydhydh a'm ti ma; saw na wra dhe'm mab dehweles ena.’ 9Ha'n servont a worras y leuv yn-dann mordhos Abraham y arloedh ha ti dhodho a-dro dhe'n dra ma.

10Ha'n servont a gemmeras deg kowrvargh mes a gowrvergh y arloedh, ha mos yn-kerdh, gans oll an taklow da a'y arloedh yn y leuv. Ev a sevis ha mos dhe Aram Naharaym bys yn sita Nahor. 11Hag ev a wrug dhe'n kowrvergh mos war benn-glin a-ves dhe'n sita ryb puth dowr y'n gorthugher pan esa an benynes ow tos yn-mes dhe denna dowr, 12Hag ev e leveris, ‘A Arloedh, Duw ow arloedh Abraham, gront dhymm sewena hedhyw my a'th pys ha diskwa tregeredh dhe'm arloedh Abraham. 13Ottavy ow sevel ryb an fenten a dhowr, hag yma myrghes tus an sita ow tos yn-mes dhe denna dowr. 14An vowes may lavarav dhedhi, “Gorr dha bycher yn-nans, my a'th pys, may hylliv eva”, ha hi a worthyp, “Yv, ha my a re dowr dhe'th kowrvergh ynwedh” – gas hi dhe vos neb re wrussys hy apoyntya rag dha was Ysak, hag yndella my a woer ty dhe dhiskwedhes tregeredh dhe'm arloedh.’

15Kyns ev dhe worfenna y gows, awotta, yth esa Rebeka ow tos yn-mes – genys o hi dhe Bethuel mab Milka, gwreg Nahor, broder Abraham – gans hy fycher war hy skoedh. 16An vowes o maghteth pur deg hy semlans, gwyrghes nag o aswonnys gans gour vyth. Hi eth yn-nans dhe'n fenten ha lenwel hi fycher ha dos yn-bann. 17Ha'n servont a boenyas rag hy metya, ha leverel, ‘Ro dhymm banna dowr a'th pycher dhe eva, my a'th pys.’ 18Hag yn-medh hi, ‘Yv, ow arloedh’, ha hi a fyskas dhe worra yn-nans hy fycher war hy dorn ha ri dhodho dhe eva. 19Wosa gorfenna ri dhodho dhe eva, yn-medh hi, ‘My a denn dowr rag dha gowrvergh ynwedh bys pan worfennons eva.’ 20Ha hi a fyskas ha gwakhe hy fycher y'n new ha poenya arta dhe'n puth dhe denna, ha hi a dennas rag oll y gowrvergh. 21Ha'n gour a viras orti gluw, heb kewsel, dhe wodhvos mar kwrussa an Arloedh spedya y negys po na wrussa.

22Wosa an kowrvergh dhe worfenna eva, an gour a gemmeras bysow owrek, hanter shekel hy foes, ha dew vreghellik rag hy diwla, deg shekel owr aga foes, 23ha leverel, ‘Piw osta myrgh dhodho? Lavar dhymm, my a'th pys. Eus tyller yn chi dha das ragon dhe driga dres nos?’ 24Hag yn-medh hi dhodho, ‘My yw myrgh Bethuel, mab Milka a wrug hi dineythi dhe Nahor.’ 25Hi a leveris dhodho ynwedh, ‘Yma meur a gala' ha boes rag an kowrvergh genen ni, ha tyller dhe driga dres nos.’ 26Ha'n gour a omblegyas ha gordhya an Arloedh, 27ha leverel, ‘Benniges re bo an Arloedh, Duw ow arloedh Abraham, na wrug forsakya y dregeredh ha'y wiryonedh troha'm arloedh. An Arloedh re'm hembronkas yn ewn dhe ji breder ow arloedh.’

28Ha'n vowes a boenyas ha derivas an taklow ma dhe ji hy mamm. 29Ha dhe Rebeka yth esa broder, Laban y hanow; ha Laban a boenyas yn-mes dhe'n gour, bys y'n fenten. 30Pan welas an bysow ha'n breghelligow war dhiwla y hwoer ha klewes geryow Rebeka y hwoer, ow leverel, ‘Yndella re wrug an gour kewsel genev’, yth eth bys y'n gour, hag awotta, yth esa ow sevel ryb an kowrvergh ryb an fenten. 31Hag yn-medh ev, ‘Deus a-bervedh, ty vennigys gans an Arloedh. Prag yth es'ta ow sevel a-ves? My re bareusis an chi, ha tyller rag an kowrvergh.’ 32Ytho an gour a dheuth a-bervedh y'n chi ha diveghya an kowrvergh ha ri kala' ha boes rag an kowrvergh ha dowr dhe wolghi y dreys ha treys an wer esa ganso. 33Boes a veu gorrys a-dheragdho dhe dhybri, mes ev a leveris, ‘Ny vynnav dybri kyns my dhe dherivas ow negys.’ Yn-medh ev, ‘Kows.’

34Ytho yn-medh ev, ‘Servont Abraham ov vy, 35ha'n Arloedh re vennigas ow arloedh yn fras, hag ev re dheuth ha bos bras; ev re ros dhodho deves ha chatel, arghans hag owr, kethyon ha maghtethyon, kowrvergh hag asenes. 36Ha Sara, gwreg ow arloedh a dhineythis dhodho mab wosa hy bos devedhys ha bos koth, hag ev a ros dhodho pup-tra eus dhodho. 37Ha'm arloedh re wrug dhymm ti, ow leverel, “Na gemmer gwreg rag ow mab dhiworth myrghes an Kananysi, mayth esov trigys yn aga fow; 38mes ke dhe ji ow thas ha dhe'm teylu vy ha kemmer gwreg rag ow mab.” 39Ha my a leveris dhe'm arloedh, “Martesen ny vynn an venyn dos war ow lergh.” 40Hag yn-medh ev dhymm, “An Arloedh, mayth esov ow kerdhes dheragdho, a dhannvon y el genes, ha ty a gemmer gwreg rag ow mab dhiworth ow theylu, ha dhiworth chi ow thas. 41Kwit vydhydh a'm ti pan dhyffi dhe'm teylu; mar ny vynnons hy ri dhis, kwit vydhydh a'm ti.”

42‘Ha my a dheuth dhe'n fenten hedhyw, ha my a leveris, “A Arloedh, Duw ow arloedh Abraham, mars es'ta ow spedya ow negys mayth esov ow mos warnodho, 43ottavy ow sevel ryb an fenten a dhowr. Mars eus gwyrghes ow tos yn-mes dhe denna ha my a lever dhedhi, ‘Gas vy dhe eva banna dowr a'th pycher, my a'th pys’; 44ha mar lever hi dhymm, ‘Yv, ha my a denn dowr rag dha gowrvergh ynwedh’: bedhes homma an venyn re wrug an Arloedh hy apoyntya rag mab ow arloedh.”

45‘Kyns my dhe worfenna kewsel y'm kolonn, awotta, yth esa Rebeka ow tos yn-mes, hy fycher war hi skoedh ha hi eth yn-nans dhe'n fenten ha tenna, ha my a leveris dhedhi, “Gas vy dhe eva, my a'th pys.” 46Ha hi a fyskas ha gorra yn-nans hy fycher dhiworth hy skoedh, ha leverel, “Yv, ha my a re dhe'th kowrvergh dhe eva ynwedh.” Ytho my a evas; ha hi a ros dhe'n kowrvergh dhe eva ynwedh. 47Ena my a wovynnas orti, “Piw osta myrgh dhodho?” Hi a leveris, “Myrgh Bethuel, mab Nahor a dhineythis Milka dhodho.” Ytho my a worras an bysow war hy dewfrik ha'n breghelligow war hy diwla. 48Ena my a omblegyas ha gordhya an Arloedh ha benniga an Arloedh, Duw ow arloedh Abraham, neb a'm hembronkas war an fordh wir dhe gemmeres myrgh broder ow arloedh rag y vab. 49Ha lemmyn, mars esowgh ow kul tregeredh ha lelder gans ow arloedh, leverewgh e dhymm, ha mar nyns osta, leverewgh e dhymm, may hwrylliv treylya dhe'n dyghow po dhe'n kledh.’

50Ena Laban ha Bethuel a worthybis, ow leverel, ‘Devedhys yw hemma a'n Arloedh. Ny yllyn leverel travyth dhiso, na drog na da. 51Awotta Rebeka a-dheragos. Kemmer hi ha mos yn-kerdh. Hi a vydh gwreg dhe vab dha arloedh, dell leveris an Arloedh.’

52Pan glewas servont Abraham aga lavarow, ev a omblegyas troha'n leur dherag an Arloedh. 53Ena an servont a gemmeras yn-mes lestri arghans ha lestri owr ha dillas, ha'ga ri dhe Rebeka, ha rohow drudh a ros ev dh'y broder ha'y mamm. 54Hag i a dhybris hag eva, ev ha'n wer esa ganso, hag ostya dres nos. I a sevis myttin, hag yn-medh ev, ‘Dannvenewgh vy dhe'm arloedh.’ 55Ena yn-medh hy broder ha'y mamm, ‘Gas an vowes dhe wortos genen nebes dydhyow, po deg dydh, ena hi a wra mos.’ 56Yn-medh ev dhedha, ‘Na wrewgh ow delatya, a-ban spedyas an Arloedh ow fordh, dannvenewgh vy yn-kerdh, ha my a dhe'm arloedh.’ 57Yn-medhons i, ‘Gwren ni gelwel an vowes ha govynn orti hy honan.’ 58Hag i a elwis Rebeka, ha leverel dhedhi, ‘A vynn'ta mos gans an gour ma?’ Yn-medh hi, ‘Mynnav.’ 59Hag i a dhannvonas yn-kerdh Rebeka aga hwoer ha'y mammeth, ha servont Abraham ha'y wer. 60Hag i a vennigas Rebeka ha leverel dhedhi,

‘Agan hwoer osta;

re bi mamm dhe vilyow a dhegow a vilyow,

ha re berghenno dha has

yet an re a's kas.’

61Ha Rebeka ha'y maghtethyon a sevis ha marghogeth war an kowrvergh ha siwya an gour; yndella an servont a gemmeras Rebeka ha mos yn-kerdh.

62Lemmyn Ysak re dhothya dhiworth Beer-lahay-roi; yth esa trigys y'n Negeb. 63Ysak eth yn-mes dhe brederi y'n gwel y'n gorthugher, hag ev a viras war-vann hag awotta kowrvergh ow tos. 64Ha Rebeka a viras war-vann ha gweles Ysak, ha diyskynna dhiworth an kowrvargh. 65Yn-medh hi dhe'n servont, ‘Piw yw an gour ma ow kerdhes y'n gwel dh'agan metya?’ An servont a leveris, ‘Ow arloedh yw.’ Ytho hi a gemmeras an vayl hag omgudha. 66Ha'n servont a dherivas dhe Ysak pup-tra re wrussa. 67Ena Ysak a's dros a-berth yn tylda Sara y vamm hag ev a gemmeras Rebeka ha hi eth ha bos y wreg; hag ev a's karas. Yndella Ysak a veu konfortys wosa mernans y vamm.