Toell Yakob

1Ysak gyllys koth, ha re wann y dhewlagas dhe weles, ev a elwis Esaw y vab kottha ha leverel dhodho, ‘Ow mab’; hag ev a leveris, ‘Ottavy.’ 2Hag yn-medh ev, ‘Otta, gyllys koth ov vy ha ny wonn dydh ow mernans. 3Kemmer dha dhaffar lemmyn, dha woen ha'th warak ha ke yn-mes dhe'n gwel ha helghya helgik ragov, 4ha pareusi taklow sawrek ragov a'n par a garav, ha'ga dri dhymm ha my a dheber; ha'm enev a'th vennik kyns my dhe verwel.’

5Yth esa Rebeka ow koslowes pan gewsis Ysak orth Esaw y vab. Ena Esaw eth dhe'n gwel dhe helghya helgik ha'y dhri. 6Rebeka a gewsis orth hy mab Yakob, ow leverel. ‘Otta, my re glewas dha das ow kewsel orth Esaw dha vroder, ow leverel, 7“Doro dhymm helgik ha pareusi taklow sawrek ragov, ha my a dheber ha'th venniga a-dherag an Arloedh kyns ow mernans.” 8Ha lemmyn, ow mab vy, goslow ow lev, an pyth a wrav y erghi dhis. 9Ke dhe'n flokk, ha kemmer dhymm alena dew vynn da a'n gever, ha my a bareus taklow sawrek rag dha das, a'n par a gar ev. 10Ha ty a'n dre dhe'th tas hag ev a'n deber, rag ma'th vennikko kyns y vernans.’ 11Mes yn-medh Yakob dhe Rebeka y vamm, ‘Otta, Esaw ow broder yw gour blewek, ha smodh ov vy. 12Ow thas a vynn ow thava martesen, ha gweles ow bos ow kul ges anodho, ha my a dhre warnav molleth, a-der bennath.’ 13Yn-medh y vamm dhodho, ‘Warnav vy re bo an volleth, a vab vy. Unnweyth goslow ow lev ha ke dh'aga hemmeres ragov.’ 14Ytho ev eth ha'ga hemmeres ha'ga dri dh'y vamm; ha'y vamm a bareusis taklow sawrek a'n par a gara y das. 15Ha Rebeka a gemmeras gwella dillas Esaw hy mab kottha esa gensi y'n chi ha gwiska Yakob hy mab yowynka. 16Ha hi a worras kreghyn an mynnow gever war y dhiwla ha war rann smodh y gonna 17ha ri an taklow sawrek ha'n bara a bareusis a-berth yn dorn Yakob hy mab.

18Ytho ev a dheuth dh'y das ha leverel, ‘Ow thas’; hag ev a leveris, ‘Ottavy, piw osta, ow mab?’ 19Hag yn-medh Yakob dh'y das, ‘Esaw ov vy, dha gynsa-genys. My re wrug war-lergh an pyth a leversys dhymm. Omdhrehav, my a'th pys. Esedh ha dybri a'm helgik may hwrello dha enev ow benniga.’ 20Mes yn-medh Ysak dh'y vab, ‘Fatell yllsys kavoes hemma mar uskis, ow mab?’ Hag yn-medh ev, ‘Rag an Arloedh dha Dhuw a'n dros a-ragov.’ 21Ena yn-medh Ysak dhe Yakob, ‘Deus nes, my a'th pys, may hylliv dha dava, ow mab, mars osta Esaw ow mab, po nag osta.’ 22Ha Yakob a dheuth nes dhe Ysak y das, hag ev a'n tavas ha leverel, ‘An lev yw lev Yakob mes an diwla yw diwla Esaw.’ 23Ha ny wrug y aswonn rag bos y dhiwla blewek, kepar ha diwla y vroder Esaw; ytho ev a'n bennigas. 24Yn-medh ev, ‘Osta yn hwir ow mab Esaw?’ hag yn-medh ev, ‘Ov.’ 25Ena yn-medh ev, ‘Doro e nes dhymm, ha my a dheber neppyth a helgik ow mab ma'th vennikko ow enev.’ Ytho ev a'n dros nes dhodho hag ev a dhybris; hag ev a dhros gwin, hag ev a'n evas. 26Ena Ysak y das a leveris dhodho, ‘Deus nes, my a'th pys, hag amma dhymm, ow mab.’ 27Ev a dheuth nes hag amma dhodho; hag ev a glewas blas y dhillas ha'y venniga, ha leverel,

‘Mir, blas ow mab

yw kepar ha blas gwel

re wrug an Arloedh y venniga.

28Ha re rollo Duw dhis

gluth nev

ha feythter an dor

ha palster a ys ha gwin.

29Re'th serfyo an poblow

ha kenedhlow omblegya a-dheragos.

Bydh mester war dha vreder

ha gwres mebyon dha vamm omblegya a-dheragos.

Milliges re bo an re a wra dha villiga

ha benniges an re a wra dha venniga.’

30Pan wrussa Ysak gorfenna benniga Yakob ha Yakob skant gyllys yn-mes dhiworth Ysak y das, y teuth y vroder Esaw dhiworth y helgh. 31Ev ynwedh re bareussa taklow sawrek ha'ga dri dh'y das ha leverel dh'y das, ‘Re omdhrehaffo ow thas, ha dybri helgik y vab, ma'm bennikko dha enev.’ 32Hag yn-medh Ysak y das dhodho, ‘Piw osta?’ hag yn-medh ev, ‘Dha vab ov vy, dha gynsa-genys, Esaw.’ 33Ena Ysak a grenas yn pur veur ha leverel, ‘Piw veu ytho neb a helghyas helgik ha'y dhri dhymmo, ha my a'n dybris oll, kyns ty dhe dhos? My a'n bennigas, ha benniges vydh.’ 34Pan glewas Esaw geryow y das ev a armas kri pur vras ha hwerow ha leverel dh'y das, ‘Bennik vy ynwedh, a das.’ 35Mes yn-medh ev, ‘Dha vroder re dheuth yn unn doella ha kemmeres dha vennath.’ 36Hag yn-medh ev, ‘A nyns yw ewn y vos henwys Yakob? Rag ev re gemmeras ow le an dhiw weyth ma: ev a gemmeras ow gwir genesik, hag otta, lemmyn ev re gemmeras ow bennath.’ Yn-medh ev ynwedh, ‘A ny wruss'ta gwitha bennath ragov vy?’ 37Ysak a worthybis ha leverel dhe Esaw, ‘Otta, my re'n settyas avel mester warnas, ha ri dhodho oll y vreder avel gwesyon, ha my re'n sostenas gans ys ha gwin. Pandra ytho a wrav lemmyn ragos jy, ow mab?’ 38Hag yn-medh Esaw dh'y das, ‘Eus genes saw unnsel unn vennath, ow thas? Bennik vy ynwedh, a das.’ Hag Esaw a dhrehevis y lev hag oela.

39Ena Ysak y das a worthybis ha leverel dhodho,

‘Otta, pell dhiworth feythter an dor y fydh dha drigva

ha dhiworth gluth an nev a-vann.

40Dre dha gledha ty a vew,

ha ty a serv dha vroder;

mes pan wrylli sesya rydhses,

ty a derr y yew dhiworth dha gonna.’

41Lemmyn Esaw a'n jevo eskarogeth erbynn Yakob drefenn an vennath may hwrussa y das y venniga gensi, hag Esaw a leveris yn y golonn, ‘Yma'n dydhyow a gynvann a-barth ow thas ow tos nes. Ena my a vynn ladha ow broder Yakob.’ 42Ha derivys veu geryow hy mab kottha dhe Rebeka ha hi a dhannvonas ha gelwel Yakob hy mab yowynka ha leverel dhodho, ‘Otta, yma dha vroder Esaw owth omgonfortya, ow prasa dhe'th ladha. 43Ha lemmyn, ow mab klew ow lev; sav, ha fi dhe Laban ow broder, dhe Haran. 44Gorta ganso nebes dydhyow erna vo treylys dhe-ves sorr dha vroder; 45erna dreyllyo sorr dha vroder dhiworthis, hag ev a ankev an pyth re wruss'ta gul dhodho. Ena my a dhannvon, ha'th kemmeres alena. Prag y koedh dhymm kelli agas dew y'n keth jydh?’

Yakob Dannvenys dhe Laban

46Ena yn-medh Rebeka dhe Ysak, ‘Kasadow dhymm yw ow bewnans drefenn myrghes Heth. Mar mynn Yakob kemmeres gwreg a vyrghes Heth, kepar ha myrghes an pow ma, prag y fynnav bewa?’