1Ena Ysak a elwis Yakob, ha'y venniga, hag erghi dhodho ow leverel, ‘Na gemmer gwreg a vyrghes Kanan. 2Sav yn-bann, ke dhe Padan-aram, dhe ji Bethuel, tas dha vamm, ha kemmer dhis gwreg alena a vyrghes Laban, broder dha vamm. 3Ha re'th vennikko Duw Ollgalloesek ha gul dhywgh doen frut hag ynkressya ha dos ha bos kemmynieth a boblow, 4ha ri dhis bennath Abraham, dhiso jy ha dhe'th has genes jy, may hylli perghenna an pow mayth esos ow kodriga ynno avel alyon, a ros Duw dhe Abraham.’ 5Ytho Ysak a dhannvonas Yakob yn-kerdh; hag ev eth dhe Padan-aram, dhe Laban mab Bethuel a Aram, broder Rebeka, mamm Yakob hag Esaw.

6Hag Esaw a welas re wrussa Ysak benniga Yakob ha'y dhannvon dhe Padan-aram dhe gemmeres dhodho gwreg alena; ha pan wrug ev y venniga ev a erghis dhodho, ow leverel, ‘Na wra kemmeres gwreg a vyrghes Kanan.’ 7Ha Yakob a wrug vri a'y das ha'y vamm ha mos dhe Padan-aram. 8Ena Esaw a welas bos myrghes Kanan kasadow yn golok Ysak y das; 9ytho Esaw eth dhe Yshmael ha kemmeres Mahalath myrgh Yshmael mab Abraham, hwoer Nebayoth avel gwreg ragdho, yn mysk y wragedh erell.

Hunros Yakob

10Ha Yakob eth yn-mes dhiworth Beer-sheba ha mos troha Haran. 11Ev a dheuth dre jons dhe neb unn tyller ha gortos ena dres nos, rag bos an howl sedhys. Ev a gemmeras onan a veyn an tyller ha'y worra yn-dann y benn ha growedha y'n tyller na. 12Hag ev a hunrosas hag otta, skeul a veu drehevys war an nor ha'y fenn ow tochya an nevow, hag yth esa eledh Duw owth yskynna ha diyskynna warnedhi. 13Hag awotta, yth esa an Arloedh ow sevel a-ughti, hag yn-medh ev, ‘My yw an Arloedh, Duw Abraham dha das ha Duw Ysak. My a re an tir esos ow krowedha warnodho dhiso jy ha dhe'th has. 14Ha'th has a vydh kepar ha doust an dor ha ty a wra omlesa dhe'n howlsedhes, dhe'n howldrevel, dhe'n kledh ha dhe'n dyghow, hag oll teyluyow an norvys a vydh benniges ynnos hag y'th has. 15Hag awotta, yth esov vy genes, ha my a'th with plepynag mayth ylli. My a'th tre arta dhe'n dor ma, rag ny wrav dha asa erna wrylliv an pyth re gewsis dhis anodho.’ 16Ena Yakob a dhifunas a'y gosk ha leverel, ‘Yn sur, yma an Arloedh y'n tyller ma, ha ny'n godhyen vy.’ 17Hag ev a borthas own ha leverel, ‘Ass yw euthyk an tyller ma. Nyns yw hemma travyth lemen chi Duw, ha hemm yw an porth a nev.’

18Ha Yakob a sevis myttin a-varr ha kemmeres an men re wrussa y worra yn-dann y benn, hag ev a'n settyas avel peulven ha dinewi oyl war an penn anodho. 19Hag ev a elwis hanow an tyller na Bethel, mes Luz o hanow an sita kyns. 20Ha Yakob a ambosas ambos, ow leverel, ‘Mar pydh Duw genev ha'm gwitha y'n fordh ma mayth esov ow mos, ha ri dhymm bara dhe dhybri ha dillas dhe wiska, 21may tehwelav yn kres dhe ji ow thas, ena an Arloedh a vydh ow Duw; 22ha'n men ma a wrugavy y settya yn-bann avel peulven a vydh chi Duw; hag a bup-tra a redh dhymm, my a re dhis an dega.’