Ysak hag Abimelek

1Yth esa divoetter arall y'n pow, dres an kynsa divoetter re hwarva yn dydhyow Abraham, hag yth eth Ysak dhe Abimelek myghtern an Filistysi, bys yn Gerar. 2Ha'n Arloedh a omdhiskwedhas dhodho ha leverel, ‘Na wra mos yn-nans dhe Ejyp. Gorta y'n pow may kowsav orthis anodho. 3Trig y'n pow ma ha my a vydh genes ha'th venniga, rag dhiso jy ha dhe'th has my a vynn ri oll an powyow ma. My a gollenow an ti a dos dhe Abraham dha das. 4Ha my a vynn ynkressya dha has kepar ha ster an nev, ha my a re dhe'th has oll an powyow ma. Oll kenedhlow an norvys a vydh owth omvenniga y'th has: 5rag Abraham re goelas orth ow lev ha gwitha ow charj, ow gorhemmynnow, ow ordenansow ha'm laghys.’

6Ytho Ysak a drigas yn Gerar. 7Pan wrug gwer an tyller govynn orto a-dro dh'y wreg, ev a leveris, ‘Ow hwoer yw hi’, rag ev a berthi own a leverel, ‘Ow gwreg yw hi’, rag ev a brederis, ‘Gwer an tyller a wra ow ladha, drefenn Rebeka; rag teg yw hy semlans.’ 8Wosa ev dhe vos ena termyn hir, Abimelek myghtern an Filistysi, a viras der an fenester ha gweles, hag awotta, Ysak, ow chershya Rebeka y wreg. 9Ytho Abimelek a elwis Ysak ha leverel, ‘Awotta, dha wreg yw hi yn tevri! Prag y hwruss'ta leverel, “Ow hwoer yw hi”?’ Ysak a leveris dhodho. ‘Drefenn my dhe leverel, “Rag own merwel a'y govis.” ’ 10Hag yn-medh Abimelek, ‘Pyth yw hemma a wruss'ta gul dhyn ni? Martesen onan a'n bobel a wrussa growedha gans dha wreg, ha ty a wrussa dri blam warnan.’ 11Hag Abimelek a erghis dhe oll an bobel, ow leverel, ‘Neb a arvedh an gour ma po y wreg a wra merwel.’

12Hag Ysak a hasas has y'n pow na ha kavoes kansplek y'n vlydhen na, ha'n Arloedh a'n bennigas. 13Ha bras o an gour hag ev eth yn-rag moy ha moy ha mos ha bos pur vras. 14Hag ev a gavas flokkys a dheves ha greow a warthek ha gwesyon bals, ha'n Filistysi a borthas avi orto. 15Ha'n Filistysi re stoppsa oll an puthow re wrussa palas gwesyon y das, pan o Abraham y das hwath yn few, ha'ga lenwel a dhor. 16Yn-medh Abimelek dhe Ysak, ‘Ke yn-kerdh dhiworthyn, rag ty re dheuth ha bos kreffa yn feur ageson ni.’

17Ytho Ysak eth alena ha kampya yn nans Gerar ha triga ena. 18Hag Ysak a balas arta an puthow dowr a balsons yn dydhyow Abraham y das, may hwrug an Filistysi aga stoppya yn-bann wosa mernans Abraham; hag ev a ros dhedha an keth henwyn re wrussa y das ri dhedha. 19Gwesyon Ysak a balas y'n nans ha kavoes ena puth a dhowr bew.26:19 puth a dhowr bew: Henn yw puth may feu yn-danno akwifer. 20Mes bugeledh Gerar a strivyas gans bugeledh Ysak, ow leverel, ‘Yma'n dowr dhyn ni.’ Ytho ev a elwis an puth Esek drefenn i dhe strivya ganso. 21Ena i a balas ken puth hag i a strivyas a-dro dhe henna ynwedh; ytho ev a'n gelwis Sitna. 22Ena ev eth yn-rag alena ha palas ken puth; ny wrussons i strivya a-dro dhodho; ytho ev a elwis y hanow Rehoboth ow leverel, ‘Rag lemmyn, an Arloedh re wrug spas ragon, ha ni a dheg frut y'n pow.’

23Hag ev eth yn-bann alena dhe Beer-sheba. 24Ha'n Arloedh a omdhiskwedhas dhodho an keth nos ha leverel, ‘My yw Duw Abraham dha das. Na borth own, rag yth esov genes ha my a wra dha venniga hag ynkressya dha has a-barth Abraham ow gwas.’ 25Ytho ev a dhrehevis alter ena ha gelwel war hanow an Arloedh; hag ena ev a settyas y dylda, hag ena gwesyon Ysak a gleudhyas puth.

26Ena Abimelek eth dhodho dhiworth Gerar, hag Ahuzzath y goweth, ha Fikol pennhembrenkyas y lu. 27Ysak a leveris dhedha, ‘Prag y hwrussowgh dos dhymmo? Hwi a'm kas ha hwi a'm dannvonas yn-kerdh dhiworthowgh.’ 28Yn-medhons i, ‘Dhe wir, ni re welas bos an Arloedh genes; ytho ni a leveris, bedhes ti yntredhon, ni a'th pys, yntra ni ha ty, ha gwren gul kevambos genes, 29na wre'ta gul drog dhyn, par dell na wrussyn dha dochya. Ny wrussyn gul saw da dhis ha'th tannvon yn-kerdh yn kres; ha bennigys osta lemmyn gans an Arloedh.’ 30Hag ev a wrug kevewi ragdha, hag i a dhybris hag eva. 31I a sevis myttin a-varr ha ti an eyl dh'y gila, hag Ysak a's dannvonas yn-kerdh, hag i eth dhiworto yn kres. 32An keth jydh na, gwesyon Ysak a dheuth ha derivas dhodho a-dro dhe'n puth a wrussens y balas, ha leverel dhodho, ‘Ni re gavas dowr.’ 33Ev a'n gelwis Sheba. Rakhenna hanow an sita yw Beer-sheba bys y'n jydh hedhyw.

34Ha pan ova dew-ugens bloedh, Esaw a dhemmedhis Yudith myrgh Beeri an Hittyas, ha Basemath myrgh Elon an Hittyas. 35Ha hwerowder spyrys o an re ma dhe Ysak ha Rebeka.